I cors di lenghe furlane a rivin online

ARLeF e Filologjiche adun par garantî
la continuitât al insegnament de marilenghe ancje in timps di pandemie.
Al sarà presentât ancje un gnûf manuâl
pal studi prontât a pro dai arlêfs
Gnove version pai cors pratics di lenghe furlane inmaneâts de Societât Filologjiche Furlane e sostignûts de ARLeF – Agjenzie Regjonâl pe Lenghe Furlane. La ativitât formative gratuite, chest an e varà un aspiet gnûf e impuartant: lis lezions di alfabetizazion (che a tacaran cui 8 di Fevrâr), destinadis al massim a 90 partecipants, si fasaran dal dut online, su lis plateformis Moodle e Zoom. Al è stât sclarît vuê in ocasion de conference stampe di presentazion là che a son intervignûts l’assessôr aes autonomiis locâls de Regjon Autonome Friûl – Vignesie Julie, Pierpaolo Roberti, Eros Cisilino, president de ARLeF e Federico Vicario, president de Societât Filologjiche Furlane (SFF).
◆ «Al è impuartant infuartî l’ûs de lenghe furlane: il cors che ARLeF e Filologjiche a organizin insiemi par garantî continuitât ae formazion in marilenghe, ancje in timps di pandemie, al darà un supuart valit par dâ lis primis basis di gramatiche, par incressi la cognossince e l’ûs de lenghe e par continuâ a coltivâ la braùre di jessi furlans», al à sotlineât l’assessôr Roberti, ricuardant cemût che «intant che o sin daûr a vivi une crisi sanitarie e economiche che e influìs in maniere direte su lis cassis de Regjon, si varessin podût justificâ tais: nô no ju vin fats, e no vin nissune intenzion di aplicâju al setôr des lenghis minoritariis che, o ribatìn, a son essenziâls pe nature stesse de Regjon F-VJ».
◆ «I crodìn une vore a cheste gnove propueste formative, che e aderìs in maniere perfete al contest che si cjatìn a vivi – al à precisât il president de ARLeF –. La pandemie e à cambiât dal dut tantis nestris abitudins, tacant des modalitâts didatichis tradizionâls. Sielzi di puartâ sul web i cors di furlan nus da la ocasion di slargjâsi a un public simpri plui grant, rivant ancje a cui che – par diviers motîfs – nol rivave adore a partecipâ aes lezions in presince, e che cumò invezit al podarà aprofitâ di cheste oportunitât, stant che i contignûts des lezions a son disponibii daûr des sôs dibisugnis di orari».
◆ «Chestis azions a rapresentin l’impegn e la continuitât di azion che a animin di simpri sedi la Societât Filologjiche Furlane che la ARLeF – al à marcât il president de SFF –. Une colaborazion che intai ultins agns e à cjatât stradis simpri gnovis e miôr par otignî risultâts comuns. Par chest, o vin di lei cun cetant favôr il sfuarç di chescj doi sogjets pe promozion dal furlan ancje midiant di struments gnûfs che la tecnologjie nus met a disposizion, e che il moment nus oblee a adotâ. Pes lezions, o vin sielzude une plateforme che e da une garanzie sigure e che e je za sperimentade par dut il mont cun risultâts otims pe didatiche universitarie, ma che ancje utents mancul esperts a puedin disfrutâ in maniere facile».
◆ Chê dai cors online e je une sielte obleade par vie de situazion là che si cjate il Paîs; dut câs, e je za stade metude in vore, ancje se in maniere parziâl, te ultime part dal 2020. Di fat, daspò de sospension des ativitâts in presince su la fin di Fevrâr, e dopo di une riprese curte e di un secont stop, i 12 cors, organizâts ancje cu la colaborazion des Aministrazions comunâls, a son lâts indenant in modalitât online e si sono sierâts tal mês di Dicembar dal 2020.
◆ I cors pratics di lenghe furlane a tornin intal 2021, duncje, cuntune forme gnove e cuntune struture ancjemò plui articolade, furnint struments simpri plui pratics e utii ai iscrits che – se a frecuentaran almancul il 70% des lezions – a ricevaran un atestât di partecipazion: un titul culturâl par acedi ae liste regjonâl dai insegnants cun competencis in lenghe furlane.
◆ La gnove oportunitât formative e dopre tant che fonde i contignûts dal prin volum de golaine “Lenghe e culture” dedicât ae formazion dai adults. Il plan de opare al previôt 3 fassicui di 112 pagjinis ognidun, cuntun libri par ogni an di cors (I, II e III), spartît in 12 unitâts didatichis. Ogni unitât e presente une leture cun provis di comprension dal test, aprofondiments di gramatiche e esercizis, cun dificoltâts cressintis sedi tal lessic che inte morfologjie verbâl. Il manuâl al è duncje organizât su la progression e su la gradualitât intal disvilup des abilitâts linguistichis. Il volum stampât al è a disposizion a gratis intes sedis de ARLeF e de SFF; in version digjitâl su www.arlef.it  e www.filologicafriulana.it.
◆ Pal cors in partence la prime setemane di Fevrâr a son in program 10 lezions asincronis, su Moodle (ogni setemane al sarà publicât materiâl gnûf, che al restarà simpri a disposizion), che a favorissin la riflession, il studi in autonomie e che a rimandin ai trê incuintris sincrons par sclariments e confronts, su Zoom, ognidun di une ore cirche. ❚
Redazion