- Doro Gjat intun dissen di Dree Venier
Luca Dorotea, in art Doro Gjat dai Carnicats al à maraveât dute la Italie cul so gnûf album di solist Vai Fradi, jessût ae fin di Novembar e publicât di ReddArmy. Il disc, fat di 11 tocs, al à za puartât insom des classifichis musicâls chest zovin cjantautôr furlan, plen di sperancis e di amôr pe musiche.
«Cuant che o ai decidût di tacâ a lavorâ al gno disc, o jeri in tun moment delicât: insodisfat de mê situazion, sedi di un pont di viste lavoratîf che artistic. O vevi bisugne di esprimimi pardabon, di meti dut ce che o vevi dentri intun disc dut gno. Cui Carnicats o vevi fat doi mixtape, un EP e doi album uficiâi, però o sintivi la necessitât di fâ une robe dute mê e alore mi soi cjalât tal spieli e mi soi dit: “Di po, no ise ore di metisi sot e di fâ ce che ti ven pardabon ben? Bon, alore tache! Vai fradi!” . O sarai jo che o soi cjargnel e duncje, sot sot, o soi simpri un tic cjapât mâl, ma i miei comparis a son doi agns che mal disin, che secont lôr o ai fat un disc un grum figo e che “e larà ben, tu viodarâs”».
DORO GJAT AL E’ UN CJANTAUTÔR DIVIERS DAL SOLIT: al cjante de sô tiere, des amiciziis, dai fradis che a partissin pal forest; al conte la sô esperience e al condivît la ligrie, lis pôris e lis sperancis, doprant in mût origjinâl lis rimis e metint insiemi furlan, talian e inglês. «Tal disc o ai cirût di meti ducj i suns e dutis lis atmosferis che mi plasin di plui. Jessint une persone cul umôr avonde balarin, al è normâl che al sedi vignût fûr un tic di dut».
I tancj che a fevelin di lui a rimarchin la strofe Che ti aspettavi i rapper coi tattoo? E invece c’hai i montanari, ma in realtât Luca nus conte che nol varès mai pensât che une rime cussì, “stupidute” e sarès stade notade cussì tant. «Ae fin, par me e je dome une provocazion par distinguimi dal hip-hop talian e marcâ un concet che za al è evident intes cjançons. In plui, la rime plui significative e je par me chê part dal toc Prima di addormentarmi dulà che o dîs: “[…]siamo rose cresciute dentro al cemento/col malcontento a causa del maltempo/spremiamo la poesia dai sassi del Tagliamento”».
TAL ALBUM A SI PUEDIN SINTÎ ANCJE AMÎS che Doro al à clamât dongje par colaborâ cun lui, tant che Dek Ill Ceesa e Dj Deo, Davare, la Carnicats Live Band, i Videodreams e tancj altris. «Cuant che al è jessût l’album, o vin sunât ducj insiemi cu la Carnicats Live Band ae Fiere di Udin, e ducj i miei colaboradôrs a àn sintude la energjie dal public dai Carnicats e si son inamorâts ancje lôr dal progjet. A àn capide la filosofie dal disc e la fuarce dal messaç. In chel moment a son vignûts li di me, un par un, e mi àn ringraciât par vêju tirâts dentri intune robe cussì emozionante. Chest al è stât un dai moments plui biei de mê cariere musicâl».
E TAL TOC Anche Se, Luca al bute fûr dute la sô emozion: «al è il toc plui vecjo dal pont di viste anagrafic e ancje chel plui profont, e o ai metût dut ce che o vevi dentri. Mi è sucedût di scrivilu dut intun colp intun moment di aviliment. Cuant che tu sês a stâ in cjase cui tiei, tu âs un stipendi par mût di dî, la tô vite sentimentâl e sta lant a tombolons parcè che no tu âs la disponibilitât economiche par fâ il pas sucessîf, tu ti cjalis ator e tu viodis che la uniche robe che e funzione te tô vite e je la musiche e tu pensis: “di gracie che o ai la mê musiche, e je la cause de mê ruvine ma ancje la robe plui biele che o ai fate. E ancje se al va dut in sbrui, no smetarai mai di fâle, no smetarai mai di scrivi, no rinunziarai mai a chei sgrisui che dome jê e rive a dâmi. Puar mai me a no vêle!”».
DOPO I VIDEOS di Vai Fradi e Ferragosto, in curt al rivarà ancje Zenit. Doro Gjat nus conte «o sin lâts insom dal Mataiûr e là sù o vin filmât dut cul dron che nus svolave ator. E sarà une robe che us fasarà vignî i sgrisui, viodarês! ».
Par fâ sintî il vuestri calôr a Doro Gjat e savê di plui sui prossims concierts, seguîtlu sui social:
www.facebook.com/dorogjat e www.facebook.com/carnicats ❚
✒ Moira Pezzetta
