50 agns di ativitât

“La idee a nas 50 agns fa – al dîs Mario Gollino, un dai fondadôrs da aziende di ondulâts e imbaladuris – in pratiche par câs: insiemi cuntun amì che o jerin daûr a lâ a Triest, si discuteve cemût mai che in chestis dôs grandis valadis (Cjargne e Cjanâl dal Fier) nol jere nuie. Lant a Triest o sin passâts devant di une fabriche indulà che a discjamavin cartons: e jere la aziende “Scatolificio Goriziano”. “Ve mo, lis scjatulis o podaressin fâ!” Cuant che o sin tornâts indaûr si sin fermâts a bevi un tai te ostarie e o vin butade fûr cheste idee. Inte ostarie a jerin in doi, e a àn dit “O partecipin ancje nô! Cussì in 4 o fasìn 4 scjatulis. Doman o tachìn a interessâsi.” Altri che analisis di marcjât: par câs o vin sielt un setôr che nol jere gran svilupât; fin in chê volte no si inscjatolave nuie, si leve al marcjât cu la sporte! La imbaladure e lis scjatulis a son vignudis cui americans cuant che a àn tacât a mandâ ca robe dentri tes scjatulis, e duncje al jere un prodot gnûf e in grande espansion.”
◆ Vuê la aziende e je in stât di fâ scjatulis di ogni gjenar e di ogni dimension: chê plui grande a è di 6,6 metris e chê plui piçule e je cuasi come chê dai fulminants.
La machine che e fâs il carton e je une rotative come chê che si cjate te cjartiere di Tumieç, largje 2,5 metris,  che e fâs 80 km di carton ogni turni; stant che i turnis a son trê, a si produsin cirche 240-250 km di carton in dì.
◆ A Cjargne al è nassût il prin stabiliment, e li si cjate ancjemò a vuê la sede legâl de aziende. Tal timp a ‘nt son rivâts altris: doi a Vilès e un a Cormons, ancje se chescj a lavorin cuasi dome par Ikea. “Dopo, o vin une fabriche in Ongjarie, ma nô o vin un cuote di minorance (40%). – al conte Mario Gollino – Tai agns, la aziende e je cressude. Tal ’80 al è muart un di chei cuatri socis. Tal ’82 o vin comprât la aziende “Scatolificio Goriziano”. Tal ’88 un fûc nus à brusâts 36.000 cuintâi di cjarte, ma o vin rivât a salvâ lis machinis. Tai agns ‘90, cul colâ dal mûr di Berlin, si son vierts i paîs dal Est: o sin partîts a viodi i marcjâts di là vie… Al someave che al fos ogni ben di Diu. O ai visitât ogni fabriche di Ongjarie, Romanie, Polonie, Cechie, Bulgarie: il sisteme comunist al faseve sù une fabriche daûr di une machine, ma al jere un altri mont. O vin tacât a lavorâ ancje in Slovenie.
◆ Dopo o soi lât bande Ovest, o ai comprade une fabriche a Verbania di 31.000 metris cuadris. Mi soi dit: “Al è facil: o cjapìn il model che o vin in Friûl e lu puartìn là jù, e cussì al funzione”. Ma no vin rivât a insedâ il sisteme di lavorâ furlan, là! E cussì, o ai vendude la fabriche. O vin provât a lavorâ ancje cui spagnûi, ma no si leve dacuardi: a smiravin masse in alt!”
◆ Vuê la aziende e à cirche 260 dipendents e tra chescj tancj cjargnei: “Il nestri prodot lu fasìn dome nô – al dîs Gollino –. Un che al ven a vore chi al à di imparâ cemût lavorâ, e duncje o fasìn une cierte selezion fra nô e chei des societâts di interinâi. Cui che al jentre achì al à di passâ i diviers nivei, soredut umans (o tignìn un grum ae maniere di compuartâsi): un responsabil al devente responsabil pes sôs competencis, no parcè che al vose come un mat par fâsi rispietâ! Tal timp a son jentrâts ancje i miei fîs: Stefano, che al è il responsabil dal stabiliment di Cjargne, e Federico che al è a cjâf di chel di Vilès.”
◆ Stefano al à tacât tal ’88, e al conte: “Finide la scuele, o ai scomençât a jentrâ subit te gnove iniziative di gno pari. La mê esperience e je tacade in fabriche come ducj chei che a jentrin achì! Une maniere par cognossi il lavôr de base, sui machinaris. Graciis ae dinamicitât de aziende, il gno rûl al à simpri cambiât: di operari, planc planchin o soi rivât a lavorâ in ufici. Dal 2013 o soi tornât dongje di Vilès e o soi a Cjargne. Al jere un stabiliment un pôc restât indaûr tal so percors e duncje o ai tacât a rivisitâ un pôc chest stabiliment che al veve bisugne di jessi rinovât.”
◆ Ogni an, la Aziende e assegne aes realtâts dal teritori contribûts par cualchi desene di miâr di euros. “In ocasion dal Cincuantesim de aziende – al conte Mario – o vin volût fâ une robe fûr dal normâl: o vin pensât di donâ 300.000 euros, che a son lâts mieçs al Ospedâl di Tumieç (li che a son stâts comprâts trê machinaris destinâts a trê reparts diferents), une part al progjet dai mosaics di Çurçuvint, une part al Museu di Tumieç, e une ae glesie di Sant Roc di Glemone.” ❚