Sfuei Mensîl Furlan Indipendent
Archivi de Patrie

IL FERÂL. Comprâ e vendi par furlan

............

In chescj timps di dificoltâts economichis, lis parts plui debulis de societât a son chês che a rissintin di plui la crisi e la mancjance di risorsis: di sigûr, fameis, piçulis ativitâts e ancje lis minorancis che pal fat di jessi minorancis e àn vût simpri dificoltâ e cumò plui ancjemò. Alore la domande che si fasisi: al dì di vuê lis minorancis culturâls sono un valôr che si zonte o un dam pe societât, la culture in sé ise une risorse, un investiment o une spese in plui? Il stât stracial o investissial bêçs, sostignint la culture che ancje i piçui a produsin? Cualchi ministri al veve ancje dit che cu la culture no si mangje! O riproponin fruçons di une des ultimis considerazions che pre Antoni al veve prime di murî su economie e identitât, economie e culture.
pre Roman Michelotti
Semplificant il pinsîr di Marx, “la economie e spieghe la storie”. Ancje se lis sôs teoriis no àn puartade cui sa ce furtune a di chei che lis àn metudis in vore o imponudis cu lis buinis o cu lis tristis e la storie e sta dimostrant ogni dì di plui lis tragjediis e i dams di une dutrine o teorie fate passâ par veretât assolude, no podìn no concuardâ che “cence economie no si spieghe la storie”. E  nancje no si le fâs. Parcè che l’om, fra lis sôs tantis cualitâts e potenzialitâts e catalogazions, al è ancje un animal oeconomicum. …
Chest mont furlan, sotan in politiche e in economie, al à tant fat di massàrie e di manoâl che al à la convinzion, o cualchidun al cîr di convincilu, che nol è fat par comandâ ma dome par ubidî, che nol à il don de managerialitât ma dome la cualifiche de pale e dal picon. Di li un sens di frustrazion, di suturnitât, di pocje sgrimie, di rassegnazion.
Però alc al è capitât ancje chi di nô. In ritart, jessint une regjon confinade, o in maniere parziâl e inadeguade, jessint une tiere bandonade dai politics e sfurnide di une classe dirigjent degne di chest non. Cence santui, tignint dûr, lavorant fieste e disdevore, doprant il  propi ingegn e chês cualitâts individuâls cussì marcadis ma che a stentin a deventâ un fat e un ben sociâl e coletîf, zontant ancje lis palanchis meretadis di une disgracie no meretade come il taramot, sta di fat che il Friûl al à savût riscatâsi, cjatâ une sô strade particolâr, une sô muse, un stîl di lavorâ e di produsi che al à cjatât udience, rispiet, atestazion positive no dome in Italie, ma in Europe e tal mont. In chel mont  che i nestris vons a levin disperâts, i lôr nevôts a van a cjâf alt, cun professionalitât e dignitât. No van dome a cirî, ma ancje e sore dut a puartâ, parcè che, pe prime volte inte storie, il furlan si è cjatât tal grant marcjât dal mont a puartâ e tratâ e no dome a puartâ atôr casselis o adiriture a jessi metût sul banc, in vendite. …
Un popul al pò vê un avignî dome se l’economie e la culture si dan une man une cun chê altre. Comprâ e vendi par furlan e po deventâ la grande ocasion di riscat e di promozion di un popul che, te storie, al à scugnût rassegnâsi a fâ une part ingloriose: lassâsi comprâ e vendisi al prin ch’al capitave. Al è rivât il moment di gambiâ solfe e o vin dutis lis brisculis par vinci la partide. Parcè che o sin cressûts, o vin cuistade stime di nô, o vin mostrât e o stin mostrant che o sin un popul valit, di int che no à pôre de modernitât e nancje de concorince, parcè che e à lis cualitâts inteletuâls e professionâls par imponisi. Fintore la lote autonomiste no à cjapât pît parcè che e vignive puartade indenant sore dut tal cjamp culturâl e di int inteletualmentri preparade ma che no veve nissune esperience e sensibilitât pal mont dal lavôr e de produzion. E tancj a àn confondude la culture furlane cu la poesie o la vilote par furlan. Nuie di plui sbalât e periculôs. La culture furlane, come ogni vere culture, e je omnicomprensive. E l’economie e je une des colonis puartantis di un Friûl riscatât e protagonist. Se un prodot al è fat chi, cul matereâl di chi e cu la int di chi e cul mistîr di chi, parcè no vino di vê la furbetât di clamâlu ancje cu la nestre lenghe? Jo no scomet mai, ma o sarès disponût a scometi che une promozion par furlan e je un bon investiment. Parcè che la peraule “Friûl” e val ancjemò.
Editorâl di La Patrie dal Friûl di avrîl dal 2007, n. 04. ❚
✒ pre Antoni Beline

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +