Sfuei Mensîl Furlan Indipendent
Archivi de Patrie

AUSTRIE. I rapresentants dai grups etnics a domandin un ritîr complet dal progjet di riforme de leç di minorance

............

Daspò la conclusion dal cussì clamât compromès sul numar dai cartei bilengâi in Carinzie, il guvier al à anunciât tal Març di chest an di preparâ gnovis modifichis de leç di minorance, che cheste volte a rivuardin no dome i slovens carinzians ma dutis lis minorancis. Il centri dai grups etnics (Volksgruppenzentrum) al à rinovade la sô critiche dal progjet ae modifiche de leç nazionâl pes minorancis. Daûr il president dal centri, Marjan Pipp, no saran suficients emendaments o corezions dal prin document presentât dal guvier. Miôr, i grups etnics a domandin un ritîr complet dal progjet. «Une riforme de leç si scugnarès fâle a nivel parlamentâr e no cul segretari di stât Joseph Ostermayer, come tal câs dai cartei bilengâi in Carinzie», al à sotlineât Pipp intune conference stampe.
Mioraments necessaris tal cjamp de istruzion e dai media_ Un altri fatôr di critiche, daûr di chel che al dîs il Centri, al è che la Cancelarie federâl no à fatis buinis lis propuestis des organizazions dai grups di minorance. Tal progjet presentât dal segretari di stât no si cjate nissun miorament tal cjamp de istruzion e dai mass media. La associazion culturâl cravuate, in plui, e domande tal Burgenland l’ûs des formis bilengâls tai uficis comunâi.
Grant scandul_ Il president dal Centri e politic sloven carintian Pipp al à dineât ancjemò une volte che il progjet al sedi stât coordenât cun ducj i grups etnics, come che al voleve mostrâ il responsabil dal guvier Ostermayer ae presentazion dal progjet.
In realtât, al è stât dut ”un grant scandul”, al à dit Pipp. Josef Plank, il rapresentant dai Burgenland-ongjarês (il Burgenland al è stât fin al 1920 une provincie ongjarese) al à rimarcât che la leç in vigôr ”e je miôr a pet de propueste atuâl”.
I polacs a vuelin jessi ricognossûts tant che grup etnic_ Dal inizi dal secul XII un gran numar di fameis polachis si son stabilidis a Viene. Za tal 1860 la capitâl austriache e à 4700 abitants di lenghe polache. Lis primis organizazions rapresentativis polachis a son stadis impastanadis za tal secul XIX. La plui grande organizazion e je la Strzecha (www.strzecha.at) che e opere costantementri fin in dì di vuê (la peraule ”Strecha” e je come la slovene streha »tet«).
«O vin cirût par agns il ricognossiment tant che grup etnic», e sclarìs Barbara Pflügl-Sienkiewicz, puartevôs di Strzecha. “Purtrop, cence sucès”.
L’an passât, osservadôrs dal Consei European a àn visitât la organizazion Strzecha par informâsi su la situazion atuâl de minorance polache. «Ancje se i polacs a vivin chi di gjenerazions, lis lôr lidrîs a van indaûr ae monarchie, a son associazions che a lavorin di continui», al dîs Mikel Hubert, segretari gjenerâl dal centri grups etnics a Viene, ”e ancjemò no son ricognossûts.”
I grups etnics ricognossûts a gjoldin de protezion dal Stât, a son membris dai conseis di aministrazion dai grups etnics e a ricevin la poie finanziarie pes lôr variis ativitât, par esempli il supuart pai media, la culture e la  lenghe. ■
JANEZ ERAT

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +