Sfuei Mensîl Furlan Indipendent
Archivi de Patrie

FURLANS, DIGJITAIT FURLAN. Violin e mouse par no vê plui limits

............

Frattini cul Stradivari 3D a Rome.
Frattini cul Stradivari 3D a Rome.

Sebastiano Frattini (“Seppa” pai amîs e followers), 29 agns, polistrumentist, poliblogarin e pionîr. Chest fantat di San Pieri da Tiritori, diplomât a plen vôts tal Conservatori G. Tartini di Triest, al è stât il deus ex machina di un dai moments de nomenade cunvigne World Wide Rome, chest an sul teme “La gnove rivoluzion industriâl”.
Di pari gardiscjan, mari bisiache, nonos venits e toscans, al vîf a Triest.
Frattini al è stât il prin violinist in Italie a sunâ un dai trê esemplârs di violin Stradivari 3D. Il strument al à la particolaritât di no jessi un prodot di un mestri liutâr, ma di une stampant 3D (cost: 1 milion di dolars) che i dà la forme a un polimeri organic in forme di polvar che par solit al ven doprât te industrie aerospaziâl.  In sumis: un violin di plastiche componût di un unic toc, copie perfete di une opare dal famôs mestri cremonês Antonio Stradivari.
Sebastiano, cemût ti descrivaressistu come musicist e come utent de rêt?
“No vuei fâ pecjât di modestie, ma o crôt che par fortune il talent no mi mancji. Dut câs, o pensi che al rivi de esperience in cjamps di interès diferents. Di cuant che, di piçul, o scomençai a scoltâ no dome autôrs dai nestris agns, o a inzegnâmi cun ducj chei altris struments, nissun mi à tontonât cu la idee che pal musicist “studiât” il ben al à di jessi la musiche classiche e dut il rest al è mâl. Cussì o ai podût viazâ ancje in ambients diferents come tal jazz, blues, improvisazions e dut ce che al domande une cierte viertidure mentâl, alc che no si cjate dispès. O cîr di sperimentâ in ogni cjamp. Si met in vore il cjâf! Mi plasonone inventâ zûcs di peraulis, o fâs fotos, o ai ancje un blog fra seri e ironie e cence une smice precise a la direzion http://seppafrattinis.blogspot.com.”
Cemût sêstu rivât a vê pes mans un strument tant particolâr?
“E je une storie particoâr: in dì di vûe si fevele tant di Social Networks, figurâsi…jo sul web o soi iscrit dapardut! E graziis a Twitter o ai ricevût un retweet che al diseve: “Si cîr violinist geek par vignî a sunâ il Stradivari 3D al World Wide Rome”. Cence pensâ o ai lassât daurman i miei dâts e, in tic e tac, ai 8 di Març mi soi cjatât in svol par Rome, cussì o ai vût il privileç di jessi il prin violinist talian a sunâ il violin Stradivari stampât in 3D di bande de EOS.” A chi
Ce nus dîstu de prestazion dal Stradivari 3D?
“Al è un discors une vore tecnic. In struc, si note che il violin al pese plui o mancul une volte e mieze un strument tradizionâl, jessint fat cuntun polimeri che al à une densitât plui alte dal len di peç o aiar. Cun di plui la stampant 3D no rive ancjemò a riprodusi la microstruture dal len. Il risultât al è che il sun che al ven fûr nol è esplosîf come chel di un strument artesanâl. No sai parcè a chest strument i mancje la anime, che e je un cilindri che al met in tension la taule armoniche e il font dai violins. Il ton al è scjafoiât dal pês dal material plastic e nol rive a espandisi plui di tant, cussì e covente une vibrazion des cuardis plui fuarte par fâlu vignî fûr. Par gno cont, il Stradivari 3D al à grandis potenzialitâts, soredut se un doman si podarâ produsi struments cussì a un cost bas par fins didatics o par fâ struments eletrificâts.”
Cheste no je la prime volte che tu sês il protagonist di une piçule rivoluzion de musiche.
“Vere. O soi stât un dai prins a sperimentâ il sistema LOLA (LOw LAtency), un imprest par comunicâ a velocitât altissime traviers fibris otichis che si volarès doprâ te didatiche a distance. Un progjet dal Conservatori di Triest e dal Garr di Rome, il sisteme al pues jessi doprât adiruture par fâ concerts a distance. Tal Jugn dal 2011, jo e une coleghe, Laura Agostinelli, o vin eseguît lis Suite par 2 violins di Bela Bartók a 2700km di distance, fra Triest e Barcelone”. ■
Michele Calligaris

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +