FRIÛL EUROPE. Tra il PE e il NPLD. Gnovis, domandis e prospetivis

Si vierç la gnove legjislature dal Parlament european (PE) e la regjon Friûl-VJ e cjate un gnûf eurodeputât. Cun di fat, dongje di Isabella De Monte, al sarà ancje un altri europarlamentâr espression de comunitât territoriâl che e ten dongje il Friûl e Triest: al è Marco Zullo dal M5S, che al è a stâ a Cjons e al à vuadagnât un puest tal PE dopo di une verifiche dal numar des preferencis cjapadis dai diviers candidâts de sô liste.
Tal moment che o sin daûr a lâ in stampe no savìn ancjemò cemût che si compuartarà il PE in ocasion de elezion dal president de Comission europeane. I guviers dai Vincjevot si àn cjatâts adun ator dal non di Jean Claude Juncker (PPE), ancje se il britanic David Cameron al è cuintri. Tal moment che o lin in stampe il Parlament european nol à ancjemò esprimût lis sôs posizions. La prospetive probabile e je chê di une “Grosse Koalition” che e promet un tic plui di dinamisim in cjamp economic e sociâl: no dome rigôr e austeritât, ma ancje cressite e disvilup. Dome promessis?
Un dât sigûr che al rive dal cûr de Europe al tocje la delegazion dai eurodeputâts nazionalitaris e regjonaliscj progressiscj de Aliance Libare Europeane (ALE) che e à sielzût il so president: al è il filosof catalan Josep-Maria Terricabras, elet te liste “L’Esquerra pel Dret a Decidir”, coalizion indipendentiste di çampe vuidade di Esquerra Republicana de Catalunya (ERC). I doi vicepresidents a son la galese Jill Evans dal Plaid Cymru e il scozês Ian Hudghton dal SNP. Terricabras al sarà ancje vice dal grup parlamentâr ALE-Verts.
Intant che, cu la viertidure dai sîs mês de presidence taliane de Union Europeane, il guvier di Rome al promet di puartâ «plui Italie in Europe»…, un pôc di Friûl al va in Europe cun chê di puartâ plui Europe in Friûl e a Triest. Ai 6 di Jugn, a Ljouwert in Frisie, si à davuelte la assemblee anuâl dal NPLD, il network pe promozion de diversitât linguistiche in Europe. Cu la partecipazion dal conseîr regjonâl Cristiano Shaurli e dal president de ARLeF Lorenzo Fabbro e je stade perfezionade la partecipazion dal Consei regjonâl dal Friûl-VJ ta chê rêt di istituzions e di organizazions che la lôr strategjie e calcole lenghis, dirits e politichis linguistichis tant che fondis di disvilup culturâl, sociâl, civic e economic par ducj. Une strategjie europeane. ❚
✒ Marco Stolfo