Sfuei Mensîl Furlan Indipendent
Archivi de Patrie

FRIÛL EUROPE. Un Friûl diferent e une Europe divierse

............

La crisi de Europe dai stâts nazionâi e va ancjemò indenant. Al somee che a Bruxelles e tes diviersis capitâls dai stâts che a fasin part de Union Europeane (UE) no vedin capît la lezion che e je rivade dal referendum su la cussì clamade Brexit, dal mês di Jugn di chest an.
Si varès di cambiâ strade, inte direzion di une UE plui unide, plui europeane e soredut plui democratiche, cun plui podês pal Parlament european, cuntun guvier de Europe che si fondi suntune maiorance politiche tes aulis di Strasburc e di Bruxelles cun plui podês ancje pes articolazions teritoriâls dentri dai stâts e cu la creazion di agregazions teritoriâls che a passin i confins statâi di cumò (se di no al è dibant fevelâ cussì tant di Euroregjons). E impen la tendence intergovernative e cres simpri plui e cun chê ancje lis barufis, la ande tecnocratiche dai uficis de Comission e la propagande nazionaliste fate a nivel statâl de bande dai guviers ancjemò prime che dai partîts.
L’ultin mês e mieç al è stât segnât, par esempli, dal braç di fier tra il guvier talian e la Comission europeane. Al moment di lâ in stampe no savìn ancjemò cemût che e larà a finîle: se lis dôs part a cjataran un pont di incuintri, magari dopo des gnovis scjassadis di taramot che a àn sacodât la Italie centrâl, o ben se a laran dilunc a scambiâsi declarazions (pen)ultimativis… Ce che al somee clâr al è la funzion propagandistiche di cheste situazion, inte clime di campagne eletorâl permanente che si cjatisi za di un pôc di timp incà. Al somearès cuasit che in realtât Rome e Bruxelles un acuardi lu varessin za fat: chel di lâ dilunc cun cheste tragjicomedie.
Cun di fat, tai moments di crisi nol è nuie di miôr che vê un nemî, calcolât tant che «esterni» e «forest», o miôr ancjemò doi di lôr: di une bande «la Europe» e di chê altre «i imigrâts».
Chestis dôs cjartis lis à zuiadis cun determinazion fuartonone il guvier ongjarês cul referendum cuintri des cuotis di ripartizion tra i stâts de UE dai migrants e di chei che a domandin asîl. Al premier nazionalist e conservadôr Viktor Orban, però, i à lade strucje: di une bande a àn votât cemût che al voleve lui il 98% di chei che a jerin lâts aes urnis, ma di chê altre a son lâts a votâ dome il 43% di chei che a vevin dirit di fâlu e duncje nuie quorum e referendum anulât. Evidentementri ancje in Ongjarie la maiorance de int e à mostrât di no crodi masse ae pôre de Europe e a chê dai imigrâts che ur plasin cussì tant ai siei sorestants.
Il risultât dal referendum ongjarês si pues calcolâlu une buine gnove pe Europe. Chel istès al vâl pe iniziative dal Parlament regjonâl de Valonie di fâi cuintri ae ratifiche de bande dal guvier de Belgjiche dal acuardi comerciâl CETA tra UE e Canada. Il vôt dai 10 di Otubar al è stât calcolât tant che un at cuintri de Europe, une decision localiste e un pericul pe UE compagn de Brexit. Nissun che si vedi domandât se impen la sielte dai deputâts de regjon francofone no fos propit a pro de Europe, in difese di chei dirits dai lavorents e dai consumadôrs che a varessin di jessi un dai standards europeans. Magari cussì no, ae fn dal mês passât chel stes Parlament al à cambiât idee, dopo di une tratative a nivel statâl e european: il dubi al è che nol vedi rivât a otignî alc e ce e che al sedi stât libar di scugnî molâ.
Che e coventi une Europe plui Europe, là che a valin di plui lis personis, i lôr dirits e lis comunitâts teritoriâls e mancul i afariscj, i prepotents e i stâts nazionâi di cumò, imbombâts di fanatisim tes peraulis e tai fats, al ven marcât di un document dât fûr ai 21 di Otubar de bande dal grup di elaborazion politiche Un Friûl Diferent che al fevele propit de crisi dal stât nazionâl, de tendence centraliste che e je la sostance principâl de ipotetiche riforme costituzionâl taliane argoment dal referewndum dai 4 di Dicembar e de Europe che e je e di chê che e mancje (http://www.unfriuldiferent.eu/wp-content/uploads/2016/10/fin_stat_nazional.pdf).
Tant a dî: plui Friûl e plui Europe e un Friûl diferent par une Europe divierse (e viceversa). ❚
Marco Stolfo

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +