IL FERÂL. I dîs de memorie

Il mês di Mai, pai furlans, prime che al mês dal rosari e a la madone, al puarte il pinsîr al taramot. 6 di Mai e reste une date storiche pe nestre tiere e pal nestri popul. E segne il prin e il dopo. Par tantis resons il Friûl di prime nol è stât il Friûl di dopo, tal ben e tal mâl, in chel che al è deventât miôr e in chel che al è deventât piês. Ripensâ al è dovê, e je necessitât, par no dismenteâ e par lâ indenant. Chescj pinsîrs di pre Antoni scrits tal 1996 a 20 agns de grande scjassade, o pensi che nus fasin propit ben.
pre Roman Michelotti
“Mil agns pai tiei voi a son come la zornade di îr, biel passade, o tant che vie pe gnot une volte di vuaite” (Sal 90, 4). In cheste unitât divine di misure dal timp, i vincj agns dal taramot dal 6 di Mai a son duncje un lamp, come chel lamp trement, cence fin, che al à spacade une tiere, sfruçonade une ricjece milenarie, dividude une storie, segnade une gjenerazion. Al sarès za un regâl e une consolazion rivâ a cjalâ chest moment dramatic e mistereôs cul voli di Diu, par vê un voli plui alt, slargjât, relatîf.
O met tes mans di Diu i mil e passe fradis che in chê gnot a àn viodude cjonçade la glagn de lôr vite, soredut chei che a varessin vût dut dirit di vivi. Parcè lôr o no nô? O met tes sôs mans ancje chel numar impressionant di personis, soredut anzianis e dibessolis, che a àn rivât saltâ fûr de tragjedie cul cuarp ma che a àn lassade sot des maseriis la voie di vivi e a son coladis come fueis di un arbul scjassât cun masse viamence.
O met tes mans di Diu ancje chei che, tal moment de confusion, a àn spesseât a meti a salvament il tacuin e la robe, lassant che lis ruspis a puartassin vie il rest. Ancje lôr, che siguramentri a son legjon, in chê gnot a àn cognossude la muart, chê de anime. No ur fâs predicjis. O varès di fâure a di chei che a jerin paiâts e a vevin il compit di judâ la int a capî che il tacuin e la cjase no valin plui de culture, de religjon e de memorie.
Te vore inmense de ricostruzion che, cu lis sôs ombris inevitabilis, e à metût in lûs ancjemò une volte la fuarce morâl, la laboriositât, l’inzegn e la “rabie” di un popul cognossût soredut pe rassegnazion, o laudi il Signôr pal tant che al è stât fat in timp relativamentri curt. Une pagjine di storie positive, soredut pe partecipazion des comunitâts, pe volontât corâl di compagnâ la ricostruzion matereâl cuntun ben inrinunciabil come la universitât. E podeve jessi plui biele se, dongje dai miliarts, al fos rivât il contribût di ideis e di progjets plui rispietôs de nestre identitât. Ancje il brut al coste.
A conferme de veretât bibliche che ogni robe e à dôs musis, cualchidun al à rivât a cjatâ, framieç des maseriis, la muse disfigurade ma autentiche de nestre culture native. A son vignûts fûr spetacui di cjasis, di borcs, di glesiis che a restaran a testemoneance benedete di une sielte inteligjente. No fâs nons, ma i spiei a son sot i vôi di ducj e ducj a vegnin a cjalâju. Cualchidun invezit, ministradôr e predi, no i à parût vêr di aprofitâ de disgracie par fâ sparî ogni segnâl di colegament cul passât. Par manìis di grandece, par ignorance imperdonabil, par stupide inlusion di modernitât, e restarà tai secui la testemoneance pesante, incancelabil, di une sielte disgraciade. No si pues zontâ mâl a mâl, dam a dam. No fâs nons, ma ancje il plui vuarp si inacuarç dai scandui di certs edificis gleseastics e civîi.
No mi sint fâ cuintriposizions fra ricostruzion “morâl” e “matereâl”. Un popul che al dà sot al à une sô fuarce morâl. Si trate di slargjâ cheste positivitât a dute l’estension dal vivi. Tant plui che la spiritualitât e la civiltât a son simpri in ricostruzion pal fat che il spirt nol cognòs stabilitât e antisismicitât.
Tal vanzeli si fevele di un grant taramot, colegât cu la muart e la resurezion di Crist (Mt 27, 53; 28, 2). O domandarès la gracie di rivâ a dâi un sens pascâl ancje a cheste nestre pagjine dramatiche e straordenarie. Di capî che vincj agns fa al jere il Signôr de vite e de muart che al passave pal cûr dal nestri Friûl. Ma che ancje il nestri popul al à savût profitâsi dal passaç di Diu par fâ ancje lui la sô pasche, il so passaç de muart ae vite. ■
(publicade su Cirint lis olmis di Diu, n. 3 pag.84)