Ancje cumierç, turisim e servizis cumò a clopin
Une volte un vecjo sindicalist, che cumò nol è plui, mi à dit: «Fantat, tal mont come che lu cognossevi jo, par dâi lavôr a cualchidun tu vevis di produsi alc. O dai cjamps, o des fabrichis, o dai laboratoris artesans alc al à di vignî fûr. Se no, ce si vendial? Se no, ce si mangjial?». Vuê cheste mentalitât e je sorpassade: e il Friûl, come la plui part dai sistemis economics dal Ocident inte ete de globalizazion, al à une economie une vore “terziarizade”. Une volte i servizis a jerin une part limitade, cumò a son il telâr de economie furlane. Soredut par ce che al tocje il numar di impresis e i puescj di vore. Se o pensìn che vuê la agriculture e da lavôr al 3,3 par cent dai furlans e la industrie al 29,4, o podarìn inacuarzisi che plui di 2 furlans su 3 a son dipendents dal setôr dai servizis. Si fevele di 340 mil personis ocupadis in chest cantin. E cuant che il terziari al mole, dute la nestre economie e clope.
I ultins dâts dal cumierç e de fiducie dai operadôrs dal terziari a son pardabon preocupants, ancje parcè che i servizis si stan simpri di plui globalizant. Dal rest, dopo che tai agns ‘90 tantis industriis furlanis a àn delocalizât o a son passadis in mans forestis, cumò e je rivade une altre gnove. Il fat che Amazon al vedi viert un centri di distribuzion logjistiche in Friûl, ancje se a cualchidun i somee robe di nuie, al è une vore significatîf in merit al pericul di “delocalizâ” ancje la part dai servizis, e ancje se la situazion dai volums di afârs si è stabilizade, dopo agns di crisi, l’aiar che al tire al è clâr a ducj.
Se tai agns ‘90 e prins doi mil il colp al cumierç al è vignût dai centris comerciâi (al è ben visâsi che o sin la prime regjon di Italie pes areis di vendite de grande distribuzion in rapuart al numar dai citadins), cumò al è il business online a tirâ un sdrondenon. Par chest, la fiducie dai operadôrs dal setôr terziari e sta lant di rive jù di 9 mês e no somee mostrâ grandis pussibilitâts di miorament. Burocrazie, tassis, concorence di ogni bande, e un cuadri politic che nol jude: a son chescj i fatôrs che a preocupin di plui – daûr di un scrutini dal Osservatori Confcommercio Friûl-Vignesie Julie -, ma al è soredut no viodi une riprese vere e proprie che al fâs tremâ lis impresis dal cumierç e dai servizis. Che di fat a son simpri di mancul: in regjon si stime che ae fin dal an a saran nassudis 5.708 impresis gnovis (4.321 tal terziari, 1.387 in chei altris setôrs des ativitâts economichis), ma 6.269 a saran stadis sieradis (3.975 tal terziari, 2.294 in chei altris setôrs), cun 561 impresis in mancul: e no saran pocjis!
Dut câs, cumierç, turisim e servizis tai ultins 10 agns a àn tignût stabil il numar des impresis ativis intant che industrie e agriculture a pierdevin il 20 par cent di unitâts produtivis, ma cumò ancje lôr a clopin, e la prevision no salve nissune des provinciis. La domande interne e je colade une vore, e ancje se in cualchi contest la fiducie e je plui alte (par esempli tal setôr turistic), a son situazions che si presentin pardabon une vore preocupantis come chê dai piçui esercents: lis impresis cuntun numar di dipendents sot dai 9 a pain cjâr il nivel bas dai consums.
Problemis a son ancje sui presits dai furnidôrs: lis impresis dal terziari a crodin che la situazion e sedi lade in piês, ven a stâi che la materie prime e costi une vore di plui. E, pe prime volte dopo doi agns, si segnale ancje che si è fermade la dinamiche positive che e veve finalmentri scomençât a scurtâ i timps di paiament, che cumò a tornin a slungjâsi.
Altre situazion di vuardie e je chê dal credit, parcè che il rapuart cu lis bancjis al sta deventant simpri plui critic. A son caladis lis impresis che a àn domandât un prestit o la rinegoziazion dai interès tai prins trê mês dal 2019: il 29 par cent cuintri dal 29,5 par cent. E pues someâ une flession piçule, ma e je calade ancje la cuote di impresis che cuant che a àn domandât bêçs si son sintudis a dî di “sì”: il 69,2 par cent cuintri dal 70,5 par cent. E dome il 48,7 par cent al à vude la cifre che al à domandade: il 20,5 par cent invezit al à podût vê dome une part di ce che i coventave. Il 12,8 par cent des impresis si è viodût refudât il prestit e al 18 par cent a àn ancjemò di dâi une rispueste. La “strente creditizie” cuindi no je un sium, ma une realtât che e glot tantis des sperancis de int che e à voie di lavorâ e di produsi.
Ancje parcè che a son simpri di plui chei che a comprin su internet invezit che tes buteghis: il 76,2 par cent al à internet e 319 impresis in regjon aromai a vendin dome online. Ma l’e-commerce nol à regulis e par chest al jentre in conflit cul cumierç tradizionâl. In particolâr, il plui grant distributôr mondiâl online, Amazon, al gjolt di facilitazions che chei altris no àn su fiscalitât e passaçs burocratics. Par chest, l’insediament in Friûl dal colòs american nol è une buine gnove.
Cemût fasaraial il compart a sorevivi a cheste gnove sfide? La sperance e ven soredut dal turisim dulà che la curve des rivadis e des presincis e je stade positive tai ultins agns. Ma par chei altris? La rispueste che e ven dai analiscj e je simpri chê: bisugne pontâ su la inovazion e meti adun lis fuarcis par jessi simpri plui dongje dal client. Nol è dit che al basti, ma chescj elements a son dal sigûr necessaris a frontâ l’avignî cuntun sproc plui seren. Se po i furlans a imparassin a jessi mancul “talians” in fat di burocrazie, si riclamaressin ancje plui invistiments che a vegnin di inaltrò su la economie reâl. E forsit, i nûi de inciertece a fasaressin mancul pôre. ❚
Walter Tomada
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +