CULTURE – “D’incjant, l’incjant”

Tirâ dongje di dut il mont curtmetraçs sul teme dai mîts, des flabis e liendis popolârs: chest il sium dal Istitût pe ricercje e promozion de civiltât furlane “Achille Tellini”, un sium deventât realtât tal 2009 cun la butade dal Festival internazionâl di curtsmetraçs su chest sogjet, imbastît cul intindiment di “no fâ murî te indiference e te apatie des istituzions ni tal tsunami de globalizazion” chel patrimoni di contis che a animin lis tradizions dai paîs dal mont, come che a àn dite il President de Comunitât Culinâr dal Friûl, Lorenzo Cozianin, e il President dal Istitût “Tellini”, Luigi Geromet.
LA MANIFESTAZION_ Il festival, che si ten ogni doi agns e al è organizât cul jutori de Regjon, de Provincie di Udin, de Comunitât Culinâr, dal Comun di Colorêt di Montalban, al puarte un titul che al fevele di bessôl: “D’incjant, l’incjant”. La sô seconde edizion si è davuelte tal biel cjistiel di Colorêt ai 14 e 15 di Otubar. In dôs zornadis il public al à podût viodi vincj storiis, contadis di regjiscj che a àn savût mostrâ cu la lôr machine di prese la tenarece che si plate tes flabis pai fruts, ma ancje il patiment di tantis vicendis umanis.
PELICULE FURLANE_ Tra i lavôrs presentâts al à risaltât il furlan “Glereon” di Giulia Cignolini e Alex Ordiner, sielzût dal public come il plui biel de rassegne e preseât ancje come il miôr curt intune lenghe minoritarie, par vê contât par furlan la liende cjargnele (ricuardade ancje di Carducci inte sô poesie “In Carnia”), sul cont di un om, Silverio, destinât a spacâ pieris sul mont Pramosio (che in efiets al è plen di claps che a sbrissin jù a val), come condane a vite par vê comprât cul sperzûr la proprietât de mont.
I VINCIDÔRS_ Il prin premi de jurie, cun a cjâf Guido Sut, al è lât a “Intercambio” di Antonello Novellino e Antonio Quintavilla di Salerno che, creant tension e sens di fatalisim, a àn poiât la atenzion sul teme atavic de fam e di ce che l’om al scuen fâ par sorevivi. Il secont puest par “Buonanotte” di Riccardo Banfi di Saronno, che al à buride fûr une pelicule lizere, frescje e briose, ambientade tal cûr de gnot. Tierç al è rivât “7 a ritroso sortirà 7” di Francesco Niccolai di Reggio Emilia, plasût pal zûc di spielis che al à ideât, sledrosant ogni sene e spostantle tal timp e tal spazi tun clime di pôre e ingôs che al cres man man. Segnalâts ancje Enrico Sotgiu (in “Io sono qui”) e Giuliana Abagnale (in “Buon compleanno mamma”), come miôr atôrs protagoniscj e Giovanni Macelli cun menzion speciâl par “El misterio del pez”.
A incurnisâ il dut e je stade cun di plui inmaneade la mostre “Friûl di magance” di Luigino Peressini che al à metût adun intune mape de regjon lis figuris di fantasie dai nestris boscs, monts, lâts e planuris furlanis.
Ilarie Colùs