IL GRANT LUNARI DAL FRIÛL. Otubar

Otubar al è il diesim mês dal an. Il non lu à cjapât di october, che al vûl dî otâf mês dal antîc calendari roman. Prin mês de Sierade, tacade cul ecuinozi, Otubar al è il timp des racueltis, soredut chê de ue tacade in Setembar (par chest in Friûl une volte Setembar e Otubar a jerin clamâts vendemis o vendemadôr) e di dutis chês altris pomis, puartant agjitazion e ligrie prime su lis culinis e sul plan, par cjapâ sù tancj prodots de tiere e de vore dal om epo tai curtîi, li che une volte a rivavin i cjars plens incolms di ue, di panolis, di patatis, cun zeis di miluçs, piruçs, fîcs, nolis e cjastinis e bon odôr di most e di trapis tai borcs e di polente fate cu la blave gnove. E je la fieste de Madone dal Rosari che e segne dapardut la colme des vendemis. Finidis lis racueltis, puartâts in cjase ducj i prodots de tiere, fatis sù di gnûf lis scortis e la semine pal an gnûf, il cicli agrari si siere e la tiere si pronte pal lunc sium dal Invier. La fieste di Sant Simon e rapresente l’ultin confin dal cicli. La nature e scomence a pandi la mancjance di vivôr tai cetancj colôrs smamîts e flaps de vegjetazion che e inmaghe, diviers animâi si prontin un ripâr te tiere cuintri la stagjon frede che e sta par rivâ. I paisaçs a cjapin tintis maron e si inscurissin, intant che lis vals des monts a son sot di cjapiei di brume e il mâr si ingrispe par vie des scoreadis dal maistrâl e de tramontane. La Sierade e regne bielzà sui cjamps e e fâs sintî i siei efiets su lis sfueis des plantis che si fasin rossis e zalis cu lis primis zulugnis par po colâ. Finidis lis bordadis dai burlaçs dal ecuinozi di Setembar, in Otubar la atmosfere e pues tornâ al biel; il soreli, che al devente simpri plui debil, al inlumine zornadis serenis e trasparentis che a permetin ancjemò cjaminadis a viert, ma tai ultins dîs dal mês a rivin lis primis ploiis lungjis e fredis, lis fumatis, tante umiditât e il prin frêt. A è rivât il timp dai foncs e des gnespolis, dai scjaps di uciei che si butin cul cjâf in jù tes oseladis e tai rocui biel che svolant alts tai cîi avilîts a van viers il meridion. Dapardut si sint la nostalgjie dal soreli.
L’astri lusorôs, passât l’ecuatôr celest tal pont critic dal ecuinozi di Setembar, cuant che la durade dal dì e je compagne a chê de gnot, al va viers il font dal solstizi dal Invier, la sô muart simboliche, cuant che al tocjarà a voli crot il pont plui bas dal nestri orizont. Fin chê volte lis zornadis a van indevant a scurtâsi e lis gnots a slungjâsi simpri di plui e il scûr al à za vinçût la lûs cuant che su la Stradalbe al nas il so nemì, il Sgarpion, e a van jù Orion e Taur. ❚
Mario Martinis
RINGRAZIAMENT AL AUTÔR
Gjavât fûr di “Il grant lunari dal Friûl. Sants, fiestis e tradizions dal cicli dal an” (Pasian di Prât, 2012): o ringraziìn l’autôr pe disponibilitât e pe colaborazion ❚ ✒ Redazion