FIESTE DAL FRIÛL. Preiere dai 3 di Avrîl

Diu Pari
che tu âs creade
la imensitât dal mont,
che tu âs mandât Ermacure
a implantâ la tô Glesie
su lis maseriis di Aquilee
parcè che e pandi la tô lûs
ai todescs, ai slâfs e ai furlans,
fanus vivi
come fradis
te nestre Patrie.
Signôr,
che Tu âs a cjâr
il nestri vivi,
fâs che o podedin
onorâti a dilunc,
su la olme di Marc,
di Ilari e Tazian,
di Eufemie e Dorotee,
di Cromazi,
di Paulin e di Beltram,
di Marc di Davian
e di Luîs Scrosop,
semenant vie pal mont
la gjonde di jessi furlans
e di jessi bandiere de nestre tiere.
Spirt di Diu
danus la fuarce di tignî cont lis nestris lidrîs, no par jemplâsi di superbie ma par savê cui che o sin, di dulà che o vignìn e indulà che o podìn lâ, par fâ incressi l’amôr jenfri ducj i popui.
Madone di Mont,
di Barbane, dal Lussari,
Madone di dutis lis glesiis dal Friûl,
gale des nestris fameiis,
dai nestris viei,
dai nestris fruts,
de nestre int.
Inte lenghe mari
e je la nestre preiere.
E come la mari
e je che fortunade creature
che e puarte tal so grim
la samence de vite,
cussì la lenghe
e je la samence dai popui.
Che la nestre preiere
e rivi tal DI
tant che il cjant armoniôs
dai furlans.
Amen.
Redazion