“O vin di difindi ce che o podìn difindi intun procès di centralisim come chel che al è in at, ma la domande di fonde e je: di cuale specialitât vino dibisugne”?
Giorgio Cavallo, storic autonomist, bielzà assessôr cul guvier Cecotti de citât di Udin e president di Legambiente, al continue a tignî un grum di voli lis dinamichis politichis istituzionâls che a rivuardin il Friûl e la Regjon, tant plui cumò che il Guvier di Matteo Renzi al à decidût di mudâ di gnûf il Titul V de Costituzion, il Senât e la leç eletorâl.
Riformis che lui al viôt tant che blecs di un progjet plui larc e centralistic e jenfri chestis riformis nol viôt ancjemò a clâr se “o puartarìn a cjase risultâts pal Friûl-VJ o pe sô presidente”, al dîs Cavallo, zontant che se al sarà il secont câs a saran risultâts “su robis margjinâls”.
Se la croniche e consee di no jentrâ tal specific de riforme dal Titul V, par vie che la materie e va fasintsi biel che si scrîf e duncje a podaressin jessi mudaments, dut câs Cavallo al met in lûs mancjancis claris e che dificilmentri a vignaran cuviertis ancje dilunc il cors parlamentâr dal provediment. “Lis cuistions di fonde che a caraterizin la diviersitât dal Friûl-VJ – al dîs – no rapresentin un spazi di competence ricognossût e praticât de Regjon, ma a dipendin in forme esorbitant di sieltis statâls: la complesse situazion nazionâl-linguistiche dai siei abitants, la necessitât di governâ il so teritori in conession e confront cui Stâts confinants. Parfin il sistem dai ents locâi, che su la cjarte la sô organizazion e je materie primarie in cont de Regjon, “in chescj agns a cause dai riflès finanziaris e sta deventant un spazi esclusîf dal gnûf centralisim statâl”.
Crisi, al continue Cavallo, ancje pes funzions di “stimul tai confronts dai setôrs economics e produtîfs. La Regjon – al sosten – no je rivade a vuidâ une organizazion dal credit che e fos buine di rispuindi cun velocitât ai alts e bas simpri plui frecuents dai ciclis economics”.
Te sô leture l’ex aministradôr al considere “aprossimât” il “guvier dal teritori” dulà che la Regjon e a cirût di misurâsi tai ultins 15-20 agns. Un mût di procedi “azardôs” che “la storie de urbanistiche, de pupilance dal paesaç e de nature, dai traspuarts publics e de inovazion energjetiche e dimostre”.
Insom il judizi di Cavallo nol fâs nancje un pôc di scont a chei che a àn vût il guvier de Regjon. “Il decadiment de pratiche di guvier dal Friûl-VJ – al dîs – nol lasse vuê cetant spazi di credibilitât sui temis classics de specialitât. No cate dutis lis polemichis, là che ancjemò se gjavìn al è te sanitât”. Si podarà rivâ ancje a altris acuardis pe gjestion di braçs de aministrazion publiche, “ma cheste e je une robe diferente rispiet ae specialitât”.
Une specialitât che vuê si cîr di difindi cul fat di “jessi bogns di ministrâ in forme eficient e di fâ sieltis che a van ancje a pro dal Stât”. Dôs motivazions che Cavallo al considere “dignitosis” ma che “a àn il difiet di domandâ un just federalisim che al vâl par dutis lis regjons e purtrop si confrontìn cuntune culture politiche gjeneralizade che e va te bande contrarie”.
Ma, inalore, coventie ancjemò la specialitât e se sì cemût fâ par rinfuarcîle?
Te suaze di “un lâ a mont de sovranitât dal Stât talian”, Cavallo al riten che la specialitât e je “l’imprest necessari par che realtâts come il Friûl e Triest a puedin gjestît come che al covente lis lôr diferencis economichis, sociâls, culturâls e gjeopolitichis”. Ma se lis competencis necessariis no son plui te disponibilitât de Regjon, “inalore tocje davierzi une dialetiche cul Stât”. E je propit “la volontât di ridusi la grandonone machine statâl che e varès di sburtâ vuê il Stât centrâl a dâ funzions particolârs al nivel teritoriâl plui adeguât”.
Dut chest, te vision di Cavallo, al volarès dî rivâ a fâsi dâ dal Stât “competencis su minorancis e rapuarts confinaris e par podê gjestî ce che chestis funzions a compuartin bisognarès vê ancje scuele, ents locâi, guvier dal teritori, protezion dal ambient e paesaç”.
A cui afidâsi par puartâ a cjase i risultâts? Cavallo nol pâr dâ masse credit ae azion che a podaran rivâ a fâ i partîts e la lôr politiche. Pluitost al pense a chês fuarcis civîls che no son disponibilis a une altre ete dulà che il “Friûl al sei dome une colonie dal Stât talian”. ❚
Antonella Lanfrit
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +