CULTURE – Si è impiât il Cormôr

L’Istât dai furlans e a tacât a sunâ. Dal Parc dal Cormôr di Udin si spandin lis sonoritâts dal Homepage Festival. Un grant contignidôr culturâl, artistic e musicâl, che dai 20 Mai ai 26 Avost pal cuart an di file (cun plui di 25mil presincis tal 2010) al scjalde i nestris vinars di Istât; il dut a jentrade libare. Te suaze verde dal Cormôr si cjatin i grant artiscj internazionâi, come Robert Miles (alias Roberto Concina di Feagne), che al àviert la manifestazion; la musiche taliane cui Linea 77 (15 Lui), i Statuto (22 Lui) e il bassista Saturnino (29 Lui), par nomenâ dome cualchidun. E po a son i Mellow Mood (1 Lui) e i Playa Desnuda (5 Avost): grups forescj dome tal non che a son daûr a vê sucès fûr di Patrie. Ma cjalant il program (www.homepagefestival.com), si viôt dome un grup furlan che al cjante par furlan, i cjargnei Carnicats. Dut ca, par un festival nassût in Friûl e organizât di furlans? «Dongje di cheste ufierte e je une interie serade, ai 19 di Avost, dedicate ae musiche par ffurlan: ta cheste edizion o vin decidût di ospitâ la finâl dal Premi Friûl in colaborazion cun Radio Onde Furlane», a sclarissin de organizazion, «cheste nus somee une ocasion par dimostrâ che o sin di simpri vierts ae tutele de lenghe». In efiet l’interès al è, l’an passât o vin viodût il teatri in lenghe furlane di Dino Persello, cul spetacul “Voe di contâus!”, sostignût di bande de ARLeF. Ma chest an, cul Premi Friûl al Cormôr (scjadince ai 15 di Lui, www.ondefurlane.eu/premi-friul-2011), l’Homepage Festival al devente pardabon plui furlan…
Natascia Gargano