Sfuei Mensîl Furlan Indipendent
Archivi de Patrie

I artiscj de musiche si cjataran a Sedean tal non dal jazz, dal contemporani e di Pasolini

............

Une volte al mês il Comun di Sedean al ospitarà L’Insiùm, o ben il prin laboratori permanent di ricercje musicâl. Une idee maraveose saltade fûr de ment dal grant pianist furlan di nomee internazionâl Glauco Venier, par un progjet nassût in colaborazion cul coleghe rangjadôr e compositôr Michele Corcella. Tredis musiciscj che a vegnin di dut il Friûl e di diviersis bandis di Italie, tra i miôr de sene jazz e contemporanie, si cjataran cuntune frecuence mensîl par scrivi musiche, creâ e provâ insiemi. Une formule simpri plui slargjade intes grandis capitâls de musiche che e cjape il non di residence di artiscj.
il risultât di tant lavôr coletîf si podarà daspò scoltâ tai concierts dal vîf vierts al public, come che al è sucedût in ocasion de viertidure dal laboratori a Sedean, tai prins dîs di Zenâr, cuant che tal teatri comunâl, dut esaurît, il complès strumentâl al à ufiert un spetacul musicâl cetant interessant. Ven a stai un conciert incentrât su riscrituris in clâf moderne di tocs cjapâts dal Libri dai bai di Giorgio Mainerio, tant che prime part, e une opere origjinâl di coment sonôr al documentari mut dal 1918 dal titul En dirigeable sur les champs de bataille, realizât in colaborazion cun Cinema Zero e la Cineteca del Friuli.
cheste da l’insiùm e je une grande novitât tal panorame de musiche furlane, util e origjinâl, parcè che e met adun la formazion, la creazion e la sperimentazion, cuntune atenzion particolâr indreçade al coinvolziment de int e ae rivisitazion de tradizion musicâl furlane midiant de contaminazion e dal confront cun altris culturis, gjenars e stîi. No dome: la idee si slargjarà par metisi insiemi cul teatri, la danze, la leterature e in gjenar cu lis arts performativis.
Comun di Sedean, lis BCC di Martignà, Basilian e Bancje di Udin a sostegnin la iniziative, dimostrant cussì di crodi tal valôr de musiche e de culture de nestre Regjon che e cjate ispirazion de famose espression pasoliniane, presinte tal copion che il poete di Cjasarse al veve scrit par un program radiofonic de RAI: «Ai fat, Nusse, stegnòt un bièl insiùm».
Varìn duncje mût di sintî ancjemò cjacarâ dal laboratori L’Insiùm: almancul une volte al mês e sperìn simpri di plui. ❚
✒ Alessio Screm

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +