Sfuei Mensîl Furlan Indipendent
Archivi de Patrie

I COLÔRS E LIS FORMIS DE STORIE: UN VIAÇ INTE ART DAL FRIÛL. La Gjate Marangule

............

«Ti vevi dit che usgnot si à cûr di cjatâle a torzeon pai trois dal paîs!». Cussì i veve contât la none, cuant che e jere jentrade in cjase plene di pôre e di spavent. «Mi à parut di sintîle sgnaulâ daûr dal gabiot dai lens», i rispuindè dute spaventade la frute. «Po sì, che la ludre no si contente di cualchi plume, ve! E intune gnot come cheste, la gnot dai Muarts, si discjadene di troi in troi, golose di cjar umane, specialmentri chê dai frutins come te».
Cuant che la none e contave une storie e deventave paurose. I siei voi a cjapavin come une lampade di fûc. E pûr, a Flavia i plaseve stâle a sintî intant che e contave. Une none speciâl, Catine. Vignude jù in Friûl di Pradumbli, in Val Pesarine, Cjargne profonde: un paîs là che il soreli no si lu viôt cuasi mai, e li che la nêf e ven alte plui dal colm dal cuviert. Là che vie pe vuere e veve fate la “puartadore”, cun tant di medaie. Ancje se pôc i freave a jê, de medaie e di dutis lis fufignis dai presidents o, piês, dai gjenerâi. Si veve di fâle par judâ chei biâts in trincee e si le à fate. Cussì e contave. Par lôr, mighe pal re. E fumave la pipe. E tabacave ancje. E soredut e contave. Nainis, storiis, liendis. E chê plui biele e jere propit chê de Gjate Marangule: «Me tornistu a dî, none?». La picinine si jere benzà sentade sul cussin, dongje dal fûc de stue. No coventave stiçâle masse, la vecje, par che e contàs. Che i plaseve, massime di Invier, cuant che fûr l’aiarat neri al busine, e al faseve burlâ il fûc tant che une anime danade dal Infier. Cussì, nancje cheste volte si tirà indaûr. Un çoc di len inte stue, e intant che un miâr di faliscjis si alçavin, une grampe di tabac tal fornel pe pipade e vie a cjantâle, cuinçantle di suspîrs e di vogladis: «Dal trimbulin dal mandulin, la storie de Gjate le sâstu tu?», e Flavia: «Sì che le sai», e la vecje: «Contile, dai!». E vie di gnûf: «Dal trimbulin dal mandulin…»; fin cuant che la frute, seneose di sintî la storie vere, e tacave a sustâsi: «Vonde po none, e la Gjate Marangule alore?». Al vignive daspò un cidinôr che al faseve cricâ i vues des orelis, e po dopo la vôs e lis mans de none a tacavin a dissegnâ in chel cidinôr de spiete la musate plui orende che mai si sarès podude viodi, chê de Gjate: «Rosse, come il pêl dal Boboròs; cun doi voglâts, un vert e chel altri zâl; ocjo ae code, lungje e dute intorteade, gruesse tant che la cuarde par peâ une vacje. E il pêl? Il pêl dut plen di grops e di besteutis che i corin parsore: pulçs che a bechin, pedoi che a crichin, sgarpions velenôs. Ma nuie tant trement come lis sgrifis: stuartis e neris, buinis di fâ a tocs ancje un omenat grant tant che to nono».
E intant che le contave, e meteve lis mans a forme di sgrife, e lis moveve a colp bande Flavia, dute voi e pôre. E lis ombris sul mûr si trasformavin in spirts di pôre, lizêrs e pericolôs, bogns di scuindisi dapardut, ancje sot dal jet o de poltrone. «Cuant che dute la famee, la gnot dai 31 di Otubar, si met ator de taule par preâ il rosari pes anime dai muarts, intant che il nono al cuei lis cjastinis inte fersorie e il lôr profum di bosc e di len si sfante vie pe cjase, viôt di stâ atente, frutine: al è che il moment de Gjate! Jê e cuche fûr dal barcon – e vie Flavia a cjalâ il scûr di là dal veri – e se si inacuarç che cualchi frut, invezit di preâ, al clope, o pûr al pense plui aes cjastinis che no ai muarts, ben po, jê si inacuarç e vie pe gnot e jentre in cjase par gafâlu intune bocjade!». La frute e tremave: «Ma il nono alore, che al cerce di continui la ribuele intant che al fâs saltâ la fersorie?». In chel moment il nono, che al veve sintût dut, al jentrà tabacant de puarte e, cjapant sù la picinine in braç, i disè: «Oh, viodistu ninine, il nono la sô Gjate Marangule le à cjatade tant timp fa, vie pe Cjargne. E veve la cosse su pe schene e la pipe in bocje». E riduçave la none, intant che la buere e berlave difûr, vie pe taviele. ❚
Agnul Floramo

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +