Ai 2 di Març al è colât il cincuantesim inovâl de prime “Cunvigne dai furlans emigrâts in Svuizare”, inmaneade inte sale riunions dal ristorant “Gambrinus” di Friburc. La ricorince e je stade la ocasion par ricuardâ chel moment che par sigûr al à une sô rilevance specifiche inte storie de emigrazion furlane e in chê dal Friûl “in Friûl”.
A son diviers i motîfs che a permetin ancjemò in dì di vuê di calcolâ chê cunvigne tant che une iniziative di grande impuartance. Un prin element al tocje i sogjets che le vevin inmaneade: a jerin la associazion “Pal Friûl” di Losanna, il Fogolâr Furlan di Friburc e la associazion dai emigrants slovens dal Friûl-Vignesie Julie. La cunvigne e nasseve dal bas, e jere il risultât di un ativisim individuâl e coletîf, che za tal 1968 al veve puartât ae costituzion di sodalizis gnûfs (propit la associazion slovene e la “Pal Friûl”, metude adun juste in Svuizare, cun chê di tignî dongje i emigrants cuntun spirt diviers e cun chê di vê un contat plui fuart cu la Patrie, cemût che al pandeve ancje il so non), e e jere marcade de colaborazion jenfri furlans e slovens.
Un altri aspiet al è chel dai siei contignûts, stant che tra esperiencis e rivendicazions, in chê zornade si veve resonât e si veve discutût di economie, di societât, di lavôr, di culture, di dirits, di dibisugnis, di identitât, di solidarietât di servitûts militârs, di lenghis, di universitât furlane, di sessualitât, di cuistion feminine, di zovins, di barachis, di presint e di avignî, di prejudizis e di sperancis.
Se si torne a lei lis relazions presentadis dai diviers protagoniscj di chel incuintri o la mozion unitarie fate buine ae fin de zornade, o ben i articui detaiâts che vie pes setemanis seguitivis a vevin cjatât spazi su lis pagjinis di “Friuli d’Oggi”, si capìs che chei che si vevin dâts dongje a Friburc a vevin discutût dal sigûr di cuistions in cont de emigrazion e dai furlans “pal mont”, ma a vevin fevelât e resonât plui in gjenerâl in cont dal Friûl “in Friûl”, che i partecipants ae cunvigne a palesavin in maniere braurose la lôr volontât di jessi part di chel, e che cun chel a volevin mantignî e disvilupâ un rapuart fuart, vîf e colaboratîf.
Salacor, al è par chel che la organizazion de cunvigne e veve cjatât diviers ostacui. Gianfranco Ellero, che in chê volte al jere il diretôr dal sfuei dal Moviment Friûl, al scrivè che la preparazion di chê zornade e jere stade lungje e dificile «perché il Friuli vecchio e rancido aveva interesse a boicottare il convegno, ad evitare una presa di posizione poco gradita e tanto meno opportuna per il conservatorume di casa nostra». Cundut achel, la cunvigne e jere stade inmaneade cun sucès, cun snait e cuntune disposizion e cuntune vision, là che di une bande al è fuart il spirt di chei timps e di chê altre si rive a vualmâ plui di cualchi contignût che al è bon ancjemò in dì di vuê, no dome in tiermins di storie e di memorie, ma ben ancje cun riferiment ae atualitât, pal Friûl “in Friûl” e ancje par chel che al è “pal mont” (che al esist ancjemò e anzit al è ancjemò plui consistent che in passât, se si calcolin i fîs e i dissendents dai emigrants “storics” adun cun chê che e ven clamade “gnove emigrazion”).
Chê manifestazion di cussience, di vitalitât e di dignitât no poderin fâ di mancul di viodile e ricognossile nancje lis istituzions regjonâls, che a scugnirin tignî cont di lôr, a tacâ de prime Conference de emigrazion, inmaneade a Udin in maniere uficiâl vie pal mês di Dicembar dal 1969.
Un ricuart di sostance de cunvigne di Friburc al è stât fat di Radio Onde Furlane juste in ocasion dal so inovâl, inte rubriche setemanâl di aprofondiment Dret & Ledrôs, par cure di Mauro Missana, cu lis testemoneancis di cualchidun dai siei protagoniscj direts, tant che Albino Concina, Pietro Bertoli e Gino Dassi, e cui contribûts di memorie e di riflession di Dree Valcic, Giampaolo Della Schiava, Renzo Mattelig e Donato Toffoli. ❚
Marco Stolfo
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +