I cjamps di blave? Un desert ecologjic

Giuseppe “Bepino” Zoff: «La strade che o vin seguît par trente agns e je sbaliade.
No vin di cori daûr de produtivitât a ducj i coscj»
Giuseppe “Bepino” Zoff al à cjapât in man la aziende zootecniche di famee, a Borgnan di Cormons, juste trente agns fa. «Chi une volte a jerin ducj metadiaris de tignude di Angoris», proprietât dai conts Miani e dopo dai Locatelli, che ancjemò si viôt jentrant in paîs. I timps par fortune a son cambiâts, e il siôr Bepino nol è a metadie, ma mi fevele sentât te biele cort interne de aziende, che e funzione ancje tant che agriturisim e fatorie didatiche, gjestîts de fie Laura e dal zinar. Intant che o tabaìn, une classe di frutins de scuele de infanzie, rivade in visite, e cisiche ator di une taule.
Ma Zoff nol à tante voie di fevelâ de sô dite, che e je stade la prime aziende zootecniche biologjiche in Friûl, ma dal “maçalizi”, come che al dîs, che l’arlevament furlan al à patît in chescj trente agns. «Cuant che o ai tacât a jerin cuasi 10.000 aziendis zootecnichis in Friûl e cumò no son nancje 700. La emoragjie no je finide: si pense che o rivarìn a 200-300 aziendis. Il fat al è che no je reditivitât. Tai agns ‘90 la fuarpie dal valôr dal lat tra produtôr e consumadôr e jere dal dopli, si molzeve a 600 francs al litri cuintri dai 1.200 tal negozi; cumò al è cinc voltis: a pain il molzût a 32 centesims e in buteghe il lat al coste 1,50 euros». Ma al è dibant cirî di stâ daûr dal presit, fissât di dîs multinazionâls che a gjestissin dut il lat dal mont. Invezit, «la strade che o vin seguît par trente agns e je sbaliade. No vin di cori daûr de produtivitât a ducj i coscj. E je une altre strade: tornâ al passât».
Ancje Zoff al veve tacât in maniere convenzionâl, lant daûr des indicazions de zootecnie academiche. Ma al jere tant che no i cuadrave. «Il criteri dal arlevament convenzionâl al è “dopre-e-bute-vie”. Lis vacjis a mangjin prodots che lôr no son nassudis par mangjâ: concentrâts, insilâts di blave e soie – une volte, prime de epidemie di BSE, ancje farine di cjar… – di mût di aumentâ la masse muscolâr e la produzion di lat. A son vacjis in Canadà che a produsin 46 chilos di lat ognidune ogni dì. Lis mês a ’nt produsin 20-22. Però lis mês vacjis a fedin nûf voltis, e invezit lôr lis macelin dopo il secont part».
Cussì, ae fin dai agns ‘90 Zoff al à cambiade strade. Al à decidût di no cressi («Mi soi ponût un limit di trente vacjis, la sfide e je stade chê di restâ piçui e cuntun profit»), nol à plui doprât prodots chimics tal teren (vie i diserbants) e cambiât il mangjâ dai bovins (tal puest de blave, il fen). Ma lis vacjis a jerin selezionadis par digjerî blave, duncje cuntun rumi une vore plui grant di chel che al covente pe digjestion dal fen: «Nus son coventadis trê gjenerazions par svilupâ animâi cuntun stomi adat ae jerbe», al dîs Zoff. Al à tacât a coltâ i cjamps cul ledan, come une volte («Cualchidun si è lamentât de puce, ma bisugne cambiâ la culture de int, bisugne che la int e disi cuant che o buti, “ce profum!”, parcè che, come che al à cjantave De Andrè, “dai diamanti non nasce niente, dal letame nascono i fior’!”»). Di cinc agns, Zoff al à gjavât ancje i antibiotics, doprant invezit un licuit adizionât di cjamis baterichis, prodot de EMBio di Brunico, che al ven butât te stale e tal fen, e di li cjapât sù des vacjis. I bateris a stimolin il sisteme imunitari des vacjis, prevignint – par esempli – la mastite.
Cumò lis vacjis di Zoff, dutis Pezzata rossa (Beletade furlane), a mangjin fen par sîs mês e jerbe par chei altris sîs, cuntune integrazion di cereâi, soredut vuardi, parcè che la gjenetiche dai bovins modernis e domande, par produsi lat, un apuart di caloriis plui alt di une volte. Dutis lis vacjis a passonin almancul 60-70 dîs ad an, e i prâts a son semenâts ognidun cun dîs essencis, cul tratôr che al see dôs voltis in dì. «Il nestri grant lavôr al è curâ i prâts», al dîs Zoff, ma il lavôr al paie cul miorament des carateristichis nutrizionâls dai prodots (dut il lat di Zoff al è lavorât par fâ formadi). «Il nestri lat al à un rapuart di omega 3/omega 6 di 1 a 2, cuant che tal arlevament convenzionâl al è 1 a 6. In plui al à un valôr une vore alt di betacaroten (il precursôr de vitamine A che al da il colôr zâl al lat) e polifenôi. Insome, ce che di plui si spint tal mangjâ si lu sparagne in farmacie!».
Bandonâ la blave, tignintle pe polente e vonde, al sarès par Zoff no dome un vantaç pal benstâ dai furlans e des vacjis, ma ancje pal ambient. La gjestion atuâl de agriculture, dominade de coltivazion di blave e soie pai arlevaments, e à puartât il Friûl a jessi la regjon che e dopre plui prodots fitosanitaris: pal Rapuart nazionâl sui pesticidis tes aghis dal 2018 dal ISPRA, il 96% des nestris aghis superficiâls e l’81% di chês sot tiere e à rescj di pesticidis. «Al è dut un ecosisteme che o vin di ristabilî», al dîs Zoff. I cjamps di blave a son un desert ecologjic: «Se cualchidun mi puarte ancje dome un gri cjatât intun cjamp di blave, i doi mil euros!», al scherce. «I insets a son ridots di cent voltis; o stin pierdint la migrazion dai uciei, lis bestiis salvadiis». Ma la zootecnie e pues mantignî ambient e paisaç, a pat di fâle ben, cun politichis smiradis («Un euro pe zootecnie al vâl cent pal ambient») e aplicant lis gnovis tecnologjiis ae tradizion. «I miei plui grancj studis a son par tornâ a fâ ce che al faseve gno nono.
Ma no cul falcet!».
La aziende agricule Zoff e je in vie Parini 18, a Borgnan di Cormons (tel. 0481/67204; www.borgdaocjs.it).  ❚
Stefania Garlatti-Costa