CULTURE – MiG-29 over Disneyland

Al à fât la sô prime aparizion suntun palc propit ae grande fieste “Viva Onde Furlane”, ai 15 di Otubar passâts. Un inizi che dal sigûr al sarà di bon auspici pal gnûf lavôr “2 plui 2 nol fâs 4” dai MiG-29 over Disneyland, che cheste volte a ‘nd àn fate une di curiose: te custodie dal cd, no si cjate un, ma 3 discs, un par talian, un par inglês e un par furlan (etichete MFF). Cjargnei di “Tumieç city”, i 4 zovins – 26 agns la etât medie – a àn come lenghe favoride, o vin di dîlu, l’inglês. E l’inglês a àn simpri doprât fin de nassite dal grup tal 2008. Po, la partecipazion a un Premi Friûl e “il pinsîr di provâ a scrivi in marilenghe”. Risultât? Nuie mâl: “il furlan come l’inglês al funzione – miôr dal talian – pal gjenar”. Cuâl gjenar? Un miscliç di punk, rock e pop cun influencis “rafredôr… dance, reggae, ska”, metint un pôc in bande in chest ultin lavôr la lôr origjin, il grunge, par sperimentâ cjançons plui gjoldibilis e mancul “duris” di scoltâ. Chest an al sune cu la formazion – Damiano Palla/vôs e bas, Andrea Losanni/ghitare e vôs, Alessandro “Forgjarie” De Cecco/batarie, ghitare e vôs, plui il fonic Luca Rainis – ancje Alessandro “Bean” Fusetti (ex Vanilla Resident), ae batarie e ghitare. Il toc “Cence bêçs” al è, par lôr stesse amission, la autobiografie dal grup. Par capî: cuant che a son lâts a regjistrâ li di Riccardo Pasini tal Studio 73 di Ravenna, “o vin cuasi vût di vendi i struments par paiâ il cd”, a scrivin cun ironie te lôr pagjine Facebook. Il disc al è stât po dopo rifinît di Roberto Rainis di Tumieç. Trasfierte a part, di fat, dut al nas intune sale provisorie tal mieç di un bosc pierdût in Cjargne (“dulà che cuant che al plûf, il canâl al stramonte scjariant mil litris di aghe esatementri denant de puarte. Di Invier si glace, di Istât si scjafoisi”). Pal rest, nissune ciertece, come che 2 plui 2 nol fâs 4. Une ultime robe: lait a viodi il videoclip par inglês di presentazion  dal album, “No Money” (regjie di Elettra Bertucco), dopo scoltait chê stesse cjançon te version furlane e… provait a viodi l’efiet che al fâs.
Natascia Gargano