Sfuei Mensîl Furlan Indipendent
Archivi de Patrie

CULTURE – CUSINE. Cuant che caprese e rîs ae greghe ti van fûr dai voi

............

Dopo vê esplorât – tai numars passâts – cualchi gnove idee pai plats unics (robant sugjeriments aes cusinis dal mont), e par une gulizion un tic diferente dal tradizionâl “cafelat cui biscots”, chest mês – par lâ indenant cuntun piçul viaç intun gustâ che al sedi un pôc difarent dal solit ma ae puartade di ducj – o frontìn il cjalt di Lui e di Avost. Che al è une robe che no va par solit masse dacuardi cu la voie di mangjâ, tant che dispès si finìs par “butâsi” su salatis e afetâts, “caprese”, persut e melon, bresaole e rucule, o il solit “risi ae greghe”.
Robis che a van benon, vêrs “evergreen”, ma che – a tirâ indenant cussì par dut l’Istât – al è di stufâsi. E alore, viodìn di proponi cualchi ricetute facile facile par inventâsi un gustâ che al sedi lizêr ma ancje sostanceôs, e che al deti un tic di sodisfazion ancje ai plui golôs. Dutis robis di parecjâ magari di sere, di meti in frigorifar par cjatâsi doman a misdì un gustâ pront, biel e saurît…
LA SALATE DI PASTE:
PAR ZUIÂ DI FANTASIE
La salate di rîs e je simpri une opzion valide, un rîs bulît cetant banâl cuinçât cun ton, pomidoros, mozarele o formadi fresc a tocuts, blave lessade, rodelis di wurstel, ulivis, maionese e vie indenant (lassant se si pues di bande chei prodots pronts che dispès a san masse di “vueli di bussulot”).
Ma la fantasie nol è dit che e vedi di fermâsi ae cuince, parcè che nuie nus improibìs di cambiâ il rîs cu la paste, cuete e disfredade sot la aghe curint. O ancje cul cous cous o cuntun altri cereâl (vuardi, pirespelte, forment), parecjâts te stesse maniere. E po dopo, dispiticâsi cui ingredients di meti dongje, e cun vueli di ulive bon par leâ dut.
Cualchi ideute svelte svelte:
– SALATE DI PASTE “AE NIZARDE”: simiotant la famose “salade a la niçoise”, cuinçâ la paste frede cun filets di sgombri (miôr se frescs e lessâts), dôs sardonuts sot sâl, pomidoro a tocuts, ûfs dûrs taiâts in cuarts, cualchi fetute di civole taiade a vêl, cualchi vuaine lessade, vueli e une biele grampe di jerbis di Provence taçadis (rosmarin, tim, basili, savôrs, salvie, e – se al plâs – un cimi di ai).
– SALATE DI PASTE “AE GREGHE”: cun cuadrei di “feta” (il formadi grêc che ormai si cjate pardut), pomidoros, cudumars a fetutis, cidulutis sutilis di civole blancje, ulivis di chês brunidis (e se si le vûl plui sostanziose, ancje cuntun tic di ton).
– COUS COUS “AE SICILIANE”: cuinçâ il cous cous frêt cun melanzanis passadis in padiele cuntun tic di ai, une spolvarade di pevaronut e cualchi sedon di passade di pomidoro (il dut di lassâ disfredâ), formadi di piore a cuadrei e une grande spolvarade di mente secje (invezit dal formadi si pues doprâ pes spade o ton fresc a dadui e a pene rosolât su pe gridele).
– FORMENT (MA ANCJE PIRESPELTE O VUARDI) “AE RUSSE”: cun verduris taiadis a cuadreluts e lessadis a vapôr (vuainis taiadis piçulis, cesarons, carotis, blave), tant che par une “salate russe”, e persut cuet a tocuts, leant dut cun maionese.
– PASTE “AE SONIA GANDHI”: intune pignate, rosolâ intun got di vueli un cimi di cevole a vêl, melanzanis a dadui e un meluç gherp a fetutis, lassâ stofâ e cuinçâ ben ben cun curry in polvar. Lassâ disfredâ e zontâ ae paste, leant cun yogurt intîr e mente secje (e semee une robe strane, ma – cerçade – e à il so parcè…)
SE INVEZIT US VA UN SECONT…
… ma no podês plui viodi i afetâts, e la fetine di cjar propit no us va:
– Il bon vecjo “ROAST BEEF A LA INGLESE”, il rost plui facil dal mont (al baste un biel toc di manç ben leât, ont e salât par fûr, e metût tal for cjaldissim, un cuart di ore par chilo di cjar, e lassât disfredâ prime di taiâlu), bon di gustâ frêt insieme a une buine salate di lidric, pomidoros e cudumars. Se si à la machine di taiâ in cjase si prepare intun moment, si ten in frigorifar il toc intîr ben sierât te pelicule, e une famee medie e pues vêlu pront par almancul dôs o trê voltis.
– UN TORTUTE ESTIVE DI CARTUFULIS e pues jessi une gran buine idee: si lessin lis cartufulis ben ben, si messedin sfracajantlis cun sotasêts a tocuts, capars sot sâl e une scjatule di ton al naturâl; si presse intune forme di plum-cake ont par dentri e si lasse disfredâ tal frigorifar. Dopo si capote sul plat, si cuvierç di maionese e si decore cun cuache fetute di cudumar sot asêt. Perfete cun cuatri fueis di lidric, servide interie in taule e fâs la sô figure…
– PAR UNE ROBE PLUI “RICERCJADE”, ma dut câs di sigûr facile, a son i “POMIDOROS A LA INTERNAZIONÂL”. Vâl a dî pomidoros di salate biei ros e madûrs, taiâts a metât par lunc e svuedâts. Si implene la buse cun ton al naturâl misturât cun maionese, e parsore si cuvierç cun ûfs dûrs taçâts, fasint metât de cupule cul blanc, e metât cul zâl taçât cuntun tic di savôrs, e une ulive nere insom. Facii facii, frescs, e il figuron al è sigûr.
Margherita Timeus

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +