VIERTIDURE. Simpri plui voie di lenghe furlane

A son 39 mil 236 tra fruts de scuelute, des elementârs e des mediis che a àn domandât di vê insegnât il furlan a scuele a partî di Setembar cu ven. Un sucès tal prin an che l’insegnament de lenghe al jentre a dimplen tal curriculum scolastic, cun almancul une ore par setemane par cui che le à sielte.
Un sucès par vie che a son passe 9 mil i students in plui che a àn fate domande rispiet a l’an scolastic passât, ven a stâi une incressite dal 29%. Cun di plui, la percentuâl e je lade parsore dal 50% in ducj i Comuns che a fasin part dal teritori considerât furlan e i numars a son stâts une vore bogns ancje in provincie di Gurize e di Pordenon. Al somearès scuasit che ur tocji ai plui piçui (in gracie des lôr fameis, ancje chês dut câs zovinis) ricuardâ a ducj che il Friûl no si è suiât dentri dai confins de provincie di Udin.
Cussì, a Gurize e Pordenon la medie des domandis e je stade dal 55% e tal teritori provinciâl di Udin si è rivâts al 74%.
“Une risulte che e met coragjo – al dîs l’assessôr regjonâl ae Istruzion, Roberto Molinaro –, propit cuant che il Guvier di Rome al à declassât la lenghe furlane a dialet locâl, tant che o vin di fâ ricors ae Cort Costituzionâl par difindisi di un at che al è cuintri ogni ordenament”. La rispueste che je stade dade in forme volontarie, al continue, e mostre che “achì no si trate di une sielte di pôcs, ma de maiorance des fameis. Une domande che la scuele e je clamade a dâi rispueste. Il Guvier regjonâl – al zonte – al fasarà la sô part frontant lis dificoltâts di caratar operatîf e economic, te plene cussience che lis lenghis mancul pandudis a continuin a jessi une des fondis de specialitât regjonâl”.
Intant par chest an e pal an che al ven la Regjon e à metût un milion di euros par l’insegnament tes scuelis. Cun chescj bêçs cul gnûf an scolastic si podarà scomençâ a insegnâ tal asîl e tes scuelis elementârs a 31.600 fruts. I insegnants a saran chei che a comparissin te liste fate da Regjon davierte e a chei che a àn lis carateristichis domandadis, in cont di cognossince sientifiche de lenghe e dal insegnament. ■
Antonella Lanfrit