Sfuei Mensîl Furlan Indipendent
Archivi de Patrie

«Friûl, une miniere di complessitât cun mil storiis di contâ!»

Dree Venier
Alessandro Ambrosino

Interviste cun Alessandro Ambrosino, zovin storic furlan di Scluse che al lavore a Gjinevre intun dai plui impuartants istitûts di studis su lis relazions internazionâls

Cun Alessandro Ambrosino, zovin storic di 30 agns, mi sint par telefon parcè che al è a stâ a Gjinevre, dulà che al lavore tant che ricercjadôr li dal Graduate Institute of International and Development Studies (IHEID), un dai plui impuartants istitûts dal mont di studis su lis relazions internazionâls. Alessandro al è di divignince di Scluse e al inizi dal liceu al è lât a stâ a Vençon. Stant che o fevelìn furlan, i domandi se a Gjinevre cualchidun al podarès pensâ che al sedi dai grisons (valadis li che si fevele la lenghe simile al furlan): «A Gjinevre o sin masse lontans di chê zone, ma intun marcjât o ai cjatât un siôr che lu fevelave e si capivisi avonde», mi dîs.
__
Sandri, cemût si devential “storic”?
La storie e je stade une mê passion fin di piçul, ma soredut no vevi passion pe matematiche (al rît ndr). Dopo des superiôrs o vevi voie di fâ la Universitât fûr dal Friûl e cussì o ai fat la “trienâl” in Storie a Bologne. Dopo però, di bon furlan, mi soi domandât se no fossin stâts studis masse teorics, su ce che o varès podût fâ dopo. Stant che mi interessave il discors dai confins, de gjestion dai teritoris, o ai fat i doi agns de lauree magjistrâl in Relazions Internazionâls (sot di Siencis politichis). Finîts i studis, o ai fat un stage dal 2017 al 2019 a Brussel li dal ufici dal Comitât European des Regjons, che mi à plasût tant. Mi plasarès propit lavorâ te aministrazion, in particolâr in Regjon, parcè che le viôt tant che un ent ancjemò dongje dai citadins, li che tu puedis fâ tant par lôr. Po dopo o ai cjatât lavôr chi che o soi, di ricercjadôr storic, a Gjinevre.
__
E in chest percors, la storie dal Friûl le âstu mai “incuintrade”? Se ti è capitât, cemût?
Une vere storie dal Friûl, ven a stâi vie pai secui, no. Dal sigûr a scuele no si studie. A mi mi è vignût alc di gno nono che mi puartave su pe mont Cjanine e mi faseve viodi i claps dal confin cu la Slovenie, e mi contave la storie di une volte, par esempli de Prime Vuere, che ancjemò cumò e je une mê passion. Le ai riscuvierte, come che al capite dispès, une volte che o jeri lontan, a studiâ a Bologne.
__
A ce covential un storic?
Ogni discors economic, politic o fintremai turistic al è imbevût di storie. A jessi banâl, ti pues coventâ te narazion di une robe. Ma ti da ancje cognossince e metodi: se un impleât aministratîf regjonâl al à studiât storie, al à une mentalitât che i permet di viodi la complessitât des robis e lis fronte miôr.
__
Mi pâr che tai articui che tu âs vût scrit tu fevelis dispès di identitât e ancje di teritoris periferics e des lôr problematichis e oportunitâts. Il fat di jessi furlan ti aial influençât?
Sigûr! Nô no si rindìn cont ma o vin un teritori unic, li che si incuintrin no dome lis trê grandis culturis di Europe – latine, todescje e slave – ma ancje jenfri di chestis componentis o vin particolaritâts di no crodi: pensìn dome al todesc, li che o vin fintremai chel arcaic di Sauris/Zhare, in plui che chel carinzian a Tarvis e in Cjanâl. Po dopo, lis variantis dal sloven, il furlan, lis fevelis venetis… O dîs simpri che un studiôs di antropologjie al podarès passâ une vite a studiâ ca, e forsit no i bastarès.
__
O vin viodût che, magari cussì no, lis minorancis a coventin a inviâ vueris…
Tantis voltis al è sucedût cussì, però jo o ai voie di viodilis tant che un puint par cognossi chel altri che al è di là dal clap.
__
Cuâl saressie la maniere miôr par comedâ lis robis? Cuâi sono i esemplis virtuôs?
Ogni confin al à lis sôs storiis e lis sôs esigjencis, anzit, ogni teritori lis à, figurìnsi une situazion come chê di confin. Duncje no esist une recipe che e va ben. Ti dîs un esempli che o ai vût studiât par une ricercje. Il confront al è fra doi teritoris che a passin di Stât daspò de Prime vuere mondiâl. In Alsazie-Lorene, che e jere stade todescje par 40 agns e che e tornave in France, l’intervent francês al è stât subit dûr: sostituzions dai dirigjents locâi, deportazion, repression. Po dopo la situazion si è bonade: tancj ju àn fats rientrâ, e si pues dî che si à cjatât un ecuilibri. Invezit in Italie, cul Sudtirôl, il Stât liberâl talian nol si è impaçât parcè che no si è interessât di chel teritori, che tant si aministravin ben. Chest nol à creât dialic, integrazion, cognossince e chest al è stât sfrutât par repressions grandis, une volte che al è lât su il fassisim. Robis che son restadis ricuart vîf e significatîf fin cumò.
__
La situazion dal Friûl, cemût le viodistu?
Jo no mi sint “furlan venit julian” ma furlan, però o dîs che o vin di doprâ il contignidôr che o vin. O pensi che il Friûl al vedi svantaçs in cheste coabitazion, rispiet al so valôr, massime cumò che cierts ecuilibris fra i teritoris che a jerin une volte a son saltâts. Ma o sin une regjon autonome e chest al è un vantaç in gjenerâl: pontìn a fâlu funzionâ miôr. A nivel istituzionâl, se al è alc di cambiâ, o resonarès su dôs provinciis autonomis (Friûl-Triest) dentri de Regjon autonome. Par intindisi ben: jo o soi pal tratut jenfri F e VJ.
__
Stant che tu sês apassionât di svilup e di svilup rurâl, ti domandi ancje cemût che tu viodis la situazion de Cjargne e de mont furlane.
No son tantis soluzions, si pues fâ cunvignis e progjets, ma ae fin chel che al covente al è une politiche fiscâl agjevolade. Il rest al ven dopo.
__
Ti ai viodût in television te trasmission di Mieli «Passato e presente» li che si fevele di storie. Cemût sêstu rivât li, e cemût ise lade: continus cualchi retrosene…
Nissune racomandazion o contat particolâr. Tal Istât dal 2019 o ai viodût in trasmission un che al jere in universitât cun me a Bologne e i ai domandât informazions. E cussì o ai mandât une mail ae redazion cui miei interès (confins, Vuere Frede, Friûl e v. i.) e mi àn clamât. Fin cumò o varai fat uns dîs pontadis.
__
No podevino clamâti pe pontade fate tal inovâl de nassite di Pasolini? A àn vût dit biei strambolots su la lenghe furlane…
Ancje jo o ai pensât che a podevin clamâmi, ma a varan judicât che si fevelave di leterature e no ancje di Friûl. No lei ai viodude. Ma se tu mi disis cussì no voi nancje a viodile, se no mi vegnin i sgrisui di fastidi! (Al rît, ndr) ❚

……………………………………………………………………………………………………………
FOCUS. Comitât European des Regjons

Il Comitât European des Regjons al è un orghin consultîf de Union Europeane e al rapresente la vôs dai ents substatâi (regjons e comuns) a nivel comunitari. Al è stât fat sù intal 1994 a Brussel de Comission Delors, che e à pontât une vore sul coinvolziment dai ents regjonâi intal procès di integrazion Europeane. I rapresentâts regjonâi a àn volût un rûl plui atîf inte vite politiche europeane, stant che plui dal 70% des politichis europeanis al à un impat a nivel locâl.
◆ Il Comitât al à 329 membris, che a vegnin di aministrazions locâls e regjonâls dai Paîs UE. Il Consei dai ministris al nomine i membris dal CdR, che a àn di jessi rapresentants elets in maniere democratiche. Cumò, il president dal CdR al è Apostolos Tzitzikostas.
◆ Il CdR al à prin di dut dôs funzions: prin di dut al da il so parê su cualsisedi legjislazion europeane che e vedi un impat su regjons e citâts (sanitât, traspuarts, energjie, politichis sociâls e di coesion). In secont plan, al promôf la democrazie de Union. Di fat, par vie che al lavore cui aministradôrs locâi che a cognossin lis esigjencis dai citadins, al ridûs la distance tra lis realtâts locâls e lis istituzions europeanis. ❚

………………………………………………………………………………………
LINK & LEAMS

Si pues lâ a viodi cualchi articul scrit di Alessandro Ambrosino sul sît www.pandorarivista.it: une riviste di filosofie, politiche, storie e atualitât che ven fûr su cjarte e online. ❚

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +