CULTURE – LA FABRICHE DAI… LIBRIS. Gnogosauros, tierce ete

“Gnognowood”! Al è il gnûf lavôr di Dree Venier. I siei fumuts, chê volte achì, a scuvierzin il mont dal cine. Une saghe, chê dai Gnognosauros, che e je rivade a la tierce edizion, indulà che lis primis dôs a son ladis finidis in pocjissim timp. Un sucès no di pôc, ancje sintint Dree: «nol è facil rivâ a vendi lavôrs scrits par furlan, indulà che la plui dai furlans no son usâts a lei ta la lenghe che a fevelin, ma al è un input impuartant chel di rivâ a invertî la tindince, partint propit, dai fruts». Il lavôr al nas tal cjâf di Dree, a Milan, al ven staronzât ta senegjature a Rome di Elisabetta Pittana, burît fûr a Pordenon e vendût in dut il Friûl. Un viaç par furlan ator pe Italie, passant pal cjâf e la passion di furlans sparniçâts ator, propit come se a fossin dai nûi o fumuts che a la fin a tornin chenti. I Gnognosaurs a nassin, tal 1996, strichis dal setemanâl “La Vita Catolica”. Une realtât deventade popolâr; cuasit ducj i fruts a cognossin lis vicendis di chei dinosaurs che a tabain par furlan, cuasit un paradigme de dibisugne di une glagn che e pei la cussience di un passât cu la realtât di vuê. Dree nus conte di une vernîs fate tun locâl di Milan, dai siei fumuts in lenghe mari: «La robe che mi maraveave e jere che nissun mi à fat “critiche” su la decison di doprâ il furlan pai miei Gnognosauros. A restavin, invezit, inmagâts da la someance cun altris lenghis neo latinis, francês o spagnûl: un fumut speciâl ancje pal mût di esprimisi». Une sodisfazion che e puarte Dree a meti i Gnognosaurs ancje tal mont dal web, vie Facebook, blog e zûcs in rêt. Une maniere gnove di proponisi par personaçs che nus contin, in aparence, storiis lontanis.
Dut câs, cjalant il titul, la suaze miôr pe presentazion dal tierç volum, no podeve jessi che te setemane dal Cine par furlan a Udin, sabide ai 26 di Novembar a lis 18.30 li de librarie dal cine Visionario, vie Asquini 33. Lì Dree, al darâ il vie uficiâl a la tierce raculete, vint come editôr “La Vita Catolica”. O vin domandât, par finî a Dree, se a saran altris seguits, lui nus à dome dite… «si zontaran novitâts» e a nô, nus restarà dome la gole o il torment di spietâlis.
Mauro Della Schiava