I COLÔRS E LIS FORMIS DE STORIE: UN VIAÇ INTE ART DAL FRIÛL. Luciano Ceschia jenfri lis pleis de antropologjie furlane cui colôrs dal imagjinari contadin

Ce vuelial dî colâ dentri di un cuadri, esplorâ lis penombris di un afresc,
fâ vivi une statue, sintî ce che nus conte une ancone, une miniature, une stampe? Cheste rubriche e puarte ae scuvierte des oparis di art che e je siore la Patrie,
ma lis conte dal didentri, cu la vôs dai lôr protagoniscj, intun zûc gnûf e intrigant.
Nassût a Tarcint ai 4 di Jugn dal 1926 di une famee contadine, tal principi dal 1940 Luciano Ceschia al tacave a frecuentâ la buteghe fotografiche di Cesare Turrin, artist totâl e curiôs, sperimentadôr di tecnichis e di lengaçs tant che la piture, la decorazion, e adiriture – si diseve – la alchimie. Tancj i siei mestris tal zîr di pocs agns: Salvatore Rizzi, ebanist, e Antonio Franzolini, scultôr. Internât tal 1944 in Austrie pe sô fede libertarie, daspò de liberazion si vote al moviment neorealistic. Impuartante la sô esperience jugoslave, jenfri il 1948 e il 1949, che i regale une sensibilitât gnove, un respîr internazionâl. Cheste ande e ven confermade dal so cirî contats e ancje esperiencis a Zuric, Basilee, Parîs e soredut te France meridionâl, là che al impare la tecniche antigone di ceramist.
Tal 1953, al trasforme il gabiot dai lens de sô vecje cjase di famee intun studi primitîf, cun tant di for par cuei lis oparis che i vegnin esponudis in galariis talianis impuartantis, di Milan a Pescara. La sô sperimentazion continue, la sô ricercje di stradis gnovis lu puartarà ae grande notorietât tal 1962, esponint ae XXXI Bienâl di Art Moderne di Vignesie une opare, la “Grande porta di Hiroshima”, che i vâl il premi dal Ministeri pe Industrie e pal Cumierç dal Stât talian.
Intant al disvilupe ancje une grande abilitât pitoriche e grafiche: stampis e chinis in particolâr, zuiadis sul teme de vuere e de sô crudeltât orende.
La familiaritât che al cjape cui grancj artiscj furlans dal moment – tant che Dino, Mirko e Afro Basaldella e i nomenâts architets Marcello D’Olivo, Ermes Midena, Gino Valle e Gianni Avon – lu sburte a progjetâ oparis di grandis dimensions, che a saran il so segnâl distintîf. La sô anime e je impantanade inte arzile, o intes coladis di ghise e di altris metai fondûts in leghe a formâ discs e sferis. Ma ancje la piere lu stice a scarpelâ segns che lu deliberin di ogni inclinazion realistiche o visive, lassant che la purece de forme e la potence dal materiâl a segnin la vie di une grande esplosion imagjinifiche e simboliche che e segne par simpri la sô cifre, in Friûl e tal mont.
Il so gnûf laboratori, tirat sù a Cuelalt di Tarcint su la metât dai agns ’70, al devente un lûc di discussion par poetis, inteletuâi, scritôrs e artiscj no dome furlans. Intai agns ’80, progjetant une opare narative e grafiche che e contàs la sô biografie, al tache a produsi dissens a chine e pastei colorâts che al clamarà “Il Mondo del Danubio”: zingars, Benandants, la Mari de gnot, l’Om cu lis orelis di vues a son i plui intrigants e biei, a van a sgarfâ tra lis pleis di chê antropologjie furlane e slave di confin che si alimente cui colôrs dal imagjinari contadin. Dopo vê inmaneade la sô ultime mostre sul cjistiel di Udin, Ceschia al murarà ai 4 di Novembar dal 1991. ❚
Agnul Floramo