Sfuei Mensîl Furlan Indipendent
Archivi de Patrie

CULTURE – TELEVISION, CINE E TEATRI. Chel sun di cjampanis…

............

CJAMPANIS DI ÎR E DI VUÊ_ Chel sun di cjampanis e chel lôr segnâ lis zornadis te buine e te malesorte…Ce tantis gjenerazions e ce tancj câs de vite che a àn viodût lis cjampanis dai nestris paîs! Cjampanis che cumò masse spes a restin cidinis, metudis a tasê par lassâ puest ae pice di lâ simpri di buride, sclâfs di dut ce che o butìn dentri te vite par cirî di dâi un tic di savôr, che po dopo no nûl di nuie, se no di vueit e di marum. E pûr, chês cjampanis une volte a batevin il timp, un timp che al jere jemplât di valôrs, di condivision, di umanitât.
IL DOCUMENTARI_ Propite sul ricuart des cjampanis si svilupe il documentari metût adun dai “Pignots de Companie Instabil” di Dartigne. Dut si davuelç a partî des memoris di une fie di emigrant, Anna Maria De Monte, la anime dal grup, che – cjapant il sburt dal leam di letare cul cugnât emigrât in Americhe dal Sud – e sielç di ricuardâ in chês missivis scambiadis cun lui la vite di un timp. E lu fâs doprant, cun rare poesie e bielece, la lenghe dal cûr e dai afiets plui sancîrs: il furlan, o miôr il pignot, te gheade dal sô paîs.
Ve alore pituradis tantis senis de esistence, incurnisadis de vôs des cjampanis, a voltis legre par puartâ la gnove di une nassite di sperance e a voltis dolorose e lente pal ultin viaç teren, une vôs che si spandeve tal cîl fodrât di stelis de Gnot di Nadâl, tra l’odôr di broade e di polente sul spolert, che e taseve tal Vinars Sant, ma che e deve grant spetacul di se te fieste de Pasche, lant daûr al cori di ogni stagjon…Un sunôr che al jentrave tal cûr de int, al fevelave des promessis dai nuviçs denant dal altâr, al tirave dongje i fruts par confessâ al predi simpri lis solitis baronadis, al faseve companie aes feminis che a viodevin partî i lôr oms ator pal mont, al visave dal burlaç o dai pericui…
Chest in struc il contignût de opare visive, che e puarte la regjie di Stefano Marzona e e je insiorade des musichis di Lorenzo Tempesti e dai cjants popolârs eseguîts dal Coro “Gotis di Notis” di Cjassà e dal coro di fruts de scuele primarie di Flaiban: in sume, cuadruts di vite furlane, recitâts dai zovins di vuê, par un profont e comovent percors da la anime.
IL MESSAÇ_ Ma no je dome nostalgjie, ven a stâi chel fregul di lancûr par un mont che nol è plui e che mai al tornarà. Al contrari, il documentari cun sapience, gracie e finece, al vierç al spetatôr une grande domande: cumò ce fin àno fat chês cjampanis? Isal dut smavît? Lis cjampanis vuê a semein no vê nuie di dî. Invezit, ancje se tal cidinôr, nus mandin un messaç: che no sin fats dome di cuarp che si lambiche par stâ tal mont, ma ancje di une anime che e va nudride e di une lidrîs che forsit no je dal dut flape, se riscuvierte cun spirt gnûf e rignuvît.
Par vê une copie dal DVD o podês clamâ il numar de Associazion “I Pignots”: 0432 987349 o scrivi ae direzion: vie Udine, 22/A-33011 Dartigne/Artegna (UD).
Ilarie Colùs

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +