La delegazion furlane – a Bruxelles
pe assemblee anuâl dal partît european –
e à incuintrât l’ex president de Catalogne Puigdemont
Lis gnovis de Aleance Libare Europeane (ALE-EFA), la manifestazion di Madrid in solidarietât cui presonîrs politics catalans e a pro dal dirit di decidi, la gnove sbarade dal president dal Parlament european, Antonio Tajani, e il prin turni des elezions presidenziâls in Slovachie, intant che in cont de Brexit la situazion e reste confondude e complicade e si svicinin lis elezions politichis tal Ream di Spagne ai 28 di Avrîl e chês europeanis ae fin di Mai. Lis ultimis setemanis ator pe Europe, sul plan politic, a son stadis une vore sioris di fats di une cierte impuartance, tal ben e tal mâl, massime se si ju cjale cun voi furlans e europeans. In cheste suaze, al vuadagne une rilevance particolâr ce che al è saltât fûr de Assemblee gjenerâl anuâl de ALE-EFA, il partît politic a nivel european che al ten dongje la plui part dai partîts nazionalitaris e regjonaliscj de Europe.
L’incuintri si à davuelt a Bruxelles dai 7 ai 9 di Març stâts e al è stât la ocasion par discori e par decidi in cont di diviersis cuistions. In particolâr, al è stât fat il rinovament dal ufici di presidence, che dal 2019 al 2022 al sarà vuidât di Lorena López de Lacalle, esponente de fuarce socialdemocratiche basche Eusko Alkartasuna (EA), che cussì e devente presidente de ALE-EFA e e cjape il puest dal catalan Jordi Solé di Esquerra Republicana de Catalunya (ERC), che impen i ven dade la incarghe che prime e jere propit di López de Lacalle, intant che Anke Spooredonk, che e fâs part de minorance danese te Gjermanie dal Nord, e je la gnove tesorire. Tal gnûf ufici di presidence, che al è formât di tredis di lôr, lis feminis a son sîs – il numar plui alt inte storie dal partît – e i siei components a rivin di Catalogne, Gales, Flandris, Paîs Valenzian, Paîs Basc, Corsiche, Bretagne, Ocitanie, Slesie, Frisie, des Isulis Aland (minorance svedese in Finlandie) e de citât di Rijeka/Fiume.
Inte assemblee di Bruxelles e je stade ancje la ratifiche de adesion plene ae ALE-EFA de bande di Patrie Furlane (PF) che, a tacâ dal 2017, e jere componente associade («observer member») dal partît european, là che cumò, dongje de Union Slovene/Slovenska Skupnost, espression de comunitât slovene dal Friûl e di Triest, e ven cussì confermade la presince de fuarce politiche furlane. Vie pai trê dîs de assemblee, par iniziative de delegazion di PF – componude di Federico Simeoni, di Oscar Olivo e dal conseîr regjonâl dal Pat pe Autonomie Giampaolo Bidoli – si à fevelât ancje de situazion de tutele des minorancis tal Stât talian, cu la mancjade metude in vore de legjislazion specifiche, e de aghe tant che ben comun e dirit di ducj in Europe, e a son stadis fatis buinis ancje dôs mozions in cont di chês cuistions. La assemblee, cun passe cent delegâts di cuarantecinc partîts e moviments di dut il continent, e à fat bogns une schirie di altris documents in cont di diviers argoments, de paritât tra om e femine ae istituzion di une Agjenzie europeane a pro dal plurilinguisim e fintremai ae riforme dai tratâts de Union europeane e ae liberazion dai presonîrs politics catalans.
E je stade ancje la ocasion par fevelâ des elezions europeanis: si à decidût che ALE-EFA e presentarà lis sôs listis unitariis, là che lis leçs eletorâls jal permetin (e duncje no intal Stât talian) e che il so “candidât vuide” (candidature simboliche pe presidence de Comission europeane) al sarà Oriol Junqueras di ERC, za vicepresident de Comunitât autonome di Catalogne, che di cuasi un an e mieç al è in preson par vie de organizazion dal referendum pe indipendence dal prin di Otubar dal 2017, e cumò al è sot procès li dal “Tribunal Supremo” di Madrid.
In ocasion de assemblee de ALE-EFA la delegazion di Patrie Furlane e à vût ancje un incuintri cul ex president de Catalogne Carles Puigdemont, in esili a Waterloo, in Belgjiche. ❚
Marco Stolfo