Su la fonde di ce che si dîs tal intervent chi dongje, ancje te gnove legjislature che si è a pene inviade, al covente intervignî su diviers fronts. Prin di dut si à di completâ il cuadri normatîf regjonâl cuntune leç che e difindi e e promovi lis varietâts todescjis feveladis in Friûl. Dut câs, si à ancje di prontâ i regolaments che inmò a mancjin par tacâ a meti in vore lis gnovis leçs sul sloven e sul furlan.
La situazion plui delicade si riferìs propit a chest ultin test di leç che, di une bande, si cjate a frontâ la impugnazion di cualchi so articul denant de Cort Costituzionâl e, di chê altre bande, cence regolaments, al riscje di pidimentâ in maniere penze lis azions di politiche linguistiche pal furlan. La gnove aministrazion regjonâl, duncje, e varès di mantignî la linie di difese de leç za inviade de Zonte stade e di dâ fûr i regolaments che a mancjin.
Cun di plui, la Regjon e varès di infuartî la azion de ARLeF e poiânt il lavôr di struturazion inviât massime tal ultin an (parcè che un organisim cence risorsis economichis e umanis nol pues lavorâ e, duncje, al è dibant). E chê dai bêçs no je une cuestion di pôc: nissun al vûl che a ledin strassâts, ma chest al varès di valê par ducj i cjamps e no dome – come che cualchidun al va dilunc a tontonâ – pe lenghe furlane là che a zirin pardabon cuatri carantans. Baste pensâ che, fintremai intal stât francês, un dai plui centraliscj, la lenghe bretone – che par numars e je chê che e va miôr di paragonâ al furlan – e gjolt di risorsis ben plui altis di chês metudis pe lenghe proprie dal Friûl…
La Regjon, che e à une funzion di prin plan tal meti in vore la leç statâl 482/99, e varès po di impegnâsi par garantî che si meti in vore pardabon ce che chê leç e previôt, se al covente, come tal câs de progressive riduzion des risorsis, batint i pugns cul guvier talian. No si trate dome di garantî i dirits linguistics dai siei citadins, ma ancje di difindi la autonomie regjonâl e di rispietâ ce che la Union Europeane e previôt in materie di tutele des minorancis e di plurilinguisim.
A son chescj, duncje, i ponts di fonde che il Comitât 482 al fâs indenant ai gnûfs aministradôrs regjonâi. Par frontâ la cuestion si à za domandât un incuintri sei cul president de Regjon, Renzo Tondo, sei cul assessôr pe culture, Roberto Molinaro, ancje se par cumò di lôr no je rivade nissune rispueste.
Il Comitât 482 al à ancje domandât un incuintri cul gnûf president de Provincie di Udin, Pietro Fontanini, ancje se, tal cjamp dai dirits linguistics, lis Provinciis a àn pussibilitâts di intervent cetant plui bassis rispiet ae Regjon. Cundut achel, la Provincie di Udin e pues vê une funzion impuartante ta chest cjamp, sei cul lâ dilunc e cul infuartî lis azions za inviadis, sei come pont di riferiment pes bataiis di puartâ indenant. Intant de campagne eletorâl, Fontanini al à za cjapât un prin impegn su chescj temis, si trate cumò di viodi la maniere miôr par passâ ai fats.
_________________________________________________________
Fotografie su la lenghe
Si pues dî che il vôt dai 13 e dai 14 di Avrîl al sedi colât juste a miezis di un percors inviât a nivel regjonâl par dâi fondis plui saldis ae tutele dai dirits linguistics des comunitâts che a vivin intal nestri teritori. Cun di fat, prime des elezions, a jerin stadis fatis buinis dal Consei regjonâl une leç pal sloven e une gnove leç su la lenghe furlane, si veve dât il vie libare ae tabele dai Comuns là che si à di meti in vore la leç statâl sui slovens, e jere stade firmade la convenzion Regjon-RAI par inviâ la sperimentazion di programs radiofonics cuotidians par furlan.
Parcè fevelâ alore di un percors a miezis? Parcè che dongje des dôs leçs regjonâls su furlan e sloven, e mancje ancjemò une leç pal todesc. Parcè che la stesse leç su la lenghe furlane e je blocade par vie che no si àn inmò i regolaments par podê metile in vore e, cun di plui, e je stade ancje impugnade denant de Cort Costituzionâl. Po, parcè che si previodin dome sîs mês di trasmissions radiofonichis cuotidianis par furlan su la RAI e, cence di une convenzion fuarte come chês za in vore par altris comunitâts minorizadis dal stât talian, si riscje di fermâsi alì.
Denant di cheste situazion, duncje, si pues decidi di lâ indenant pe strade za inviade, ma al al è ancje une vore facil sdrumâ jù ce che si à fat fin cumò. Il cambiament dai ecuilibris politics in Regjon, di fat, al lasse vierte ad in plen ancje cheste seconde pussibilitât, massime se si tegnin par buinis lis declarazions fatis dilunc vie de campagne eletorâl.
Cun di plui, tai ultins agns, i fonts che a rivin inte nestre regjon de leç statâl 482/99 a son lâts dilunc a sbassâsi.
Dut câs, sul finî, al è just di ricuardâ che, ancje se si ves di lâ indenant pal troi segnât ta chescj ultins agns, lis misuris di tutele dai dirits linguistics e lis risorsis a disposizion ta chest cjamp a son inmò lontanis di chês che a àn cetantis comunitâts minorizadis ator pe Europe.