Sfuei Mensîl Furlan Indipendent
Archivi de Patrie

EDITORIÂL – La nestre autonomie e je une scjatule vueide

............


✽✽ Ma vuê, aial ancjemò costrut fevelâ di autonomie pe nestre Regjon? In chei dîs achì su la stampe al è stât dut un grant dibatiment su la cuistion. O disarès che e je ore di finîle cu lis fufignis. La autonomie no esist plui, almancul tal sens che e vignive intindude de sô nassite e fintremai tai agns indaûr. O podìn dî cun sigurece che e je robe dal secul passât. Cumò e reste dome une peraule, tant di bant che pericolose, come chê altre che si dopre dongje, ven a stâi “speciâl”.
✽✽ Di bant, parcè che vuê il Friûl al è dome une code di un imprest istituzionâl dal dut pontât su Triest e parcè che la stesse Regjon e je destinade a colâ dentri il cjalderon talian des ordenarietâts. Si salvaran, forsit, dome Val di Aoste e Sud Tirôl, par vie dai tratâts internazionâi.
✽✽ Cheste sorte e je colpe dai politics, dai partîts, ma ancje nestre. Lôr, par vie che a àn tradît il spirt de autonomie, sotans simpri des diretivis dal centri, che e sedi Rome o Milan al è indiferent; noaltris, parcè che o vin crodût che la diference di viodi cemût aministrâ lis risorsis di un teritori e fos scrite par simpri tal statût di autonomie. O vin crodût che, in cualchi maniere, si sarès mantignût ancje chel ecuilibri, dut politic, fra Friûl e Triest.
✽✽  I furlans a àn viodude la autonomie tant che un ricognossiment dal stât talian par dut chel che il Friûl al veve patît par vie de Italie, des vueris aes servitûts militârs, dal sotsvilup economic ae emigrazion. Tornait a lei la letare dai predis furlans dal 1967 e o cjatarês dutis lis motivazions di cheste rivendicazion.
✽✽ Si pensave, dut un popul al crodeve, di jessi pronts a fâ alc di miôr, di no jessi dome il confin orientâl, di dulà che a partivin muredôrs o siervutis, dulà che si mangjave dome frico e polente, dulà che a jerin ducj simpri cjocs e alpins. La autonomie, la Regjon speciâl, par noaltris a jerin chest: «O podìn fâ ben, miôr di chês altris». Par un biel toc di timp e je lade cussì: plan urbanistic, sanitari, la leç pe emigrazion, altris leçs che a son stadis precursoris. La ricostruzion dal taramot, la ponte plui alte di cheste vision. Tal mieç, di sigûr, tantis falopis: o pensi soredut ae agriculture.
✽✽ Il rapuart al resisteve, ma simpri plui debil par vie dal cancarat dai partîts e soredut de deleghe simpri plui fuarte tai lôr confronts. E se tra i tiei rapresentants no tu âs nissun che al sedi espression di cheste vision identitarie de autonomie, si rive ae situazion di vuê.
✽✽ Une conclusion une vore clare: no pues jessi une autonomie se nol esist un partît autonomist. Ator pe Europe al è dapardut cussì. Al somee un zûc di peraulis, ma in ce maniere puedino difindi, ma ancje dome guviernâ la autonomie, chei partîts che a cjapin diretivis forestis?
Une scjatule vuede duncje, ma che e covente ai partîts par meti in sene la lôr trufarie sul marcjât de politiche. ❚
DREE VALCIC

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +