La nassite dal rapuart tra pre Antoni e VideoTeleCarnia
A distance di cinc agns no mi pâr che pre Antoni nus vebi lassâts, parcè che no passe zornade che in cualchi maniere nol vegni alc di lui tes mans, tal pinsîr, tal passâ i siei scrits. Une presince cidine e lizere tant che une soflade di aiar.
Lu vevi sintût propit un pâr di dîs prime che al vignìs a mancjâ, e mi veve contât dai problemis di salût che lu vevin puartât di urgjence tal ospedâl in fin di vite, subit dopo Pasche. ‘Ce vûstu… o vevi sfuarçât masse. Ma o ai vude tante sodisfazion a viodi tante int tes funzions; e il gno canarin al à cjantât in glesie tant che mai…’. Nancje che al fos stât un segnâl! A Visepente, tes funzions de Setemane Sante al jere solit puartâ il so canarin par che si unìs al cjant de int. O vevin di tornâ a cjatâsi par meti dongje alc, ma Chel che dut al proviôt al veve altris dissegns…
O ai vût mût di cognossi pre Toni tal 1975, cuant che al jere plevan di Rualp e Val e Cjaluni de Plêf Mari di Sant Pieri di Cjargne: un rapuart franc, sancîr, sclet, che tal timp al è cressût in semplicitât, cun grant rispiet e gjenuine amicizie.
Un contat mantignût cun letaris, ancje cuant che par lavôr o soi stât lontan dal Friûl. Al è lui che mi à judât a capî, pas daûr pas, il valôr da mê identitât. Mi scriveve: ‘Cîr, cuant che tu tornis a cjase, in Cjargne, di no vê nissune pôre a difindi lis tôs ideis. Tu âs dome di tignî dûr… Ce vûstu, o vin tant pôc nô furlans, che se nus tirin vie ancje la lenghe e la muse e la tiere, nus reste dome il cimitieri. Par chel nus tocje scombati e mai molâ.’
Tai agns ’80, o curavi cualchi trasmission par furlan tes emitentis privadis de Cjargne; i tescj di pre Antoni, che ogni tant o presentavi, a vevin un bon acet di bande de int.
Lu informavi di chest, ma lui nol veve trope passion di concedisi ai mass media: ‘Lei tu! Lei tu!’, mi diseve. Jessint a cognossince dal lavôr culturâl che o cirivi di puartâ indevant in Cjargne, al veve gust di savê lis novitâts. Une biele dì i propon di podê regjistrâ alc par une piçule emitent cjargnele (VideoTeleCarnia, che dai prins agns ’80 a Trep e je tignude in pîts dome de passion pe nestre tiere e pe nestre int). La sô rispueste: ‘Se al è pe Cjargne no pues dî di no!’
Al è in cheste suaze che a cjapin vite diviers documents filmâts che, par chel che mi rivuarde, a àn il savôr plui di une cjacarade e di un incuintri tra amîs che di une interviste vere e proprie.
Cussì al è sucedût ancje cuant che al è jessût il libri ‘La fabriche dai predis’. Let il libri, o vevi parecjade une scjalute par no lâ tant fûr di trop, parcè che il probleme nol jere tal inviâ pre Antoni, ma tal fermâlu. Lui al jere un flum in plene, e cussì si cjatavin a cuestionâ come che si fâs in cjase, sbrissant ogni tant fûr dal troi. Lu stiçavi, te juste misure, ma il plui des voltis mi soi cjatât a fâi di spale e a condividi cun lui il so pinsîr.
Lis sôs rispuestis, prontis e imediadis, lis sôs considerazions, dongje de preparazion e de inteligjence, a palesavin passion, umanitât e sintiment; in gracie di chestis tabaiadis, la peraule di pre Antoni e jentre tes cjasis e e cjape il cûr de int.
VideoTeleCarnia di Trep, piçule presince cjargnele tal mont de informazion, e devente la cjanive privilegjade che e ten di cont il pinsîr e l’insegnament di chest predi, figure profetiche e vôs di cui che nol à vôs.
I dîs graciis a pre Antoni par chest grant regâl de sô amicizie e o sieri chest ricuart une vore personâl ripuartant un bocon di une sô letare dai 14 di Lui dal 1976: ‘Par intant, ti saludi cun afiet e ti auguri che dut ti vadi ben. Cuant che tu âs un sclip di timp, pree. No masse, dome un lamp. Ma cîr di preâ come che ti àn insegnât i tiei di cjase, che al è plui biel e al Signôr i plâs cetant di plui.’ ■
Celestino Vezzi
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +