Sfuei Mensîl Furlan Indipendent
Archivi de Patrie

Friûl Ocidentâl, un ambient che al à bisugne di A.C.Q.U.A.

Alex Olivetto

La gnove aministrazion regjonâl di frescje nomine, si cjate, par vie di une discomude ereditât, a frontâ bielzà une vore di cuistions e di emergjencis di caratar ambientâl. Tal Friûl Ocidentâl, là che il gnûf president de regjon Tondo al à cjapât un slavin di vôts, la passade aministrazion (… par vôs di cetante int) e à falât in plen propite su temis leâts al teritori e al ambient. La int cumò si spiete un biel mudament di direzion e in prime file i mudaments ju domande Renzo Bortolussi, inteletuâl ambientalist e president pro tempore di A.C.Q.U.A. (Associazion, Control, Cualitât, Urbanistiche, Ambientâl).
Ce vuelial domandâ a la gnove zonte?
Come associazion, o domandìn al President de regjon Friûl-Vignesie Julie, Renzo Tondo une atenzion particolâr pai problemis ambientâi (…chi in part o vin bielzà frontât cul gnûf assessôr Lenna) che a dîle dute o definirès “speculazions ambientâls” dal Friûl Ocidentâl.
Puedial dânus un sclariment in merit?
Prime di dut lis Cassis di espansion! Nus displâs viodi che pal nestri Tiliment a continuin lis polemichis sterpis sul fâ o no fâ un ciertis oparis chi cetancj studiôs e professioniscj di nomee mondiâl a àn declarât dal dut inutilis e danosis pal microclime locâl e par lis faldis di aghe. E daspò tant cjacarâ par dibant si à pierdût timp bon par la ricercje di soluzions di sest.
O vuei ancje marcâ la incongruitât da lis proceduris metudis in vore da la passade aministrazion, par imponi il podê in mût confusionari, cun documents di impresionant anarchie procedurâl come, par esempli, comissionant a la Univesitât di Udin un studi idraulic doi agns e mieç daspò vêi dât a la Technital (cun DGR 989 dal 22.04.04) l’incaric de progjetazion definitive-esecutive des cassis e simpri daspò doi agns un progjet preliminâr per cassis tal Tiliment di mieç (… prime l’incaric definitîf-esecutîf e daspò chel preliminâr???).
Intant si cuntinue a costruî dongje i arzins, fuarts dal fat che il PAI di Tisane no dome al è condissendent ma al è partît 3 agns daspò il proviodiment di lêç. Duncje o vin di pensâ che il video fat de citât par dimostrâ i dams de aluvion dal 1966 al è une falope. Par no fevelâ de “justizie aministrative” che ancjemò no nus à dât nissune rispueste in merit al nestri ricors.
E di là des cassis vêso di segnalâ altris emergjencis?
Intai ultins agns si sin cjapâts la responsabilitât di intervignî in cetancj câs; il plui significatîf subit daspò des cassis al è chel dal incuinament dal turint Colvera e dal depuratôr (in comun di Manià), dal flum Ciline (discjarie di amiant) e il sbarament-dighe di Cuel (in comun di Darbe) che o partecipìn a la bataie cul “Laboratori Livence 2007” e chi secont noaltris e je une “speculazion di 112 milions di euros” che o contestarìn fin al sfiniment; ultin par chel che rivuarde i flums o anuncìn la resinte sconfite de variant 24 e 26 di Vile di Flum (…bataie vinte) colade pes nestris contestazions poiadis, nuie di mancul, che di Guido Bertolaso.
Grazie a la poie di profesioniscj che a operin in mût dal dut gratuit par A.C.Q.U.A. o segnalìn al president Tondo ancje la cuistion da la mont di Sant Lurinç in comun di Manià dulà che invezit di discrosâ la mont si podares sgjavâ in galarie. O sburtìn ancje par une plui grande atenzion sui cementificis, su lis discjariis di scovacis e sui termovalorizadôrs; al sarès cetant util un sburt in direzion de racuelte diferenziade (incentivabile cu la cauzion sui vueits…).
La tutele ambientâl par chel che nus rivuarde e ven valutade sui beneficis e su la spese su la comunitât; ven a stâi che al sarès necessari butâ un cuc e dâ la juste atenzion al resint progjet de Cimpel-Secuals-Glemone.
In fin ce si spietaiso di difarent di cheste aministrazion che chê altre no à fât?
La aministrazion Illy nus à une vore deludûts in cjamp ambientâl, tant che no dome e à tocjât il font ma e je lade une vore plui in sot e o pensìn che piês di cussì no si podeve fâ. Ancje se la lêc su la partecipazion dai rapresentants di interès difondût (L. 108/2001 convenzion di Aarhus) o sin stâts cuasi simpri “snobâts”! Significatîf che in gracie di dutis chestis emergjencis e chests fats la plui grandepierdite eletorâl par la aministrazion Illy e sedi rivade propite inte nestre provincie.
Personalmentri o vevi domandât di verificâ la pussibilitât di zontâ (fax dal 18/08/2003) inte gnove leç urbanistiche l’oblic, cun incentîfs, di zontâ intai gnûfs progjets edilizis la tecniche solâr passive bielza presint in altris regjons: nissune rispueste e propueste colade tal dismenteadôr…
Sigûrs che i argoments segnalâts dale nestre asociazion a vedin movet la atenzion de gnove zonte regjonâl o ringrazin e o spietin gnovis in curt.

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +