Tal numar di Dicembar us vin contât ducj i segrets par fâ un bon brût, e sperìn di vêus dade une man par prontâ grandis cenis di Nadâl e di Prin dal an. Cumò, però, o sin in Fevrâr, e il probleme che a àn in tancj al è il frigorifar plen di vanzums. E si sa che – se ogni mone al è bon di fâ il “gran gourmet” copiant une ricete di un libri – dome un cogo seri (o une femine di cjase di sest, che e je in pratiche le stesse robe…) al cognòs la art di prontâ grancj plats doprant ce che al è restât tal frigorifar.
Provìn alore a dâ cualchi consei su cemût riciclâ (e duncje sparagnâ) ta chest mês, doprant magari propit i vanzums che us son restâts dal gran brût preparât pes fiestis.
Us vevin bielzà contât il fat che par fâ un bon brût si doprin, par solit, tais di cjar avonde puars: la gjaline, il dindi, i vues e i tocs di manç che par solit no si doprin par fâ un bon les, no avonde saurîts e tenars di podê jessi mangjâts cussì, di bessôi, cul cren o cun altris salsutis.
Se o vês fat ben il brût, la cjar che e vanze e je suiade, fibrose, e e sa di pôc, par vie che ducj i siei savôrs si son smolâts te aghe. Cjar che, dut câs, al sarès un pecjât butâ vie, e che invezit e pues jessi doprade par inventâsi alc di saurît…
LA OPZION CLASSICHE: POLPETON E POLPETIS_ La plui tradizionâl des opzions. E nol è un câs che lis polpetis si cjatin simpri tes nestris ostariis, parcè che cogos e ustîrs a san ben che a son la soluzion plui pratiche par riciclâ dut chel che al è vanzât in cusine la dì prime.
Il procediment al è simpri chel, facilissim: si partìs de cjar lesse taiade prime a tocuts, ma ancje des verduris dopradis pal brût. E i culuts dai salums, l’ultin toc di salam, o cualchi fete vanzade di persut (la regule base e dîs di doprâ simpri un toc di mortadele, che e da savôr e consistence plui fofe), cence dismenteâsi che tal banc dai frescs dal supermarcjâts si cjatin ancje tocuts di salums rivâts insom che no costin nuie.
Une volte passât dut tal masanin (chel a manoele dal becjâr, cul mixer nol ven compagn), si lee dut cuntun ûf, si zonte pan sec gratât, une grampe di Grana gratât, jerbis taçadis (savôrs, ai, o ce che us plâs), sâl, pevar, un pêl di nole moscjade, cuntun got di lat se l’impast al è masse sec.
Une volte che l’impast al è ben misturât, cuntune part si pues fâ un biel polpeton, di rundulâ biel strent te cjarte di for e dopo metilu a cuei tal for cjalt. Cu la cjarte di for no covente altre cuince, parcè che la cjar e je bielzà cuete e al baste fâi fâ un tic di crostute (magari cuvierzêt cuntun sfuei di stagnole, che no si secji masse, che se no si romp).
Se invezit o decidês pes polpetis (ma si pues fâ dutis dôs lis robis cul stes impast), bisugne fâ lis balutis cu lis mans, passâlis tal pan gratât e butâlis a indorâ tal vueli ben cjalt (impensaitsi che plui piçulis lis fasês, mancul a stan tal vueli, e a son plui lizeris e plui versatilis, magari di butâ tal sugo di pomidoro par cuinçâ la pastesute).
Tant il polpeton che lis polpetis si puedin meti vie tal frigorifar ben sierâdis par cualchi dì: si scjaldin intun moment tal for cjalt o te fersorie, e si puedin cuinçâ cun sugo di pomidoro, cun senape, cun maionese o cun ogni salsute che us ven tal cjâf.
LA OPZION ESOTICHE: IL “LES AL CURRY”_ La idee e je chê di inventâsi un plat dal savôr asiatic, tant che un “poleç al curry”, cu la cjar lesse vanzade taiade a strissulis, saltade te fersorie a flame ben alte, cuntun got di vueli e verduris (cavoçuts, carotis, cevole…) taiadis a cidulis, tignudis “al dint”, tant di vê une sorte di “stufât” cuntun cimi di tocj (zontant magari une tace di brût, par fâ la “bavute”). E di saurî cuntune biele dose di savôrs esotics, tant che curry, chili e vie indenant. Di puartâ tal plat cuntune biele dose di rîs bulît, miôr se basmati o de cualitât doprade dai Cinês.
LA OPZION MODERNE: IL PATÈ PAR FÂ PANINS_ Se us capite dispès di fâ panins (magari pe mirinde dai fruts, o pal ghiringhel tai prâts la domenie), une grande opzion di riciclâ il les e je chê di fâ une specie di patè, come chel che si compre tai negozis (sul gjenar “Spuntì”). La cjar e je bielzà cuete, cussì no covente trop, se no taçâle ben fine tal mixer, leant cun vueli di ulive, cun maionese o cuntun formadi cremôs. E di saurî in dutis lis manieris che us vegnin tal cjâf, butant dentri tal mixer, insieme ae cjar, ulivis, capars, pomidoros secs, foncs, savôr (ancje, parcè no, il pevaroncin). Cuntun bon pan fresc, une biele fuee di salate, dôs fetutis di pomidoro e une biele spalmade di un paté fat cussì in cjase, o varês un panin origjinâl, saurît e di sigûr gjenuin (di sigûr, plui bon e san di tantis alternativis industriâls, e – se no si esagjere cu la maionese o cul vueli – fintremai plui dietetic di salums plui impegnatîfs).
Jessint cjar cuete, se us vanzarà, o podarês tignîle par un pôc intun vasut di veri ben sierât, tal frigorifar. No tant che i prodots industriâi, ma par une setemane e ten (magari une lagrime di vueli parsore, tal vâs, e jude a no ossidâsi). ■
Margherita Timeus
(L)Int Autonomiste / Al esam di maturitât cu lis dispensis sul nestri sît
Dree Valcic
✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.✽✽ Si cjatìn di fat […] lei di plui +
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +