CULTURE – Palme d’Aur, vitorie des Malpepate

Si clamin Malpepate lis vincidoris de Palme d’Aur 2011. Fedina, Giuly, Tizzy e Clelia a son lis miôr vôs di feminis de cjançon furlane premiadis tal concors organizât de citât stelade. Cun lôr sul palc ancje três “forescj”, i boys de formazion: Maurizio Malduca, Luca Bertoni e Federico Pittino. Il grup, une vôre “speziât”, come che al dîs il non – costituît des primis silabis dai lôr cognons: Malduca, Petris, Patrone e Tellini – al à convincût la jurie popolâr, tant di bati la triestine Marnit e Rebi Rivale di Udin, rivadis secondis in paritât. Il premi de critiche al è lât invezit ae zovine Giulia Daici. Speciâls ancje lis ospitis: la nestre Claudia Grimaz (cun dôs poesiis di Pierluigi Cappello) e la pop-star slovene Tinkara, che o vin intervistât ta cheste pagjine. Classifichis a part, la vere vincidore de serade e je stade la musiche feminine in marilenghe, grazie ae biele iniziative dal diretôr artistic Alberto Zeppieri e de associazion Numar Un, cul contribût dal Comun di Palme e de Provincie di Udin. Sperìn che il prossin an, o ‘nt sintarìn fevelâ un pôc di plui.
NATASCIA GARGANO