Paolo Zanussi, segns e colôrs par capî il mont

A vincj agns de prime mostre antologjiche, il Museu Cjase Cavazzini di Udin al da acet, fin ai 15 di Setembar (di martars a domenie, des 10 di matine aes 6 sore sere), a une gnove esposizion cun pituris e dissens di Paolo Zanussi.
Zanussi, udinês (1936-1997), al à lavorât a Milan e tal forest tant che publicitari e gjornalist, metint a pro il so talent naturâl di dissegnadôr. Culture, imagjinazion, gust de contradizion e dal paradòs, unîts a une sveltece istintive di segn, i àn permetût di dâ vite a campagnis publicitariis deventadis famosis in Italie e tal forest. Ma al à mantignût simpri inte dimension segrete dal so mont privât la produzion di oparis pitorichis e di dissens: i struments par capî, fevelâ e confrontâsi cu la realtât, cul mont. I siei tacuins di viaç – publicâts di resint di Gaspari intal “Diari ilustrât” – a testemonein une esistence plene di gjonde, di riflessions no convenzionâls e di curiositât.
Fra un viaç e chel altri – e indi à fats tancj -, Zanussi nol à mai dismenteât di tornâ intal so Friûl par cjatâ i amîs plui cjârs e cjaminâ su lis sôs amadis monts. ❚
par cure de redazion