Sfuei Mensîl Furlan Indipendent
Archivi de Patrie

Il panorame in Regjon dopo des votazions

Lorenzo Marchiori

Cui che al va, cui che al rive
Un bagn di sanc pal Centriçampe che al à resistût dome te citât di Udin. Une rivincite pal Centridrete e in particolâr pe Leghe Nord che e torne a viodi a lusî il so Carroccio come che nol capitave di agns.
Chest il risultât des elezions de metât di Avrîl in Friûl, cuntun apontament segnât di resurezions e tramonts di diviers oms politics che a àn caraterizât i ultins dîs agns de politiche regjonâl.
A sorprese, Renzo Tondo al à vint su Riccardo Illy te corse pe presidence dal Friûl-Vignesie Julie, cuntun risultât cussì clâr e net che nol lasse spazi a nissune repliche.
L’imprenditôr triestin, difensôr de leç di tutele de lenghe furlane, prestât a la politiche (come che i à simpri plasût definîsi) dal 1993 al à incassât la sô prime sconfite intune competizion eletorâl anunciât il so gjavâsi de sene politiche cence concedi nancje une interviste o un ultin coment ai mass media che pûr al veve doprât par agns.
A la vuide de Regjon, duncje, al torne propit il grant escludût dal 2003, intant che tal stes timp e va fûr di sene Alessandra Guerra. La “pasionaria” cul façolet vert prime e à refudât une candidature pal Parlament intune posizion che le varès in ogni câs lassade fûr dai puescj “cjalts” par Rome. E po, cuasit a la vilie de votazion, si jere esprimude a pro di Illy cuntune mosse che di fat le à puartade a taiâsi i puints no dome cu la Leghe ma ancje cul Centridrete.
In spiete di viodi cuâi che a saran i prins ats concrets de zonte Tondo, che a la culture e a lis lenghis minoritariis al à volût tant che assessôr Roberto Molinaro (Udc), a van regjistrât ancje a lis elezions aministrativis altris gambiaments.
In Provincie di Udin e tramonte la stele di Marzio Strassoldo e e monte sù di gnûf chê di Pietro Fontanini. Autonomist furlan ancjemò prime che padan, al è stât il prin president di Regjon esprimût te prime metât dai agns 90 de Leghe Nord. A lui i tocje il compit di tornâ a dâ sflandôr a un ent, la Provincie apont, che e veve pierdût smalt cu la vicende Strassoldo-Tavoschi.
Si ritire, pal moment, ancje Sergio Cecotti. Dopo dîs agns di mandât di Sindic, al lasse l’ufici di prin citadin di Udin al è retôr de Universitât Furio Honsell. Il fisic furlanist al torne a fâ il professôr a Triest, intant che i tocje al matematic di gjestî la aministrazion comunâl dal cjâflûc furlan, adun cul Partît democratic, a lis listis civichis e a la Çampe Arc di Sant Marc. E confrontâsi cuntun Centridrete vincent, invezit, ai nivei parsore.
Tondo, Fontanini e Honsell. A son lôr i gnûfs “fâr” de politiche furlane che tai prossims cinc agns la comunitât civîl dal Friûl e cjalarà.

________________________________________________

Regjon. La sorprese: Tondo president
Probabil i veve crodût dome lui: Renzo Tondo al à batût Illy (53,82% a 46,18%) segnant la colade dal «Faraon» di Triest, come lu clamave cualchidun.
Tondo al è partît rincorint cence nancje la poie convinte de sô coalizion, si è definît subit “president dai citadins” e al à pontât su la concomitance cu lis elezions politichis. Al à alçât il tîr cun tonos polemics pontant su la critiche dal debit public, dal redit di citadinance, cul lassâ un confront a Telefriuli e – magari cussì no – sbaradis cuintri de leç sul furlan. A Illy no i son bastadis “gnovis” alencis tant chê dal president dal Udin Gianpaolo Pozzo e di Alessandra Guerra, che cumò a àn di patî il svindic di Saro – il plui sustât de sô posizion – il prin, e dal so partît (la Leghe Nord) la seconde, ancje se jê e à domandât scusis “postumis”.
LA ZONTE_Daûr dal president Renzo Tondo la Zonte e je componude di:
Luca Ciriani (Pdl-An) furlan di Pordenon vicepresident e assessôr aes Ativitâts produtivis;
Elio De Anna (Pdl-Fi) furlan di Pordenon,
al Personâl e ai Servizis informatîfs;
Vladimiro Kosic (esterni) Triestin, Sanitât
e Protezion sociâl;
Vanni Lenna (Pdl-Fi) furlan cjargnel, Ambient
e Lavôrs publics;
Roberto Molinaro (Udc) furlan di Udin, Istruzion, la Culture, la Formazion professionâl, il Sport e la Pâs;
Riccardo Riccardi (Pdl-An) furlan di Udin, Planificazion teritori, energjie, mobilitât;
Alessia Rosolen (Pdl-An) Triestine, Lavôr, Formazion universitarie e Ricercje;
Sandra Savino (Pdl-Fi), Triestine, assessôr
aes Risorsis economichis e finanziariis, al Patrimoni
e ai Servizis gjenerâi;
Federica Seganti (Leghe Nord) triestine, relazions internazionâls e autonomiis locâls;
Claudio Violino (Leghe Nord) furlan di Udin,
risorsis agriculis, naturâls, forestâls e a la mont.
NUMARS IN STRUC_ Nissun assessôr par Gurize. Pe provincie di Triest (236.320 abitants, 19% de regjon): 4 di lôr in Zonte, il 36%. Provinciis furlanis (966.000 abitants, 81% de regjon) 7 di lôr in Zonte, il 64%.
Provincie di Udin: Fontanin a man bassis
In Provincie di Udin sucès facil – daûr des previsions – pe coalizion di Centridrete, di fat il leghist Pietro Fontanini si impon za al prin turni cul 55,4% dai vôts. Diego Travan, l’imprendidôr sielzût avonde tal ultin dal PD par contrastâlu, al à vût il 39,22% des preferencis. Une vore plui lontans chei altris candidâts: Ernesto Pezzetta di “La Destra” al à vût il 2,1%, Marzio Strassoldo l’1,95%, e Luca Battista de “Fiamma Tricolore” l’1,34%. Il prin partît de Provincie al risulte il Pdl cul 31,68% des preferencis. Daûr al è il PD cul 27,09% dai vôts, la Leghe Nord cul 15,4%, la UDC cul 8,38%, la “Italia dei Valori” cul 4,43%, e la Çampe Arc di S. Marc cul 4%. Chei altris partîts a son restâts sot dal 2,5%. Intun esit avonde scontât, come che si diseve, al maravee il flop dal president in jessude Marzio Strassoldo, l’unic ae vuide di un partît furlanist. Il scandul che lu à puartât aes dimissions al à pesât cetant, si viôt, e i furlans no i àn dât fiducie.
I ASSESSÔRS_Nûf i assessôrs che a componin la gnove Zonte dal president Fontanini che al tignarà par se lis deleghis al belanç, a lis riformis istituzionâls, a lis politichis linguistichis, e ai rapuarts cu lis societâts partecipadis. Fabio Marchetti (Pdl) al è il vicepresident cun deleghis a viabilitât, traspuarts, motorizazion civîl e grandis oparis; Mario Virgili (Pdl), al cjape l’assessorât a personâl, informatiche, ativitâts sportivis e ricreativis; Stefano Teghil (Ln), edilizie patrimoniâl, sigurece, energjie; Elena Lizzi (Ln), culture, istruzion e paritât om femine; Ottorino Faleschini (Udc), montagne, protezion civîl, cjace e pescje; Adriano Piuzzi (Pdl), politichis sociâls e leç 10; Daniele Macorig (Pdl), lavôr, formazion professionâl e agricolture; Franco Mattiussi (Pdl), ativitâts produtivis e turisim; Enio Decorte (Udc), ambient. President dal Consei provinciâl Marco Quai (Pdl). In struc, duncje, cinc assessôrs dal Pdl, doi de Leghe Nord e doi dal Udc.
Redazion

___________________________________________________

Comun di Udin: sindic… magnific
Si è presentât a chei di Udin disint “Yes, o pues” e i fats i àn dât reson. Furio Honsell al à vint la sfide par deventà Sindic di Udin, ancje se a un ciert pont la imprese e someave pardabon dificil. Candidât a sorprese dal Centriçampe, il Retôr de Universitât dal Friûl si è cjatât cence un aversari devant e par cualchi setemane la sô vitorie e je someade facile facile.
Nissun al pensave che la Cdl di Udin e sarès rivade a convinci Enzo Cainero a cori par Palaç D’Aronco e a meti in discussion la conferme de çampe in citât. Invezit, il comercialist origjinari di Cjavalì, al à acetât di bon grât la sfide e Udin e à vût, dopo tancj agns, doi candidâts di nivel; i miôr des rispetivis fazions.
La vitorie di Berlusconi in dute Italie e la largje afermazion di Fontanini in Provincie a someavin il viatic par viodi un om di Centridrete su la poltrone che e je stade tai agns di Candolini, Cecotti, Mussato e vie disint.
Nuie ce fâ: al secont turni i udinês a àn preferît il “pôc furlan” Honsell al “furlanat” Cainero. Pôc furlan nome tes origjins parcè che il Retôr al è stât in prime file in plui di cualchi bataie a pro de lenghe furlane e plui di cualchi volte al è stat lui il promotôr di resonaments sul rûl di Udin come Capitâl dal Friûl.
Coragjos a zurâ ancje par furlan, al à volût dâ subit un segnâl impuartant afidant la deleghe pe Politiche Linguistiche a chel Kristian Franzil che al jere stât President de Commission Culture intant de discussion de Leç sul Furlan.
Ce che al è sigûr al è che il Professôr al à capît che Udin e à bisugne di un rilanç. I ultins agns de zonte Cecotti a son stâts caraterizâts di un ciert imobilisim culturâl e di une scjarse azion di promozion de centralitât de citât. Honsell al sa che, indipentementri de maiorance che lu sosten e che no je gambiate rispiet a chê de passade legjislature, i furlans si spetin di lui plui di cualchi segnâl di discontinuitât.
LA ZONTE_La composizion de gnove zonte comunâl e je cheste: Vincenzo Martines (PD) vicesindac e ativitâts economichis; Chiara Franceschini (Innovare con Honsell) eficacie organizzative; Paolo Coppola (Innovare con Honsell) Inovazion e e-government; Lorenzo Croattini (Innovare con Honsell) cualitât de citât; Giovanni Barillari (Cittadini) salût e ecuitât sociâl; Mariagrazia Santoro (tecnic esterni) planificazion teritoriâl; Kristian Franzil (Çampe Arc di Sant Marc) istruzion, politichis pai zovins, sport, timp libar, lenghis minoritariis; Luigi Reitani (tecnic esterni) culture e turisim; Gianna Malisani (PD) gjestion urbane; Enrico Pizza (PD) mobilitât.
Cun di plui a son stâts nomenâts trê conseîrs delegâts: Anna Paola Peratoner al belanç partecipatîf, Cinzia Del Torre al belanç di gjenar e Franco Della Rossa a la anagrafe.
Simone Bressan / Udine20.it

Fondazione Friuli / Un jutori concret al mont de scuele in regjon

Piero Cargnelutti
La Fondazione Friuli e comuniche di vê dât fûr il bant dedicât ae istruzion che al podarà contâ suntun font di 600 mil euros e che i progjets si podaran presentâ dentri dai 24 di Març. Il bant al previôt diviers indreçaments tant che il sostegn ae dotazion tecnologjiche, il potenziament des competencis linguistichis, il […] lei di plui +

Gnovis / Diego Navarria al vinç il Premi internazionâl Jacum dai Zeis

Redazion
Il nestri colaboradôr Diego Navarria al à vinçût il Premi internazionâl Jacum dai Zeis cun la conte par furlan “La confession”, insiemit a Rosella Soranzo di Duin cun “Una coppia in incognito”. Il premi al è ideât dal setemanâl Il Friuli in ocasion dai cent agns de muart dal inomenât personaç furlan, e oragnizât in colaborazion cu la Societât Filologjiche Furlane e l’Universitât […] lei di plui +

Pan e salam / Scufiots e trisculis

Enos Costantin
Une roste furlane prime de montane La disfide di BarletePar Marine Le Pen a vegnin prime i francês, par Matteo Salvini a vegnin prime i talians, par Viktor Orbán a vegnin prime i ongjarês.◆ Po ben, par finîle cun cheste naine fasìn une biele disfide. Ju puartìn jù a Barlete ducj i trê, ju sierìn […] lei di plui +