Sfuei Mensîl Furlan Indipendent
Archivi de Patrie

AGRICOLTURE. O vin nome un planet, o vin nome un Friûl

Walter Tomada
Costantini intun dissen di Gianni Di Lena
Costantini intun dissen di Gianni Di Lena

La ricete di Enos Costantini par salvâ la agricolture

“Il Friûl al varès di deventâ il prin puest al mont a bandî i diserbants chimics: dome cussì al rivarès a dâ un valôr tipic al 100 par cent ae sô produzion agricule, vinicule e ancje zootecniche”: peraule di un agronim di prin plan tant che Enos Costantini, un dai pôcs, a dî il vêr, a cjalâ al avignî des coltivazions inte nestre tiere cu la cussience che il valôr de tradizion al pues deventâ marcjât, e a capî che cori daûr ae “razionalizazion” de produzion, concet vieri, anzit frait patoc, al cope la specificitât dai nestris prodots. Sfladassâ daûr dal get big or get out al vûl dî jessi out e cence deventâ big.
In ce maniere si podaressino cirî stradis gnovis pe agricolture furlane?
O sin a “rimorchio” (lassaitmi cheste peaule taliane) de agricolture americane pal tramit de Lombardie. Ma cumò avonde California dreamin’ e nasâ lis buiacis di chei altris! Bisugne cjapâ in man il volant, o almancul il manubri de biciclete. Se no nus lassin biel discolçs, nancje in scjapinete. A coventin ideis “fuartis”. Us fâs nome doi esemplis. Al è dimostrât che par tignî sot control lis jerbatis a son avonde i mieçs mecanics, a alore avonde cui diserbants chimics! E cjalìn la viticolture: bisugne sburtâ par vê, dongje des vîts nostranis (cumò a disin “autoctonis”), ancje vîts che a resistin a malatiis come la peronospore e la fumate (Oidium). Al è di bant sglonfâ la bufule cun Parcs de Vît, Lis Stradis dal Vin e il “Vigneto Friuli” cuant che tai vignâi si fasin trataments chimics a ogni pissade di cjan. E che a vadin su la ostie Merlot e Sauvignon, chei a ju fasin in Chile e in Gnove Zelande, e magari miei di nô! Al vûl alc di diferent ancje par competi sul marcjât internazionâl. Avonde cul sotanisim californian, tai vins e tes vacjis!
Sigûr che al sarès un vantaç?
Il Friûl al podarès deventâ une realtât di avanguardie inte sô maniere di tignî cont de tiere se al olsàs a lâ cuintri dai interès des multinazionâls che a inondin (e no par di bant) di velen i nestris cjamps cence che i nestris contadins a considerin alternativis.
E alore, ancje se la preocupazion viers dai Ogm e à la sô dignitât, ma no je une atenzion nome furlane, il “bant dal diserbant” al podarès deventâ un formidabil imprest di reclam pai nestris prodots e pal nestri turisim. Altri che “Ogm-free”! Se il mont al vignìs a savê che o sin il prin paîs “Weedkiller free” nus plombaressin achì dutis lis televisions e i gjornâi dal mont e i nestris prodots, e i nestris paîs, a varessin un sburt di reclam grandonon.
Saressie acetade une inovazion dal gjenar in Friûl?
Bisugne decidi se o volìn lâ indevant o lâ indaûr. Mandâ sul osti i diserbants al vûl dî lâ indevant, dimostraitmi il contrari. Ma us fâs un esempli pratic: par controlâ lis jerbatis cun mieçs mecanics a si doprin vuarzenutis, grapis, solçadôrs, ducj imprescj che si fruin e che si rompin. Par comedâju nol covente, anzit nol conven, mandâju a Milan, al è avonde il fari dal paîs. Cussì a tornaressin lis fariis, i faris e lis faressis, a Pantianins come a Ursinins, a Talmassons come a Cerneglons. Une ativitât pai nestris paîs che a son muarts, e ator di une farie a podin nassi altris ativitâts… Une volte lu clamavin “un circolo virtuoso”… Pensâ une agricolture difarente nol è jessi mats, al è viodile lungje. Al judarès tacuin e salût.
Ma ce coventaressial garantî ai consumadôrs par fevelâ di “tipic furlan”?
Ducj a insistin sul “tipic”, e al è just. Ancje la Coldiretti la çoche sul “tipic talian”, ma nol è avonde vêle in asse cui Ogm. Se un pevaron al è fat cun tiere taliane e aiar talian, ma cul diserbant che al ven “di sepi Diu dulà” e al rione a une dite di St. Louis, Missouri, al è talian par mût di dî.
Tal prodot zootecnic: nome la jerbe e da la tipicitât. Dimostraitmi il contrari. La jerbe di Osôf no je la jerbe di Peonis (lontans un tîr di fionde) e il formadi di Osôf al jere diferent dal formadi di Peonis (bogns ducj i doi!), ducj i doi a saressin un Grand Cru! Cuintre la jerbe chei dai mangjims, e i tecnics dordei, a àn fate une vuere teribile. E cumò lis vacjis furlanis a mangjin samence di coton (o vês capît, o ai dite propit coton!). Intindìnsi: no ai nuie cuintre, e tant mancul nuie cuintre i alevatôrs (i ultins missionaris de economie), ma no stait a fevelâmi di tipic furlan! Un altri cantin: vuê ducj a vuelin i omega-3; po ben te jerbe a son i omega-3, insieme cun tantis vitaminis, che a passin tal lat, tal formadi, te spongje. La samence di coton e à il piês rapuart tra omega-3 e omega-6: timp o tart a vegnin a savêlu ancje chei che a comprin e chei gjornaliscj che a le macolin tant cul “tipic”…
Fâ il lat cu la jerbe nol è tornâ indaûr, al è lâ indevant. Dimostraitmi il contrari.
Al è lâ viers une civiltât contadine fate di une culture inlidrisade là che si nas, dulà che ogni jerbe e pas.
Ce mancjal ae nestre agricolture?
O vin dut, ma va e no va che o restìn cence dôs robis: la tiere e i contadins. Us parial pôc? La tiere a son daûr a robâle il ciment e l’asfalt, cu la complicitât de Urbanistiche regjonâl e di sindics contents di viodi gloti dai Uns mecanics cjamps e cjamps par fâ sù capanons che a restin vueits rampis. Ma un toc di tiere al jere costât secui di sudôr, di fature, di ledan; e intun marilamp un colp di ruspe lu scancele par simpri. Par simpri. E si trate, nancje a dîlu, des tieris plui buinis. O di chê metudis miei par vê un redit “di posizion”. Chescj urbaniscj e chescj sindics a àn une vision “losche”, tal sens talian e tal sens furlan, de economie e dal ben dai Furlans.
E i contadins, cui ju aial fats sparî?
No vuei dâ colpis, ancje parcè che al sarès dificil cjatâ un sôl colpevul. La Democrazie Cristiane e à “fat” i nestris contadins fasintju passâ di sotans a “coltivatori diretti”. Ben fate. Ma dopo nissun al volût capî, e tai agns Setante o jerin ancjemò a timp, che l’avignî de agricolture furlane al jere tal lavôr e tes culturis “labor intensive”, che a valorizin il lavôr, dutis culturis che in Friûl a dan alte cualitât: pomis, verduris, flôrs. Cence contâ lis latariis che a àn fat sierâ e che a vevin prodots alc e ce (chei sì che a jerin “tipics”, e bogns, e cui omega-3). Cu la monocolture nol è lavôr par trops di lôr, ve. Nome cul vin o sin lâts daûr de cualitât e mi pâr che no sei lade mâl, almancul fin cumò.
Ce puedial fâ un Comun “virtuôs”?
Ce che a la CEE o a la Regjon no i passe nancje pe cassele. Come che al à fat il Comun di Flaiban dopo dal “riordin”: comprâ terens par rivâ a un fregul di civiltât dal teritori, dal paesaç, de economie. Insome lis comugnis, no plui “di ducj”, ma dal Comun, che, ben o mâl, al rapresente ducj. Gjavâi cent etars a la blave nol è nuie; fâju deventâ mieç bosc e mieç prât al è tant. Pal Comun, pe int, pal paisaç, pal agriturisim e pal turisim tout court. I lens pe int dal lûc, la jerbe pes vacjis dal paîs. Nol è par fâ contents i birdwatchers, al è par dâi une ande diferente a la vite dal puest. Di Udin a Cividât, che tant la menin cu la UNESCO, e varès di sei dute une cjarande (parcè che il paesaç al clame turiscj, no nome ucei): lait a viodi ce che al è e ce che al è daûr a deventâ. Ma, sacrament, no sin plui tai agns Sessante!
E une famee, tal so piçul?
Mancul television e mancul centris comerciâi, il gnûf “oppio dei popoli” (lassaitmi cheste peraule taliane) . Un sflic di ort, e un pulinarut cun cuatri gjalinis, almancul il 70 par cent di lôr a rivin adore di tignîju. Cuatri gjalinis a fasin ûfs par trê fameis vuê che lis fameis a son cussì sclendaris. L’ort al vûl dî robe frescje, robe buine, vitaminis, moviment, timp par pensâ e par tabaiâ cun chei che a passin. Salût fisiche, salût psichiche e sparagn, e tal sparagn al sta il vuadagn. E no stait a fevelâmi di nostalgjie, o chês menadis li, che i curtii di une volte, plens di cocodecs e di cuacuacuacs, no tornin plui. Cumò o vin di cjalâ indevant e cuatri gjalinis a son une rivoluzion tes nestris fameis. No ise veretât? Cualchidun al à vût dite “la verità è rivoluzione” (lassaitmi ancje chest par talian) . No sarà migo nome Michelle Obama che e à di tignî l’ort, nomo?
E i nestris boscs?
I “tecnics” forestâi di dopo de ultime vuere a plantavin peçs pardut lant daûr de coniferomanie gjermaniche e cussì al è vignûi indevant il bosc “neri”; faiârs, frassins e rôi a son lâts al mancul. Par no dî che a àn impestât il paesaç ancje sui cuei e tal plan dulà che un peç al è di cjase tant che un bananâr. Cumò, par furtune, a àn une idee plui “naturalistiche”. ll bosc al è un mieç par fâ economie in mont e ancje chi al torne il “tipic”, il len “nassût e cressût” intun puest. Il bosc al à di diventâ ancje economie pe planure; cui che al à blecs e sflics di teren no i conven di meti blave, ma il bosc i conven. Dopo 8-10 agns al pues benzà fâ lens di ardi.
Sino su la linie de “decressite serene” di Serge Latouche?
O crôt di sì. Ma tocje di considerâ il concet di “bioregjon” di Latouche, se no dut ce che o ai dite prime si pues butâlu tal mussulin.
Che al sarès?
Latouche nol cognòs il Friûl e i Furlans, fûr di chei cuatri inteletuâi, no lu cognossin lui. Nô o vin di bisugne di une robe che no vin, che no vin mai vude, tant che la peraule nancje no esist te nestre lenghe e o scuen dîle par talian: l’orgoglio. O vin bisugne di une buine flebo di orgoglio; ancje Latouche al vignarès de mê. Nome se o vin l’orgoglio de sei Furlans al ven fûr un fuart moviment autonomist, cun ideis claris su agricolture, ambient, teritori, paesaç, economie. Nome cussì chês ideis “fuartis” che o ai dite prime no somearan sparambacui di ridi plui che di butâ tal mussulin, ancje parcè che di mussulins no ‘nd è plui!
Però visìnsi che o vin nome un planet e che o sin daûr a roseâ par trê planetis, e visìnsi che o vin nome un Friûl! ■
Walter Tomada

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +