Sfuei Mensîl Furlan Indipendent
Archivi de Patrie

FURLANS, DIGJITAIT FURLAN – LICÔF. Gjestî la reputazion

Giorgio Jannis
La rêt ti judiche…

Aromai lu vin capît: la rêt Internet e je une robe cjalde. e unìs dal sigûr tra di lôr milions di computers, ma al è facil capî cemût che chestis machinis fredis no vedin po tant di contâsi. Chei invezit ce che a fevelin cence fermâsi o sin nô umans, di simpri. A planc lis rêts relazionâls a àn vude visibilitât publiche, cumò al esist il web sociâl, e lis conversazions si instrecin cence padin. Ducj a puedin lei e partecipâ al dialic public dai amîs e cognossintis, o replicâ ae aziende o ae aministrazion publiche che e prepare sul web il discors di se.
Insiemi cu la nestre peraule e ven sù ancje la nestre identitât, il mût che o sin percepîts e judicâts.
Di conseguence, o viodìn vignî sù i valôrs umans colegâts al fâ comunicatîf dai individuis o dai grups sociâi: lis tematichis relativis ae fiducie (par esempli il credit che o sin disponûts a concedi aes testadis gjornalistichis presintis in Rêt) o la innomine che ognidun di nô al pues svantâ dentri des centis sociâls di partecipazion e duncje di apartignince.
SOGJETS INFLUENTS_ La “Reputation” o “Innomine” in particolâr e je intai ultins timps un argoment tant tratât sul web, sedi su lis sferis di influence ample di cierts leaders di opinion o di ciertis fonts informativis, sedi in tiermins plui leâts a strent al concet di credibilitât, vâl a dî cemût che o sin judicâts intal nestri dî personâl. La innomine e podarès jessi capide tant che une sorte di rapresentazion de nestre identitât digjitâl (e no dome; la distinzion tra mont reâl e online e je daûr a pierdi simpri plui significât) che e devente pussibil misurâ e valutâ.
Se lis nestris segnalazions publicadis sui blog, su Twitter o su Facebook a vegnin preseadis, comentadis e ricjapadis di tancj, salacor o sin “influents”, e vuê a esistin servizis web in stât di misurâ la entitât de nestre innomine, segnant la influence che lis nestris peraulis a àn vût sul network sociâl. Si trate di struments online che a van dal sempliç mostrâ i lûcs dulà che plui o sin a stâ (tant che 123people, Naymz, Sociâl Mention, o lis aromai vecjis e passadis “classifichis” dai blog plui famôs) fin a servizis plui complicâts, come par esempli Klout, che al smire a fissâ il grât di coinvolziment e di credit che o vin savût vuadagnâsi sul web sociâl.
SINGUI E AZIENDIS_ Chel de innomine nol è un discors che al rivuarde dome i individuis singui. Se fin a îr une aziende e consultave une agjenzie web par otignî une miôr visibilitât sui motôrs di ricercje (par inglês, SEO: Search Engine Optimization), cumò si à capît cemût che e sedi cetant impuartant vê une buine innomine de proprie marcje, e propri la brand reputation e je l’argoment cjalt che ducj a son daûr a fevelâ, cirint di jessi autorevui o di vuadagnâ autorevolece. Parcè che pierdi la muse, intal mont fisic tant che in chel digjitâl, al è il berdei piês par cui che al vûl jessi crodibil.
Giorgio Jannis

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +