“E je une biele domenie dal mês di mai, cuntun cîl celest lustrât di une buerisine dispetose che ingherdee i frescs zermois des plantis. Pal barcon viert Lenart il sint il rumôr da la pale di sô mari che e svangje intal ort. I siei ricuarts a van al dopomisdì di îr a Vile dulà che al è stât fin a tart denant di un bon tai di vin, dopo di vê fate la sô ultime lezion di furlan”.
◆ A son vincjevot contis scritis par inglês e par furlan a formâ un libri di 260 pagjinis, spartidis fra lis dôs lenghis e editât in propri. La protagoniste e je simpri la mont, descrite cun precision e atenzion ai siei colôrs, ai siei mudaments, ae sô vegjetazion. I personaçs a son tancj, in pratiche un o ancje plui di un par ognidune des contis. Ma ducj si cjatin in rimpet di une sorte di crisi esistenziâl, un moment de vite li che si scuen cjapâ decisions, sielzi une strade impen di une altre. E alore velu Sandri che al torne in mont parsore Comelians, par meti a puest la cjase viere dai vons; Milio che al cjamine cul so cjanut blanc intal bosc di Mieli; Norio che al è un dai ultins a fevelâ il ‘rigulot’; Pino che al imagjine par sô fie, paralizade di disesiet agns incà, un paradîs fat di un prât cuiet intal cidinôr da la mont; Ricart che in feriis in montagne al cjate l’amôr de vite; Bepino emigrât in Gjermanie che al brame di tornâ in Friûl, cence impensâsi che i siei fîs aromai a àn dut il lôr mont là vie; Rico che nol olse lâ a cjatâ intal ospedâl il so amì Michêl parcè che nol vûl viodilu picjât intor di une flebo e Michêl che al intuìs che la fin e je dongje e al cjate un sorte di confuart intal cjalâ pal barcon lis pichis che al à simpri tant amât.
La mont e je presinte ancje intes contis li che lis storiis piçulis di cheste int a van a intopâsi cu la storie grande, come la fin de Union Sovietiche, lis bataiis politichis de Coldiretti in Italie, la tragjedie vivude dal Friûl in timp di vuere cuant che i cosacs a jerin rivâts chenti daûr de promesse che ur vevin fate di une tiere gnove dute par lôr. Inte ultime conte, Mai molâ, un figâr muart cuindis agns indaûr al torne a butâ fûr un fiolut che cumò al è deventât une vuiscje alte scuasi cuatri metris! E al podarès sedi chest il sens di dut il libri: mai molâ la nestre montagne, la nestre culture, la nestre storie, la nestre lenghe! ❚
