Intai cines che a contin di catastrofis no mancje mai la sene là che une masse indistinte e scjampe cjapade dal panic. In chescj cines, in gjenar aes comparsis ur ven dit dome “berlait e corêt” viodût che la sene e à dut câs in prin plan l’eroi di turni che al fronte la situazion intant che ducj chei altris a scjampin. Lis personis che a patissin la catastrofe a son masse, popul informi, e par rapresentâju a bastin un pocjis di comparsis che a berlin sul fonts.
E fâs ecezion une sene di Apocalypse now, il cine tant cognossût su la vuere in Viet Nam. Une des senis plui celebris, jentrade intal imagjinari coletîf, al è l’atac dai elicotars dal colonel Kilgore su la musiche de Cjavalgjade des Valchiriis. Dut câs lis senis par me plui sorprendentis a son chês che a rivuardin la reazion dal vilaç ae catastrofe rapresentade dal atac american.
Cuant che a rivin i elicotars, invezit des senis di panic di une masse indistinte, il regjist al rapresente la resistence di une comunitât organizade. L’atac al rive di matine, propri intant che su la place une mestre e je daûr a dâ dongje i fruts di puartâ a scuele.
E je une sene di vite “normâl”, fermade dal irompi di une vueriliere armade di kalashnikov che e berle ordins. Di presse la mestre e met in rie i fruts e ju condûs intal ripâr antiaeri.
Ator ator i contadins a lassin i cjamps e a spessein a cjapâ sù lis armis, a condusi lis bestiis al ripâr, a socori i prins ferîts.
Viodût dal alt, dal elicotar dal colonel Kilgore, il vilaç al somee colât intal caos. Dome cuant che un prin elicotar al ven colpît di un vecjo toc di cuintriaerie, i marines si scambiin une cjalade perplesse, spauride.
Clarementri, la disparitât di mieçs e je masse grande e ben svelts i elicotars a rivin inte place de vile dulà che pôc prime si jerin dâts dongje i fruts. Une fantate vietnamite si svicine cuntun di chei cjapiei tipics di paie, e dîs alc a une altre femine dal puest, che di bot si slontane, e dopo e bute il cjapiel dentri dal elicotar.
E je une bombe.
Intant che l’elicotar al sclope, il colonel Kilgore al pues dome comentâ dal alt Fucking savages! (Maladets salvadis!).
Un cine sul taramot dal Mai 1976 al varès di rapresentâ cussì la int furlane. No tant che une masse in prede al panic e no tant che comparsis passivis in spiete di jessi salvadis dal eroi di turni, ma tant che une comunitât che e sa fâ front comun cuintri lis catastrofis. Al bisugne jessi clârs: nol è che no sedin stâts episodis di panic, di disperazion, di shock. Ma analizant lis robis intal complès, si note cemût che i mecanisims di reazion coletive a vedin assorbît lis reazions individualistichis, cemût che la capacitât di auto organizâsi dal bas e vedi cjapade la volte sui istints dal gjenar “ognidun par se”. Passâts i atims di straviament vivûts su la onde de adrenaline plui pure, la int e à scomençât a cjalâsi ator e e à cjatât un mont in , cun maseriis dulà che prime a esistevin cjasis. Ma tal mieç di chestis maseriis e à viodût musis cognossudis, e à ricognossût leams di clans, di vicinie. Scoltant lis contis di chei moments, une peraule che a torne fûr dispès e je “spontani”. Al è stât “spontani” judâsi, “spontani” scambiâsi mangjative e aghe, “spontani” condividi lis pocjis risorsis disponibilis par fâsi un ripâr. Ma o vin dite la volte passade ce che al vûl dî “spontani”.
Il stât par cierts dîs al è colassât. Vint pierdût dutis lis sôs struturis informativis e logjistichis, tant che lis stazions di polizie e ogni altri contat sul puest, si à cjatât vuarp e mutilât. L’esercit al jere imobilizât intes casermis distrutis e fintremai lis notiziis a son rivadis ai centris di podê in ritart e dome in graciis de organizazion orizontâl dai radioamadôrs. Cui che al è rivât in Friûl par capî ce che al jere sucedût, al à cjalât la tiere taramotade e, tant che Kilgore dal elicotar, al à viodût int cori ator cjapade dal caos.
Ma jù tra i rudinaçs, prime ancjemò che e finìs chê prime lungje gnot, la int dai borcs si jere invezit za organizade, al veve strent za lis maiis de rêt che ju tignive unîts e e jere pronte a recitâ di protagonist, refudant il rûl di comparse sul fonts. In chê gnot, la int dai borcs si à cjapât il rûl dal eroi, ancje se nol mancjarà cui, dal alt e di difûr, al fasarà plui o mancul il stes coment dal colonel Kilgore: Fucking savages! ❚
✒ Igor Londero – Autôr di «Pa sopravivence, no pa l’anarchie» Forme di autogestione
nel Friuli terremotato: l’esperienza della tendopoli di Godo (Gemona del Friuli)
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +