Il ricercjadôr Stolfo: «E je une competence in plui, impuartante pai citadins, che ducj a puedin acuisî studiant»
La cognossince de lenghe furlane tant che criteri acessori di selezion intai concors publics dal compart unic regjonâl dal Friûl-Vignesie Julie? Une vie percoribile daurman e cence grues intops normatîfs: al è convint Marco Stolfo, ricercjadôr de Universitât dal Friûl e za diretôr dal Ufici regjonâl pes lenghis minoritariis.
«Il teme al è stât analizât intal grup di lavôr su la aministrazion publiche de seconde Conference regjonâl su la lenghe furlane, che si è fate a Udin a Dicembar 2017 tant che previodût de leç regjonâl 29/2007. Si sin domandâts se al sedi pussibil doprâ la cognossince de lenghe furlane (ma ancje slovene e todescje) tant che criteri almancul acessori intal ingai dai dipendents de aministrazion publiche. La rispueste e je stade positive, su la base dal Statût regjonâl in vore, calcolant l’art. 3 cu la sô gjeneriche, ma significative afermazion dal principi di avualance e di paritât di tratament di ducj i citadins, a cualsisedi grup linguistic che a apartegnin, e cu la difese des carateristichis etnichis e culturâls rispetivis; e l’art. 4 che al assegne ae Regjon potestât legjislative e competencis specifichis in merit aes aministrazions regjonâls e locâls e al stât juridic e economic dal personâl impleât. Chest aspiet al è stât ogjet di une propueste specifiche, presentade intal document finâl indreçât a Consei e Zonte, elaborât dal grup che e à fat part ancje Elena D’Orlando, juriste de Universitât dal Friûl. Almancul intal ambit dal compart unic regjonâl, o sedi lis aministrazions publichis teritoriâls, al somee pussibil, par garantî democraticitât e eficacitât, contemplâ la cognossince di une des trê lenghis di minorance (furlan, sloven, todesc) tant che criteri acessori di selezion. Par altri, alc di simil pal sloven al sucêt za, duncje al pues jessi aplicât ancje par chês altris lenghis».
__
Cuâl podaressial jessi l’ostacul?
«La eventuâl dificoltât e podarès rivuardâ lis modalitâts di ricognossiment des capacitâts linguistichis intal ambit furlan. A esistin percors formatîfs, ancjemò limitâts, ma a son, tant che i cors di lenghe furlane organizâts de Universitât dal Friûl cul finanziament de leç 482/1999, finalizâts al insegnament de lenghe furlane propit ai dipendents des aministrazions publichis. Se il Stât al concêt in maniere direte ae Universitât i fonts cun chê di incressi la cognossince de lenghe furlane intal ambit de leç 482, nol à dal sigûr tant che fin il gust dopolavoristic pûr, ma in maniere palese la formazion professionâl intes lenghis di minorance. Chest parcè che al stime che chestis a vedin di jessi dopradis de bande dai dipendents publics. Di chê altre bande, la leç 482 e je avonde clare intal segnâ la pussibilitât pai citadins di intratignî rapuarts cu lis aministrazions publichis intes 12 lenghis minoritariis elencadis dal art. 2, che tra chês a son ancje il furlan, il sloven e il todesc, pûr se cun tantis cautelis dovudis ae olme nazionaliste e centraliste dal ordenament juridic talian. Par chest, il grup di lavôr al à concludût che lis cundizions di cumò a saressin za favorevulis par un inseriment de cognossince de lenghe furlane tant che criteri acessori intai concors publics».
__
Ce pas indenant si puedino fâ in cheste direzion?
«Lis robis a deventaran tant plui claris e zovevulis cuant che al sarà ativât il percors di certificazion des competencis linguistichis par furlan, previodude de leç regjonâl 29/2007, e che su chê si à lavorât, biadelore e cun sucès, intai ultins 2 agns. Ciert al sarès plui clâr e limpi imponilu tant che criteri primari di selezion, o sedi previodi che cui che al vûl fâ il funzionari public intai 175 comuns là che e je insediade la minorance linguistiche furlane al vedi di savê lei, scrivi e fevelâ par furlan. Ma tant plui al somee amissibil stimâ che il furlan al sedi calcolât tant che une competence in plui che e permet di valutâ miôr cui che si candide par cuvierzi un puest intes aministrazions publichis, parcè che e je une competence professionâl che e covente su chest teritori. O ripet: lu previôt la leç statâl 482/1999, in atuazion dal principi fondamentâl fissât dal articul 6 de Costituzion, e a esistin finanziaments specifics pe formazion dai dipendents publics par che a disponin di competencis adeguadis intal ûs des lenghis des minorancis linguistichis storichis par comunicâ cui citadins, in forme orâl e scrite. Par altri, la 482/1999 e interesse ancje lis aministrazions statâls decentradis, che però la Regjon no à competence direte, ma che par chês e podarès fin di cumò fâ valê la sô autorevolece, metint la cuistion intal confront cul Guvier statâl».
__
Duncje ciertis cautelis a parin pardabon ecessivis…
«E somee une autocastrazion preventive che a sedin propit lis istituzions regjonâls a alimentâ chestis pôris. In fin dai conts, si trate di garantî che inte aministrazion publiche a sedin lis competencis suficientis par che al vegni metût in vore cualchi dirit segnât de Costituzion e specificât de leç 482/1999. Ancje agjitâ il fat che a son pôcs i furlans che a domandin di rapuartâsi cul Stât inte proprie lenghe no je une obiezion corete: o vin di pensâ che di 150 agns al è stât imponût un tabù su chest. Chestis competencis a van valorizadis parcè che a son essenziâls par che la funzion publiche e sedi democratiche, zovevule e no discriminatorie, in maniere coerente cun cetant che al è previodût dai principis fondamentâi dal ordenament statâl e regjonâl. No si domande une cuote di funzionaris publics che a son de minorance, ma la prevision di une presince suficiente inte plante organiche di competencis linguistichis necessariis a garantî dirits, e che cualsisedi al pues acuisîlis midiant dal studi de lenghe furlane, slovene e todescje. A son un supuest par ufrî un lavôr miôr, plui just e zovevul a vantaç de citadinance».
__
Un dai ambits là che intal setôr public si dopre di plui, intai rapuarts cul citadin, la lenghe furlane, e je la sanitât. Lui stimial, duncje, che ancje in chest câs i concors a vedin di meti il criteri preferenziâl de cognossince de marilenghe?
«La sanitât e je ancje il setôr là che a son stadis fatis lis azions promozionâls plui interessantis pal ûs dal furlan; in ogni câs, dopo un principi tant dinamic tra il 2004 e il 2009, al è stât un riflùs no dome intal cuincueni 2010-2014, là che al è stât butât il DDT su lis politichis linguistichis, ma almancul in part ancje intal periodi sucessîf, cemût che al è stât rilevât dal nestri grup di lavôr propit in ocasion de Conference regjonâl di Dicembar. Une esigjence palesade dai operadôrs de sanitât e je che la formazion intes lenghis minoritariis no dome e vedi di jessi, ma che e vedi di viodi ancje un ricognossiment in tiermins di credits dentri de formazion professionâl obligatorie dal setôr. Dal sigûr al è un pecjât no vê metût il criteri acessori de cognossince dal furlan intal concors public in at pe assunzion di centenârs di operadôrs sociosanitaris in Friûl-Vignesie Julie. La esigjence di competencis linguistichis, par cheste figure professionâl de Oss, e je ancjemò plui palpabile. Pecjât no jessisi acuarts».
__
Dal sigûr no si trate di creâ ostacui ai candidâts che a vegnin di fûr regjon… O imagjini che ancje il gnûf sisteme di certificazion de lenghe furlane al previodarà modalitâts di aprendiment eletronic cemût che al sucêt par tantis altris lenghis…
«I detais a son ancjemò di definî, ma il concet al è chest: tu puedis jessi di Cerneglons tant che di Boscotrecase in provincie di Napoli, o di Dakar in Senegal: ducj a varan la pussibilitât di fâ une formazion ricognossude e ricognossibile tant che competence zontade, che i vignarà dât un pês inte selezion parcè che cui che a ‘nt dispon al è in maniere obietive plui util intal davuelziment dal so lavôr».
__
Ciert al è che la aministrazion publiche e sarès plui stimolade se tancj plui furlans a pretindessin, cemût che za a puedin in varis ambits uficiâi, di doprâ la proprie lenghe…
«La lenghe furlane di secui e patìs une stigmatizazion negative, e chest al à creât un sens di vergogne e di tabù intal doprâle in ambits uficiâi. Cumò a son stâts ricognossiments de bande dal Stât, impuartants ma ancjemò insuficients a incidi sui compuartaments. Forsit cualchidun si è ancje “contentât”, cence reclamâ ce che al varès podût. Lis ricercjis sociolinguistichis a mostrin purpûr che e je une opinion tant favorevule al ûs public dal furlan, ancje se magari cussì no masse cidine, intant che une minorance scjassose e je simpri tant ative intal oponi ostacui ideologjics e identitaris ai dirits di cui che al fevele par furlan». ❚
Roberto Pensa
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +