SLOVENIE. Zornade ecologjiche pai nestris “cusins”

ESERCIT_ Sabide ai 24 di Març stât un esercit di volontaris al à invadût la Slovenie, dal mâr Adriatic fin al confin cu la Ongjarie e fin sù, da pît des Alps. Cui jerino? Cuâl isal stât il lôr intindiment? A decidi di passâ fûr cjase une biele sabide di soreli sul tacâ de Vierte a son stâts miârs di oms e di feminis di ogni etât, di scuelârs e di universitaris, di pensionâts e di disocupâts. Ducj chescj volontaris a àn vût une finalitât une vore valide, sigurant cussì ancje chest an un sucès grandonon ae iniziative Očistimo Slovenijo (Netìn la Slovenie).
Nassude tal 2010 te suaze de azion Clean up the world (Netìn il mont), inmaneade de Onu pe prime volte tal 1993, Očistimo Slovenijo e ven prontade une volte par an di bande de associazion Ekologi brez meja (Ecologjiscj cence confins), socie cun sede a Lubiane (sît internet: http://ebm.si, dome par sloven). A nivel internazionâl, a saran in dut 85 i paîs li che dentri dal prossim Setembar si tignarà une iniziative compagne.
PARTECIPAZION_ Cuâi sono stâts i numars de edizion 2012 di cheste che e je stade declarade “la plui grande iniziative pe racuelte des scovacis mai fate in Slovenie”? Si stime che i volontaris a sedin stâts uns 250 mil di lôr: une cifre no di pôc, tignint cont che la Slovenie e à dome 2 milions 50 mil abitants. Chest al vûl di plui dal 12 par cent de popolazion totâl, cuntune cuote record tocjade tal comun di Radenci, dongje Murska Sobota (al confin cu la Ongjarie), adiriture cul 48 par cent. I comuns che a àn dât la lôr adesion a son stâts 207, dome cuatri aministrazions no àn furnît nissun jutori pe buine riessude de iniziative.
PROMOZION_ Il prin obietîf di Očistimo Slovenijo al è stât chel di cjapâ sù plui scovacis pussibil: si calcole che ‘ndi son stadis ingrumadis adun uns 10 mil toneladis. Un risultât ecezionâl, stant che i volontaris a àn lavorât dome par cinc oris, des 9 di buinore fin aes 2 dal dopomisdì. La organizazion e je stade pardabon ben studiade. Tai mês passâts e je stade fate une vore di publicitât par informâ su chest apontament: a son desenis i mieçs di comunicazion (gjornâi, televisions, radios, ancje sîts internet) che a àn sostignût la iniziative. In plui, diviers personaçs de culture slovene a àn dât la lôr poie: jenfri chescj Vlado Kreslin, cjantautôr une vore innomenât, che al à prestât une sô cjançon tant che imni di Očistimo Slovenijo 2012. Tune foto te pagjine o viodês che ancje il president de Republiche Danilo Türk al è stât a pro de manifestazion.
LA RACUELTE_ I volontaris a vevin di cjatâsi tai puescj stabilîts. Par cjapâ sù lis scovacis a àn vût a disposizion milions di sacs di pueste di 5 colôrs diviers: zâl, blu, neri, vert e ros. In chei di colôr zâl e blu e je lade la plastiche: in chei zâi butiliis, imbalaçs varis, sacuts e tetrapak, in chei blu seglots e cjadreis di plastiche. In chei di colôr neri ceramiche, polistirûl, tiessûts, cd, veris di machine, panolins. In chei verts invezit dome veri, ma no spiei. In ultin, ta chei di colôr ros a son stâts metûts toners, batariis, telefons celulârs, cartucjis, contignidôrs di vuelis e di vernîs, medisinis. In câs che si fossin cjatâts materiâi pericolôs tant che amiant o esplosîfs, la indicazion e jere chê di lassâju li che a jerin e visâ daurman i organizadôrs de iniziative. Par esempli, dongje Tolmin a son stadis cjatadis dôs granadis no esplodudis de Vuere Grande: i artificîrs, clamâts di pueste, si son ocupâts di lôr daurman. Refudums plui grancj tant che gomis di machine o camion, mobii, eletrodomestics a son stâts ingrumâts dongje dai sacs tai puescj indicâts.
REGJISTRI_ La cuantitât totâl di scovacis tirade dongje chest an e pâr jessi mancul di chê dai agns passâts: segnâl che la campagne pal rispiet dal ambient e sta dant i siei bogns efiets. Par difindisi inmò miôr di chei che no vuelin tratâ la lôr tiere cemût che e merte, al è stât tirât dongje il prin regjistri informatic dai sîts li che in dut il paîs a son stâts lassâts refudums in maniere no legâl.
SPARAGN_ Secont la socie Ekologi brez meja, Očistimo Slovenijo (sît internet: www.ocistimo.si, par sloven e par inglês) e à permetût di fâ un lavôr di pulizie che al Stât i varès vignût a costâ uns 14 milions di euros. Par tirâ dongje un franc, la associazion organizadore e vent sul so sît maiutis e sportis di tele cul logo de iniziative. ■
ALESSIO POTOCCO