I cjarsons tipics di Corinna Gortana

Corinna Gortana, dopo de esperience dal laboratori gastronomic “Cucina di Carnia”, e à decidût, tal 2013, di cjapâ sù la ativitât di produzion di cjarsons inte vecje latarie sociâl di Dimplan. E conte: “O ai dôs liniis di prodots: une destinade ai grancj spaçs e une aes piçulis realtâts des buteghis e ristorants indulà che il cjarson al ven fat a man, cirint di mantignî lis carateristics di un timp. In chest ultin câs, il prodot al coste un pôc di plui ma al è fat e lavorât dut a man. I prodots plui piçuluts e plui economics (simpri rifinîts a man) di 8 grams, si ju cjate intes grandis cjadenis di alimentârs (Despar, Carrefour e v.i.), chei plui granduts di cirche 16 grams dal un, si ju cjate intes buteghis di nicje indulà che a son disponibii prodots tipics (in chest câs il cjarson al è come chei fats in cjase). Si cjatin in dut il Friûl. O ai clients ancje a Milan e in France.”
◆ Cuant che o fevelìn dal pastum dai cjarsons in Cjargne, a saltin fûr une schirie cence fin di recipis: ogni paîs – e al sarès miôr dî ogni famee – al à la sô ricete personâl che e previôt une infinitât di variants. In cont di chest, Corinna, stant che e à la mari di Sudri, il pari di Comelians e une none di Çurçuvint, e à pensât di meti sul marcjât dôs sortis di cjarsons: chei dolçs (che a train daûr dai comelianots) e chei salâts (che a fasin riferiment ai Cirubits, o ben a chei di Çurçuvint). In cont di chest, e dîs: “La mê recipe e je chê des mês nonis e dopo la elaborazion a devente mê parcè che o zonti alc di gno, daûr des jerbis che o cjati. Nancje i dipendents no san dut ce che o met dentri. Lis jerbis lis dosi jo e o sai dome jo cualis che o dopri. Par chel che al tocje la paste, o doprìn principalmentri aghe, farine e cartufulis. Jo o cîr simpri di spiegâ ai miei clients che la robe fondamentâl e je, une volte comprât il prodot, savêlu cuinçâ: une volte cuet te aghe, gratâ la scuete parsore e po meti la spongje ben rustide e bulinte (miôr inmò al sarès doprâ l’ont)… Clarementri, cuinçâ il cjarson cul vueli no je la stesse robe! Dongje dai cjarsons o ai altris lavorazions che o ai creât jo, une sorte di fagotuts che ur doi altris nons a seconde di ce che ur met dentri ma che no àn nuie a ce fâ cui cjarsons. Ancje li o dopri i prodots de Cjargne: formadi frant e coculis, luianie e speck, e – daûr des stagjons – ancje l’ai salvadi e urtiis.”
◆ Il laboratori di Corinna al prodûs ogni an cualchi tonelade di prodot doprant jerbis secjis e garantint cussì une conservazion di cirche 30 dîs. “Par cressi cu la aziende – e conte Corinna – al tocje vê personâl cuntune buine manualitât e che al cjapi part in maniere ative inte lavorazion artesanâl; ancje se si trate di un laboratori cuasi dut mecanizât, il prodot finâl al à di jessi fat intune cierte maniere.” Tal so laboratori a son, al moment, doi dipendents.
◆ “Jo o soi contente – e siere Corinna – di vê il gno laboratori achì in Cjargne. Svantaçs e problemis no mancjin: in mont dut al coste un pôc di plui, ma al tocje cjatâ il just compromès. A volaressin plui agjevolazions in gjenerâl par che e sedi ricognossude dute cheste fadie.
Il ricognossiment al podarès jessi une maniere par dîti:“va indenant cu la ativitât e reste in Cjargne!”. Jo a vuê no ai vût un contribût. Ma no si pues lavorâ spietant… e cussì si va indevant istès.”
◆ Par savê inmò alc: http://www.tradizionecarnia.it/chi-siamo/ ❚