Sfuei Mensîl Furlan Indipendent
Archivi de Patrie

IL FERÂL. I oms a passin, lis ideis a restin

............

A son 30 agns che Felix Marchi al à sierade la sô liende gloriose, leade a fîl dopli cu la storie dal autonomisim in Friûl e pari dal nestri gjornâl. E nô no podìn no ricuardâlu parcè che al fâs part di chês grandis figuris che a àn iluminât il cîl fumul dal Friûl. Un profete che al à cirût cun intuizion e coerence di insegnâ al popul furlan la dignitât, la libertât, la autonomie, la sovranitât: valôrs tipics di int adulte, madure e responsabile. E il nestri gjornâl al à continuât, su chê strade, fin in dì di vuê e oltri, se o varìn salût e fortune. Tal so ricuart o proponìn un pinsîr di chel che al à vût in maniere direte des mans di Felix la proprietât e il compit di continuâ a scrivi il gjornâl: pre Antoni. (pre Roman Michelot)
Ai 26 di Lui, Felix Marchi a ‘nt varès finîts 97. Une etât di invidiâlu, a vê chel sintiment e chê sgrimie che al à vude lui fin tal ultin. E invezit, cul sclipî de Vierte, ai 17 di Avrîl, nus à lassâts. Un grant vueit par Marie, dopo une vite insiemi tant lungje e tant scombatude. E ancje un vueit pal Friûl, si ben che ogni popul, sot di ogni cîl, al è usât a viodi a soterâ i siei profetis, cuant che nol è propit lui a fâju fûr.
Ce che o volìn dî culì, tal tentâ un piçul ricuart di chest grant om che juste za cuarante agns al à inviade la Patrie dal Friûl, al è che i oms a passin, parcè che a fasin part di chê tiere che nus fâs di mari e di tombâl. Lis ideis invezit a restin, parcè che a àn une altre divignince: a son chês robis che a àn plui colegance cul trassendent, cul spirituâl, cu la eternitât, cun Diu. Par chel, o olsìn a dî che Felix al à finide la sô zornade, ma lis sôs ideis di autonomie e di libertât no son muartis. Parcè che no puedin murî, se no al finìs l’om e la storie.
Di lui al reste dut chest “sbulium”, chest ‘siminâ sot vie des ideis e dai moviments, des aspirazions e des lotis che il popul furlan, un pôc a strachis e ogni tant cun vivarositât, al puarte indenant par un avignî il plui pussibil dignitôs.
Di lui al reste chel Di bessôi che al è la bandiere di ogni vêr autonomisim.
Che se cuant che al è stât inventât si intindeve di bessôi fin da pît, cuntune ponte di autarchie (e cui aial dit che une prese no nus starès ben, co la convivence cun chei altris e je simpri plui problematiche e simpri a nestri dam?), cumò al volarà dî plui colaborazion intun stât talian federatîf intune Europe fate indiferent. Ma no si pues nancje insumiâsi di fevelâ di avignî cence la autonomie; cun suazis e contignûts diferents e adatâts a di un mont che al cambie, ma e à di restâ la pussibilitât di autodecision almancul tes cuistions di fonde.
Sul colôr e sul stamp des tendinis si pues ancje molâ.
Di lui nus reste ancje chê “radicalitât” che e à di compagnâ ogni lote autentiche.
No si pues fâ une rivoluzion sossedant. Tocje jessi determinâts. E la rivoluzion par passâ de sotanance ae libertât e je la plui grande e la plui vere; la uniche che si puedi clamâle rivoluzion. Chês altris a son dome un cambiâ paron e no puartin a nuie.
Di sigûr che no ducj a puedin «lassâ pari e mari e sûrs e fradis e cjamps», come che al dîs il vanzeli, par sposâ la cause de libertât dal lôr popul. Marchi lu à fat; al à vude la fortune e la gracie di capîlu e di fâlu. E di fat, la sô famee plui grande e la sô fiolance plui cjare al è stât il Friûl e la sô int. Par chel o vin di vêur agrât a di chescj autentics profetis, che a butin vie e che a riscjin une vite interie par valôrs che no rindin ni par cont di cariere ni par cont di bêçs ni par cont di biel vivi, e par une int che no ti fasarà mai un monument. Ma a son valôrs che a meretin; e ancje un popul al à dibisugne di chescj ferâi che i fasin lûs tal troi ingredeât de sô storie.
Al dîs un sproc dai nestri viei che par rivâ a spiegâ lis fueis tocje cjalâ lis lidrîs e par stazâ lis lidrîs si à di cjalâ lis fueis. Cui savevial, fra i benpensants, di Mediis e di Marchi? Ma cemût si spieghial chest amôr pe libertât se nissun no lu à semenât? L’amôr pe libertât, lis grandis intuizions a son come lis rosis de Vierte. A nassin tun puest, magari tal cidin o tal ombrenûl. Al pense l’aiar, dopo, a sparniçâlis e a insemencîlis ce ca ce là. E se di cualchi bande si cjate une plantute che no varès di sei, al vûl di che, di une altre, cualchidun al à semenât. E ben ancje.
E ancje une grande lezion o podìn rigjavâ in merit: che no si semene mai dibant e che i grancj oms no son mai sterps.
Par chel o podìn dî che, tal vueit fisic che nus mancje la sô presince, si consolìn e si confuartìn che nus compagnin lis sôs ideis e idealitâts. E che chel fûc che lui al à impiât za agnorums, nissun nol rivarà a distudâlu. In gracie di lui e di chei come lui. E nus console ancje une altre veretât, che le crodìn di cûr: che par ogni profete che al siere i vôi, a ‘nt nas un altri. Parcè che ogni stagjon e à la sô part di lum e ogni popul i siei profetis. Se no, dulà si laressial a rive?
Par chel che nus rivuarde, o cirarìn di ricuardâ Felix plui fasint che vaìnt, plui cjalant indenant che no indaûr, plui pontant su la sperance che lamentantsi su la pierdite. Un om come lui si pues ricuardâlu dome vîf.
Mandi Felix, polse in pâs. ❚
La Patrie dal Friûl, n. 5-6-7, Lui 1986
Pre Antoni Beline

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +