Sfuei Mensîl Furlan Indipendent
Archivi de Patrie

FURLANS, DIGJITAIT FURLAN – LICÔF. I furlans a digjitin furlan

Giorgio Jannis
I risultâts di une rilevazion a confermin un trend positîf, ma al è inmò cualchi probleme

Ai doi di Mai passâts, un comunicât de agjenzie gjornalistiche ANSA al ripuartave i dâts di une rilevazion Audiweb-Nielsen, che nus indiche tant che la regjon di Italie cu la cuote plui grande di utents atîfs su Internet in relazion ae popolazion. Trê personis su dîs che a son a stâ in Friûl-V.J. a frecuentin in maniere ative la Rêt te zornade medie, e chest nus met ai vertiçs nazionâi te classifiche des regjons conetudis. Sigûr, a son chei che sul web a lavorin e che a son conetûts dut il timp, e chei che magari a controlin dome la pueste eletroniche o pûr che a rispuindin a une batude su Facebook, ma l’impuartant al è che chest al sucedi cuotidianementri, segnâl che la frecuentazion de Rêt e je deventade un fenomen “normâl”, une abitudin, une pratiche sociâl come il lâ a fâ la spese o il comprâ il gjornâl in edicule.
Cun di plui, si à ancje di tegnî presint che in Regjon a son a vuê largjis zonis li che no rive la ADSL, dulà che i citadins a patissin i discomuts dal digital divide, di intindi plui tant che spartiaghis digjitâl che come divari, stant che concretementri cheste disparitât di tratament te fruizion di Internet e impedìs a tancj di esercitâ chel dirit al acès che o volaressin viodi garantît par leç.
A Tavagnà al è un Distret tecnologjic dedicât ae inovazion tai setôrs dal digjitâl e des  telecomunicazions, e pûr in maniere paradossâl la part bande nord dal Comun no à colegament ADSL.
Tancj paîs de Basse, nocate che tai agns si sedi provât a realizâ conetivitât midiant ondis radio, a patissin a vuê une pessime cualitât de conession, obleant i citadins a indotâsi di clavutis ADSL ufiertis dai operadôrs di telefonie mobile, plui costosis e mancul eficientis rispiet a une rêt fisse operante su lis liniis telefonichis (vuê sul doplin di ram, doman si spere su fibre otiche).
Di tancj agns o combatìn cuintri il digital divide. Si puedin puartâ argomentazions di nature economiche (il setôr de Tecnologjie de Informazion e de Comuncazion vuê al vâl cuasi il 10% de economie europeane, in tiermins di PIL e di ricjadudis ocupazionâls), o pûr dal pont di viste etic si puedin meti in lûs i dirits dai Citadins al acès ae informazion.
Di sigûr, coneti in maniere decente  dut il teritori al varès di jessi une prioritât assolude des politichis regjonâls dai prossims trê agns, par une cuistion di civiltât.
Giorgio Jannis

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +