Sfuei Mensîl Furlan Indipendent
Archivi de Patrie

E ancje Fedriga al dîs «Siôr sì» a Rome

............

Al coventarès domandât a Nostradamus o a Piero Angela che nus disvelin il misteri di une Leghe che in Venit e Lombardie e ten cont de autonomie, e invezit in Friûl e regale 2 miliarts e 400 milions a Rome: dut par no disturbâ il guvier amì dal “comandant” Salvini, che intant al premie la Sicilie (Regjon notoriementri virtuose a nivel di belanç) “scontant” il so debit di 900 milions di euros.

I numars a fevelin di bessôi: il contribût di solidarietât che i furlans a saran clamâts a paiâ tai agns che a vignaran al è di 716 milions chest an, e di 836 pal 2020 e 2021. Renzo Tondo e Debora Serracchiani a àn peât il destin de nestre Regjon a chest salàs, a àn contratât cui guviers di Berlusconi, Monti, Renzi e Gentiloni e dal 2011 a son stadis gjavadis des nestris sachetis un grum di risorsis, plui o mancul 6 o 7 miliarts: ma la vere nature dal impat finanziari di chescj acuardis cul Stât dut câs no je mai stade sclaride, parcè che la Comission proponude di pueste dal Pat pe Autonomie no je stade mai convocade. Sedi la drete che la çampe a son stadis dacuardi a sierâ no un, ma ducj i doi i voi, cuant che il Stât al à fat pesâ la necessitât di ridusi il debit lant a scuedi des Regjons a Statût Speciâl.

Trent e Bolzan si son za fats justizie fasint ricors ae Cort Costituzionâl che ur à dât reson tal 2014. Val di Aoste e Sicilie a àn vude une riduzion consistente: il Friûl-Vignesie Julie invezit nol à rivât in pratiche a rinegoziâ nuie. A pet de Serracchiani, che si jere vantade di vê otignût un scont di 120 milions l’an des elezions regjonâls, cumò il gnûf president Fedriga al è tornât di Rome vantantsi di une riduzion di 142 milions pal 2019. 22 milions su 2,4 miliarts: e saressial un sucès? Al è pôc plui dal 1 par cent, e soredut nol sposte nancje un fregul de gabele pesante che i citadins furlans – ducj – a scuegnin dâ a di un guvier che al doprarà chescj bêçs no par ridusi i debits, ma cun dute probabilitât par fânt altris (baste viodi il redit di citadinance).

Chescj 2,4 miliarts di euros tai prossims trê agns a vuelin dî par nô furlans 700 euros parom: invezit ai sicilians (che a pain 1 miliart l’an, ma a son 5 milions) ur vegnin gjavâts dome 200 euros parom. La leç di stabilitât dal Stât, insome, e je une rapine. Fedriga al veve imprometût ai siei eletôrs di rinegoziâ chescj pats finanziaris, ma il flum di bêçs bande Rome al reste simpri compagn, e soredut (par fevelâ cu lis peraulis dal segretari regjonâl dal Pat pe Autonomie Massimo Moretuzzo) «la Specialitât stesse de nestre Regjon cence risorsis e cence competencis e devente inutile». Purpûr il segretari dal Pd Cristiano Shaurli (miôr tart che mai) al à invidât Fedriga a cjapâ esempli de Sardegne, che e à fat ricors ae Cort Costituzionâl e che si è viodude dâ reson: “Gjavant cussì tancj bêçs ae Regjon, di fat, il Stât no i permet plui di davuelzi lis sôs funzions”, e dîs la Consulte te sentence 6/2019.

La situazion e je duncje pardabon serie, e al è preocupant che la maiorance regjonâl si plati su chest teme. Dut al è ancjemò plui grâf parcè che su la cuistion no je nissune trasparence. E nol è stât coinvolt in nissune maniere il Consei regjonâl, che al varès di jessi il puest dulà che i presidents a vegnin indreçâts. Invezit Tondo, Serracchiani e cumò ancje Fedriga a fasin di bessôi i lôr acuardis cu lis maiorancis amiis che di Rome a scuedin simpri plui bêçs. Ducj prin des elezions a prometin di difindi i interès dai citadins dal Friûl-Vignesie Julie. Ma al moment de veretât, cuant che Rome e clame par paiâ dazi, i nestris sorestants a àn dome une rispueste: «Siôr sì». ❚

Walter Tomada

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +