DI SCJAS IN SCJAS: I TARAMOTS INTE STORIE FURLANE. An 1117: il taramot plui grant di Europe

Puedial mai jessi sugjestîf il Montafin? Cuant che lis fuarcis de Nature inte lôr potence a ufrissin al Om, piçul e cence peraule, un spetacul che al inglace il sanc fin dentri lis venis? Par chei che lu vivin in prime persone sigûr di no! Pluitost, al à dut il savôr de Tragjedie, cul colôr de Pôre e l’Insgrisulâsi de Muart. Ma leint lis cronichis che nus contin il Grant Scjas dai 3 di Zenâr dal 1117 (cronichis monastichis in particolâr, scritis un pôc in ducj i paîs coinvolts di chest colp trement), di sigûr o restìn incantesemâts: si trate di un dai taramots plui impuartants che la Europe e vedi mai vivût.
Di sigûr, al è il prin a jessi documentât cun precision di riferiments in contemporanie di plui bandis. Probabilmentri, la fuarce e la energjie discjadenade des lidrîs plui profondis de tiere e fo esaltade dal fat che lis scossis si sedin incjadenadis insiemi une su chê altre, intune golaine diaboliche che e cjapave vie vie plui fuarce: di Auguste, pes Gjermaniis, e lave sdrondenant jù pal Ducât de Carinzie, sdrumant il Patriarcjât di Aquilee, lis citâts di Verone e di Milan, devastant insiemi dute la antighe Langobardie e smicjant ancje plui di cualchi comunitât in Toscane, tant che Pise, juste par nomenânt une. Intai documents, che pardabon a meretaressin di jessi publicâts pe fuarce des imagjins che nus regalin, si contin robononis che tu disaressis vignudis fûr di un libri fantastic di liendis e di aventure. Lis ondis de Lagune di Maran si saressin alçadis come un mûr di aghe par gloti i paîs de riviere: un maremot, in definitive, che al varès scancelade par simpri le comunitât di Malamocco; a Vignesie la eruzion di une bugade velenose di solfar e varès pandût la presince dal Diaul daûr di un disastri tant grant; i flums si saressin alçâts par aiar, par tornâ a colà jù di bot in tal lôr jet, cun grant spavent di ducj chei ju cjalarin mateâ in chel mût.
Vie pe Patrie si saressin viodûts nûi di fûc colorâts di sanc, di sigûr sburtâts intal aiarat neri di un demoni. E cualchi ploiade di sanc e sarès colade ancje vie pes campagnis. Lis muracis dal Cjistiel di Glemone a vignirin jù cuntun grant sclop, rondolant fin parsore des cjasis dal borc che al steve rimpinât sot di lôr; e ancje a Cividât i mûrs di difese meridionâi e ben dôs toratis a forin sdrumadis par tiere. Patriarcje in chel àn al jere Vodalrì I di Eppenstein, un om di clare fame, preseât inte cort dal Imperadôr e ancje tignût in bon dal Pape. Al fo lui a dâi une grande sburtade ae costituzion di une rêt di munistîrs e di badiis propite tant che conseguence e rispueste al grant scjas: Ossiach, Mueç, Sittich, insiemi cuntune straordenarie cressite dal Cjapitul di Cividât. Une pensade mighe di pôc. Parcè che propite chê rêt di Fede, Sapience, Culture, e fo la grande responsabile di une circolazion di libris manuscrits, di oms e di ideis inte nestre Patrie. Ce insegnament vivarôs e grant: un scjas come che no si veve mai sintût prime al devaste paîs, cjistiei, monuments e muracis. Par tignî insiemi ce che al restave, chel Patriarcje stirian al pense di meti man a une rivoluzion culturâl grandiose, che e fasarà de nestre Patrie il zardin plui invidiât di dute la Europe. ❚
✒ Agnul Floramo