«Indenant cun progjets struturâts par frontâ lis fragjilitâts sociâls». Al è l’indreçament dât dal president de Fondazione Friuli Giuseppe Morandini in ocasion de presentazion resinte dal bant welfare che chest an al metarà a disposizion dal teritori 600 mil euros. Il bant, presentât te sede de Fondazione Friuli in vie Manin a Udin ae presince dal vice president de Regjon Riccardo Riccardi, Rudi Adami di Intesa San Paolo e Ranieri Zuttion de direzion regjonâl pe integrazion sociosanitarie, al è finalizât a sostignî progjets destinâts a personis anzianis no autosuficientis, a minôrs in cundizion di disasi, a personis cun disabilitât psicofisiche, ma ancje a intervents inovatîfs pe domiciliaritât midiant di sistemis di telemonitorament e teleassistence. «O vin orientât i invistiments – al à dit Morandini ai referents teritoriâls presints ae presentazion dal bant – su la fonde des prioritâts che o vês dât voaltris. A son stâts za inviâts progjets che a coinvolzin plui Comuns: al vûl dî che o stin lant incuintri aes comunitâts». Morandini al à vût ancje iniment il bant pal restaur, che in graciis di chel a son stâts fats 16 intervents di ristruturazion di edificis po doprâts par finalitâts sociâls: «Il pont – al à dit Zuttion – al è svilupâ un welfare fondât su la interdipendence dulà che nissun si salve di bessôl. La colaborazion publiche e privade e je un procès in stât di realizâ infrastruturis sociâls che a dedin valôr aes relazions». Tai ultins doi agns, il bant welfare de Fondazione Friuli al à za dât fûr 1 milion e 46 mil euros che a àn produsût invistiments par 3 milions e 986 mil euros, cun in dut 64 progjets puartâts indenant.
Ancje l’assessôr Riccardi al à preseât chescj risultâts: «A son esperiencis – al à dit – rivadis prime dal sisteme istituzionâl: o vin di visâsi che la sanitât e je dome un toc de salût, no si risolf dut in ospedâl. Un dai impegns pal 2020 al è chel di lâ indenant cul acreditament di chestis realtâts cirint di coinvolzi ancje lis personis che a àn svantaçs, par vie che no si po resonâ di problemis di cheste fate cu la logiche dal massim ribàs. Si trate di un confront che o varìn di fâ ancje cul Stât che al podarès refudâ cheste nestre idee, ma o vin di combati ancje cheste bataie».
Il tiermin par presentâ lis domandis al è fissât ai 28 di Fevrâr. Il modul si pues cjatâ sul sît www.fondazionefriuli.it ❚