FURLANS, DIGJITAIT FURLAN – Apple, un brand globâl cun pôc interès pal locâl

Piçule recension su trop che la aziende di Steve Jobs e je “amie” des lenghis plui piçulis
Ai 5 di Otubar dal 2011 al è mancjât Steve Jobs, fondadôr insieme cun Steve Wozniak de Apple, aziende americane che al à po mandât indevant par un grum di agns. Un event che al à scjassât il mont dai media di dut il mont, ma cemût si compuartie Apple cul furlan e cu lis lenghis mancul dopradis tal web?
LA FILOSOFIE_ La Apple e je nassude tant che aziende di computers intal lontan 1976 e tai ultins dîs agns si è spostade planc plancut vierç setôrs tecnologjics diviers come chei de musiche e de telefonie. Cheste mosse è a vût un grant sucès, stant che di Avost la Apple e je deventade la aziende cun plui valôr in dut il mont.
La filosofie di Apple e je stade simpri particolâr: il sproc classic de cjase americane al è “Think different”, par mostrâ la voie di diferenziâsi dai dominadôrs dal setôr, de IBM fin ae Microsoft. Par rivâ a chest, i siei prodots a àn simpri vût inovazions, pensìn par esempli a une des primis interfacis grafichis (“a barcons”) de storie, ma daspò dai sucès dai prins agns ’80 e à simpri pierdût a nivel di venditis tai confronts de Microsoft, e Steve Jobs al fo ancje parât vie de sô  aziende.
UN GNÛF INIZI_ La rinassite e rivà ae fin dai agns ’90, cuant che Jobs al tornà a cjapâ in man lis robis e soredut sul tacâ dai agns 2000: tal 2001 al fo presentât il prin iPod, che al rivoluzionarà il marcjât dai letôrs musicâi e tal 2007 al rivà il prin iPhone, che al cambià il panorame dai celulârs, fin a chel moment dominât di Nokia.
Ma lassant di bande l’aspiet globâl, cemût si presentie la aziende dal miluç tai confronts des minorancis linguistichis e in particolâr de marilenghe? Il software Apple al è simpri stât caraterizât di une mancjance di personalizazion: la idee e jere chê che l’utent al veve za dut configurât, duncje nol podeve ni i coventave cambiâ opzions pai particolârs plui piçui. Cheste idee si riflet ancje sul supart pes lenghis, che nus interesse plui di dongje.
CEMÛT CUL FURLAN?_ Al moment, il software Apple al è dividût in dôs fameis: il MacOS X, il sisteme operatîf “classic”, pai computers, e iOS, chel pai dispositîfs mobii. Tal prin câs, lis lenghis supuartadis a son 22 e a son dome chês plui impuartantis. Tal secont câs a son 36, un tic di plui: il catalan, une minorance che o cjalìn cun interès, al è presint dopo un grum di protestis e di petizions, dome dal  Jugn dal 2010, cu la version 4 dal iPhone, e nol è ancjemò presint tal MacOS.
In mert al sgarfadôr, un component che al è simpri plui impuartant, il MacOS al dopre Safari, che come che o vin viodût cualchi mês indaûr intun articul de Patrie al è propit pôc “furlan friendly”: il program al dopre la lenghe di sisteme e – come che o vin a pene dit – il furlan nol è presint, duncje  nol è nuie di fâ; no si pues nancje doprâ un dizionari pal control ortografic.
La uniche consolazion e rive de tastiere: scrivi lis letaris furlanis sul Mac al samee avonde sempliç, ma inte ete di Internet no podìn dal sigûr contentâsi di chest.
Andrea Decorte