«Prime di scomençâ chest piçul scandai che al inten al studi dal rapuart tra la realtât corporâl e i elements soresensibii che le rindin manifestabile e di stazâ cemût che la cuistion e ven tratade des scuelis tradizionâls, al covente fâ une premetidure di caratar lessicâl par podê sclarî ce che o intindìn cui tiermins di anime e di spirt».
Nol finìs di scaturînus Fabian Ros, cui siei libruts autoeditâts. Chest chi al à un centenâr di pagjinis, ma penzis, penzononis, che i volarès letis dôs o trê voltis par scomençâ a capî. Ma ancje in prime leture si puedin preseâ dai aspiets une vore interessants. La lenghe doprade, par esempli: biele, sclete, precise, elegante. Ancjemò une dimostrazion che ancje par furlan si pues scrivi di materiis tant che religjon, teologjie, antropologjie, filosofie. Naturalmentri i vûl savût doprâ la lenghe a un nivel elevât e cognossi ben i argoments che si fevele. E duncje i vûl vê une culture robuste, i vûl vê let tancj di chei libris fin a rivâ a fâsi une convinzion proprie su ce che si à let e a criticâ, cun cognossince di cause, lis posizions che no si condividin. Dutis cualitâts che a saltin fûr ad implen in cheste vore di Ros. Simpri in cont de lenghe, a son di segnalâ bielis peraulis pôc frecuentis: muiûl, grimaie, cimeri, nusel… e costruzions ardidis.
I subiets che il libri al trate no son facii: si fevele des religjons orientâls (ma atenzion: no simpri il tiermin “religjon” al à il sens che i din noaltris ocidentâi), di tradizions (induiste, budiste, islamiche, ebraiche, taoiste), di metafisiche (ma ancje dal so rapuart cu la fisiche), di siamans, di animisim, di materialisim, di misticisim. E si finìs cuntun cjapitulut dedicât a la Glesie di Aquilee. Che e veve, intai prins secui, des carateristichis sôs propriis (la presince dal bal corâl, dongje de musiche, par dî une) ancje par vie des sôs relazions continuativis cun Alessandrie di Egjit.
Il libri si complete cuntune bibliografie ricje e cuntun util glossari des terminologjiis sanscrite, cinese, ebraiche e arabe.
Leture impegnative, che i fâs fâ un biel salt indevant al nivel de lenghe furlane. ❚
Laurin Zuan Nardin