Chest an o vin volût vierzi une gnove rubriche par presentâ dutis chês realtâts archeologjichis dal Friûl che, magari cussì no, a son mancul cognossudis ma no par chest mancul impuartantis. Par fâ chest o vin domandât la colaborazion de Societât Furlane di Archeologjie che dal 1989 si impegne cetant su dut il teritori par valorizâ e promovi il nestri patrimoni culturâl.
Cafè leterari a Aquilee
Daûr de tradizion dal Votcent, cuant che lûc di incuintri e di dibatit culturâl al jere il cafè, il bar pasticerie Mosaico a Aquilee al propon vie pal Istât une schirie di incuintris di varie nature. A partî cun miercus ai 10 di Lui aes 20.30 la serade e varà par teme “Il rît dal tè in Europe”, di cuant che si è afermât a cemût che al à influenzât lis abitudinis auropeanis; a intervegnin Lorenza Bellè e Maurizio Buora.
Ai 17 di Lui, simpri aes 20.30 si fevelarà di “Gotico… ma non troppo”: dibatit sula scuvierte di un document su la presince di un vampîr in Slovenie ma e sarà la ocasion par scuvierzi ancje mîts e liendis de nestre regjion cui intervents di Lorenza Bellè, Anna Degenhardt e Silvia Blason.
Miercus ai 31 di Lui aes 20.30 e sarà la volte dal teme “Il Signore degli anelli: tra filosofia e fantasy”, un classic de leterature presentât sot di une gnove lûs cun Lorenza Bellè.
In fin ai 7 di Avost si dibatarà di “Rosso porpora”, la antighe produzion de purpure tal nestri teritori cun Lorenza Bellè, Silvia Blasone e Annalisa De Franzoni.
Ducj i apontaments a son patrocinâts dal Comun di Aquilee e de Fondazion Aquilee e cu la colaborazion dal MiBAC, Museu Archeologjic Nazionâl di Aquilee e Grup Archeologjic di Aquilee.
Aquilee scuindude: sugjestions, aromis e savôrs di un timp antîc
Ai 18 di Lui, in ocasion de ricorence de capitolazion di Aquilee daspò dal assedi di Atile (viôt sot) la Societât Furlane di Archeologjie e tornarà a fâ nassi la citât antighe fasintnus viodi i siei cjantons taponâts cuntune cjaminade dilunc des viis che a passin dongje dal cimitieri, dulà che une volte al jere il circ massim. Cul jutori dai archeolics de SFA si podarà scuvierzi ce che si cjate sot tiere o ipotizâ ce che inmò al è taponât in spiete di jessi puartât in lûs midiant i sgjâfs, intant che Tullio Svettini al coinvolzarà il public cun leturis sugjestivis su la cuotidianitât antighe.
Dilunc de visite nol mancjarà moment par ricuardâ trê figuris impuartantonis par Aquilee, come Ugo Pellis, Giovanni “Tita” Brusin e Luisa Bertacchi.
Ae fin dal percors il Grup Archeologjic Acuileiês al compagnarà i presints intun viaç botanic mostrant cuale che e jere la flore tal teritori e cemût che si le impleave.
Ae fin dal event al vignarà ufiert un rinfresc.
Programe:
– A lis 17.15 si cjatisi li dal parc des machinis dal cimitieri, par une piçule visite a lis tombis dai personaçs citâts e partence viers des muris bizantinis par une spassizade cun ilustrazion des testemoneancis archeologjichis inmò sepulidis, cun leturis recitadis di Tullio Svettini.
– A lis 18.30 si torne li des muris e apontament cul Grup Archeologjic Acuileiês e l’espert in botaniche par un viaç tra aromis e savôrs de antichitât.
– Dilunc de escursion e je previodude une ativitât didatiche pai fruts.
– A lis 19.30 rinfresc.
L’event al è patrocinât dal Comun di Aquilee in colaborazion cul MiBAC – Museu Archeologjic Nazionâl di Aquilee. ❚
Venusia Dominici e Giovanni Filippo Rosset
_____________________________________________________
***
La liende de cicogne
Tal 452 Atile al tornà in Italie par reclamâ lis sôs gnocis cun Onoria. Il so esercit, fat soredut di trupis gjermanichis, al cjaminà viers Triest ma al fo fermât a Aquilee, citât fortificade di grande impuartance strategjiche, parcè che midiant di chê si podeve controlâ grande part de Italie dal Nord. Atile le sierà in assedi par trê mês ma cence risultât. A chest pont la liende e conte che propit intant che al stave par tirâsi indaûr di une tor des muris si alçà une cicogne che e lassà la citât cul so piçul sù pe schene. Atile, che al jere une vore superstiziôs, al decidè di restâ: subit dopo la part dal mûr dulà che e jere poiade la cicogne e vignì jù e Atile al podè cussì jentrà e cjapâ la citât cul so esercit, che al sdrumà dut cence padin. ❚
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +